AMEA Naxçıvan Bölməsi beynəlxalq əlaqələrini genişləndirir
Tarix: 16-04-2021 16:07 | Bölmə: Ədəbiyyat


    Azərbaycan Milli Elmlər Akademiyası Naxçıvan Bölməsi və Türk Tarix Qurumu Başqanlığı nümayəndələrinin iştirakı ilə onlayn tədbir olub.
     AMEA Naxçıvan Bölməsinin mətbuat xidmətindən Sabaha-inamla.az-a verilən məlumata görəGiriş sözü ilə çıxış edən AMEA Naxçıvan Bölməsinin sədri, akademik İsmayıl Hacıyev bildirib ki, tədbirin keçirilməsində məqsəd Naxçıvan Bölməsinin qardaş ölkənin elmi müəssisələri ilə əlaqələrinin daha da genişləndirilməsi, səmərəli əməkdaşlığın yaradılmasıdır.
      Akademik daha sonra AMEA-nın Naxçıvan Bölməsi haqqında dinləyicilərə məlumat verib. Qeyd olunub ki, AMEA Naxçıvan Bölməsi Ulu öndər Heydər Əliyevin 7 avqust 2002-ci il tarixli Sərəncamına əsasən yaradılıb. Yaradıldığı dövrdən etibarən bölmədə 6 elmi tədqiqat institutu – Tarix, Etnoqrafiya və Arxeologiya İnstitutu, İncəsənət, Dil və Ədəbiyyat İnstitutu, Təbii Ehtiyatlar İnstitutu, Bioresurslar İnstitutu, Batabat Astrofizika Rəsədxanası və Əlyazmalar Fondu fəaliyyət göstərir. Bölmədə aparılan tədqiqatların əsas istiqamətini Naxçıvanın tarixi, ədəbi mühiti, təbii ehtiyatları, flora və faunasının hərtərəfli tədqiqi təşkil edir. Çoxşaxəli araşdırmalar aparan bölmənin Əlyazmalar Fondunda və Elmi Arxivində mühüm elmi əhəmiyyətə malik materiallar mövcuddur.
Bölmə sədri aparılan elmi tədqiqatlar və onların nəticələrindən ətraflı bəhs edərək diqqətə çatdırıb ki, 18 illik fəaliyyəti dövründə Naxçıvan Bölməsinin əməkdaşları tərəfindən iki cildlik “Naxçıvan ensiklopediyası”, “Naxçıvan abidələri ensiklopediyası”, “Naxçıvan tarixi atlası”, üç cildlik “Naxçıvan tarixi”, “Naxçıvan teatrının salnaməsi”, üç cildlik “Naxçıvanın folkloru antologiyası”, iki cildlik “Naxçıvan Muxtar Respublikasının Qırmızı Kitabı”, “Naxçıvan Muxtar Respublikasının ampeloqrafiyası”, “Naxçıvan Muxtar Respublikasının dərman bitkiləri”, “Naxçıvan Muxtar Respublikasının təbii sərvətləri: hazırkı vəziyyəti və perspektivləri”, “Naxçıvan Muxtar Respublikasının fövqəladə hallar atlası”, “Dədə Qorqud yurdu-Naxçıvan” tarixi-coğrafi və etnoqrafik atlas (üç dildə), iki cildlik “Naxçıvan coğrafiyası” kimi fundamental nəşrlər, çoxsaylı kitab və monoqrafiyalar, dərs və metodik vəsaitlər, xəritələr və s. işıq üzü görüb. Bölmə alimləri indiyədək 34 patent və müəlliflik şəhadətnaməsi alıblar.
     AMEA-nın Naxçıvan Bölməsi Türkiyə, Rusiya, ABŞ, Polşa, Fransa, İran, Şi-mali Makedoniya, Qazaxıstan, Gürcüstan kimi ölkələrin 20-dən artıq elm və təhsil mərkəzləri ilə səmərəli əməkdaşlıq etməkdədir.
Alim çıxışında yeni əməkdaşlığın Türkiyə Cümhuriyyətinin Naxçıvan Baş konsulluğunun vasitəçiliyi ilə keçirildiyini bildirib. Türk Tarix Qurumu ilə əməkdaşlığın elmi istiqamətlərindən, bu əlaqələrin vəd etdiyi gələcək səmərələrdən söz açıb.
      Tədbirdə çıxış edən Türkiyənin Naxçıvan Muxtar Respublikasındakı Baş konsulu Mehmet Emin Kiraz hər iki qardaş ölkənin tarixi, mədəni və mənəvi bağlılığından söz açıb. Çıxış zamanı Türkiyə Cümhuriyyəti ilə Naxçıvan Muxtar Respublikası arasında davam edən məhsuldar əlaqələrdən, elm, təhsil və mədəniyyət sahəsindəki əməkdaşlıqlardan bəhs olunub. Yeni yaradılmaqda olan əməkdaşlığın faydalı olacağına inam ifadə olunub.
     Türk Tarix Qurumunun rəhbəri, professor Birol Çetin, AMEA Naxçıvan Bölməsinin şöbə müdiri, dosent Emin Şıxəliyev, Türk Tarix Qurumunun nümayəndələrindən professorlar Hikmet Öksüz, Haluk Selvi, İbrahim Tellioğlu və Hüseyin Murat Yücel tədbirdə çıxış edərək iki elmi qurum arasındakı əməkdaşlığı təqdir ediblər.
    Onlayn tədbirdə qarşılıqlı əlaqələrin inkişaf etdirilməsi, iki qardaş ölkənin elm adamlarının iştirakı ilə tarixi faktların daha əhatəli tədqiqi, elmi əhəmiyyətli monoqrafiya və kitabların tərcüməsi və təbliği ilə bağlı bir sıra məsələlər müzakirə olunub, hər iki qurum arasında imzalanacaq elmi əlaqələrə dair protokolla bağlı fikir mübadiləsi aparılıb.

Sabaha-inamla.az



Baxış sayı: 75


Bölməyə aid digər xəbərlər
8-05-2021, 23:25 ELMDƏN UCA -Ramiz QASIMOV
5-05-2021, 13:36 Fikrət Qoca vəfat etdi