Yunanıstanın “E-Thessalia” xəbər portalı Naxçıvan barədə geniş məqalə yayıb. “Naxçıvan: qürurlu Azərbaycan diyarı, qədim sivilizasiyaların unikal məkanı” sərlövhəli məqalədə bildirilir ki, fevralın 9-da Azərbaycanın Naxçıvan Muxtar Respublikasının yaradılmasının 98-ci ildönümü qeyd edilib. Oxuculara bölgənin muxtar statusunun Moskva (16 mart 1921) və Qars (13 oktyabr 1921) müqavilələri ilə müəyyən edilməsi haqqında ətraflı məlumat verilib, həmin müqavilələrin Naxçıvanın Azərbaycanın tərkibində qalmasını təmin etdiyi vurğulanıb.
Məqalədə qeyd olunub ki, ötən il həm də Qars müqaviləsinin 100 illiyi qeyd edilib. Bununla bağlı Naxçıvan Muxtar Respublikası Ali Məclisinin Sədri cənab Vasif Talıbov fevralın 8-də “Qars müqaviləsinin 100 illiyinin qeyd edilməsi haqqında” Sərəncam imzalayıb.
Müəllif diqqətə çatdırıb ki, Qars müqaviləsi çox mürəkkəb siyasi şəraitdə bölgənin erməni təcavüzündən qorunmasında, ona muxtariyyət statusunun verilməsində də mühüm rol oynayıb. Belə ki, ermənilər Azərbaycanın əsas hissəsi ilə heç bir torpaq əlaqəsi olmayan Naxçıvana qarşı daim torpaq iddiaları irəli sürüblər və bu iddialardan heç vaxt əl çəkməyiblər. Vaxtilə qədim Azərbaycan torpağı olan Zəngəzurun Ermənistana verilməsi ilə Naxçıvan Azərbaycanın əsas hissəsindən ayrı salınıb. Bu, məqsədli şəkildə edilib və ermənilərin torpaq iddialarına dəstək xarakteri daşıyıb.
Məqalədə Azərbaycanın müstəqilliyinə gedən yolun 1990-cı illərin əvvəllərində Naxçıvandan başlandığı vurğulanıb. Qeyd olunub ki, Naxçıvan Muxtar Respublikası o ağır günlərdə təhlükələrdən xilas edilməsinə görə Azərbaycan xalqının ümummilli lideri Heydər Əliyevə borcludur. 1991-ci il sentyabrın 3-də Naxçıvan Muxtar Respublikası Ali Məclisinin növbədənkənar sessiyasında Heydər Əliyev Ali Məclisin Sədri vəzifəsini öz üzərinə götürüb. Heydər Əliyevin təşəbbüsü ilə Azərbaycanın milli dövlət rəmzləri ilk dəfə Naxçıvanda qəbul edilib, muxtar respublikanın adından “sovet sosialisti” sözləri çıxarılıb, ali sovetin Naxçıvan Muxtar Respublikasının Ali Məclisi adlandırılması haqqında qərar qəbul edilib, SSRİ-nin davam etdirilməsi üçün referendumdan imtina edilib. Azərbaycan hələ SSRİ-nin tərkibində olarkən, sovet qoşunları bölgədən çıxarılıb, sərhəd məntəqələrində Azərbaycanın üçrəngli bayrağı qaldırılıb.
Bildirilib ki, ötən illər ərzində Naxçıvan mürəkkəb və çətin inkişaf yolu keçib. Ermənistanın təcavüzkar siyasəti nəticəsində Naxçıvanı Azərbaycanın digər rayonları ilə birləşdirən dəmir yolu və avtomobil yolu bağlanıb, təcrid olunmuş Naxçıvan blokada şəraitində yaşamağa məcbur edilib. Uzun illərdir ki, blokada vəziyyətində qalan Naxçıvanda böyük zəhmət hesabına inkişaf təmin edilib. Bu gün Naxçıvan Muxtar Respublikası iqtisadi cəhətdən Azərbaycanın ən inkişaf etmiş regionlarından birinə çevrilib. Son illər Naxçıvanın sosial-iqtisadi inkişafı, əhalisinin rifah halının gündən-günə yüksəldilməsi istiqamətində çox mühüm addımlar atılıb.
