Bütün xəbərlər
Söz var - imza kimi keçərli, imza var - “sıfır” təsirli…Əkbər Qoşalı
Tarix: 20-01-2023 20:06 | Bölmə: Cəmiyyət

                            


Azərbaycan Prezidenti İlham Əliyev yeni ilin birinci ayında yerli TV-lərə (2023-cü il üçün) ilk müsahibəsini verdi. Müsahibə əsasən Azərbaycanın çağdaş regional, beynəlxalq münasibətlər sistemindəki yeri, rolu və əlbəttə, tarixi Zəfərimizin yaratdığı yeni gerçəkliklərlə bağlı suallara cavablardan ibarətdi. Prezident ölkə həyatı, vacib əməli fəaliyyət sahələri barədə ətraflı danışdı; bununla belə beynəlxalq mövzular aparıcı istiqamət təşkil edirdi.
Dövlət başçısı sonra Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Al Nəhyanın dəvəti ilə (yanvarın 15-də) Birləşmiş Ərəb Əmirliklərinə işgüzar səfərdə oldu.
“Əbu-Dabi Dayanıqlılıq Həftəsi”nin rəsmi açılışında çıxışı zamanı Azərbaycan Prezidenti, yerli TV-lərə müsahibədəki beynəlxalq aspekti daha geniş şəkildə bir daha dəyərləndirdi. Bu, ölkəmizin dünya birliyini düşündürən mövzulara həssaslığı, özəlliklə enerji təhlükəsizliyi ilə bağlı töhfələrinə dair məzmunla zənginləşdirilmiş dəyərdir. İndiki mürəkkəb dünyada sözü imzası qədər keçərli olan ölkələrin, liderlərin sayı (təəssüf ki) dəhşətli dərəcədə azdır. Biz imzası etibarsız ölkələr, liderlər görürük… - Məsələn, Avropa Parlamentinin anti-Azərbaycan mətnli (18 yanvar) qətnaməsi hansısa ciddiyyətdən, anlaşmadan, etibardan, ədalətdən danışmağa əl yeri qoyurmu? 407 “mədəni Avropalı” mədəniyyətsizcə işğalçılığı, vandalizmi, terrorizmi (beynəlxalq norma tanımazlığı) öz rəsmi mövqeyi kimi sabitləşdirmiş Ermənistanın haqsız iddialarını qəbul etdi. Görə-görə kor, eşidə-eşidə kar olan 407 nəfər, Azərbaycan kimi xoşgörülü, barışcanlı bir ölkəyə növbəti ədalətsizliyi (Allahsızlığı!) elədi.
Bu, şəxsən məndə iki hissi özəlliklə qabardır:
1) necə bir ədalətsiz dünyada yaşadığımızı və milli birliyin fövqəladə önəmini düşünürəm;
2) 44 günlük müharibədəki Zəfərimizin qəbul etdirilməsinin 1918-ci ildə qurduğumuz Cümhuriyyəti beynəlxalq aləmə tandıtdırmaq qədər, (bəlkə ondan artıq dərəcədə) çətin olduğunu düşünürəm…
Bu düşüncələrlə Davosa yönəlmək istəyirəm.
Qlobal problemlərin müzakirə olunduğu, dünyanın iqtisadi həyatında önəmli qərarların verildiyi Dünya İqtisadi Forumuna Azərbaycan Prezidentinin növbəti dəfə dəvət olunması, əlbəttə, onun dünyadakı yüksək nüfuzunun daha bir göstəricisi, təsdiqidir.
Bu ilki forumda dünyanın 130 ölkəsindən rekord sayda - 2700-dən artıq tanınmış şəxs, habelə 52 dövlət/hökumət başçısı iştirak edir. Azərbaycan Prezidenti çoxsaylı görüşlər keçirib, iştirak etdiyi toplantılarda vacib ismarıclar verib, Azərbaycanın həqiqətlərini, yeni reallıqları, yeni əməkdaşlıq, yatırım imkanlarını və ümumən imkanları beynəlxalq aləmə bir daha çatdırıb.
Dünya İqtisadi Forumunun illik toplantısında iştirak etmək üçün İsveçrə Konfederasiyasında (Davosa) səfərdə olan İlham Əliyevin CISCO şirkətinin qlobal innovasiyalar üzrə vitse-prezidenti, Fortesque FutureIndustries şirkətinin sədri, TheGoldmanSachsGroupInc. şirkətinin