Qeyd olunub ki, yazılı mənbələr və ərazidə aşkar edilmiş arxeoloji materiallar bir daha təsdiq edir ki, bəşər sivilizasiyasının beşiklərindən biri, Şərqin məşhur ticarət, incəsənət, elm və mədəniyyət mərkəzi olan Naxçıvan qədim tarixə, zəngin mədəniyyətə və çoxəsrlik milli irsə malikdir. Məşhur Gəmiqaya və ərazidəki digər abidələr Naxçıvanın yaşının 5 min ilə yaxın olduğunu bir daha sübut edir. Naxçıvanın adı tarixdə dəfələrlə dəyişdirilib. Bu adlardan bəziləri bunlardır: Nəkşi-cahan, Nuh çıxan və s. “Naxçıvan” sözü ilkin mənbələrdə Naksuana, Naxç, Naxçuan kimi qeyd olunub. Naxçıvanın adı ilə bağlı müxtəlif tədqiqatçılar tərəfindən bu qədər fikir irəli sürülməsinə baxmayaraq, ərazinin adı Nuh peyğəmbər və Dünya tufanı əfsanəsi ilə sıx bağlıdır. Naxçıvan şəhərində Nuh peyğəmbərin məzarı da mövcuddur və hazırda orada yenidənqurma işləri aparılır.
Məqalədə muxtar respublikanın turizm potensialından da ətraflı söz açılıb. Qeyd olunub ki, hazırda Naxçıvanın turizm potensialı çox yüksəkdir, ilboyu bir çox yerli və beynəlxalq səyahətçilər müasir infrastrukturun yaratdığı hərtərəfli şəraitdən istifadə edərək Naxçıvanın heyranedici mədəni irsi, qədim tarixi abidələri, möhtəşəm flora və faunası ilə yaxından tanış olurlar. Muxtar respublika sağlamlıq turizmi üçün də unikal məkandır. Naxçıvanın rəmzlərindən biri olan və təbii duz ehtiyatına malik olan Duzdağda yaradılan Fizioterapiya Mərkəzi müasir dövrün bəlası olan astma-bronx sistemi xəstəliklərinin müalicəsində dünyada unikaldır. Möminə Xatun, Yusif Küseyir oğlu, Qarabağlar, Gülüstan türbələri dünyanın zəngin memarlıq irsi kimi diqqəti cəlb edir. Dağ başında qurulan Əlincəqala bu diyarın məğlubedilməzlik simvoludur. Əshabu-Kəhf, imamzadələr, Xanəgah qədim yurdun ziyarət ünvanlarıdır. Qeyd edək ki, Əshabi-Kəhfin adı İslam dininin müqəddəs kitabı olan “Qurani-Kərim”də çəkilib.
Məqalənin sonunda vurğulanıb ki, bu qədim Azərbaycan diyarı hazırda yeni inkişaf mərhələsinə qədəm qoyub. Vətən müharibəsindən sonra regionda kommunikasiya dəhlizlərinin və nəqliyyat marşrutlarının açılması Naxçıvanın strateji əhəmiyyətini daha da artıracaq. Azərbaycanın qərb rayonlarını Naxçıvan ilə birləşdirəcək Zəngəzur dəhlizinin fəaliyyətə başlaması regionda təkcə iqtisadi deyil, həm də müsbət siyasi proseslərə təkan vermək potensialına malikdir. Avrasiyanın ümumi nəqliyyat əlaqələrində müsbət yeniliklər baş verəcək, Zəngəzur dəhlizi Cənubi Qafqazdan keçən həm Şimal-Cənub, həm də Şərq-Qərb beynəlxalq nəqliyyat dəhlizlərinin bir hissəsi olacaq. Bu, Naxçıvanın daha da sürətli inkişafına və çiçəklənməsinə töhfə verəcək.
Məqalə ilə bu linkdən tanış olmaq mümkündür:
https://e-thessalia.gr/nachtsivan-mia-perifani-gi-toy-azermpaitzan-monadikos-proorismos-archaion-politismon/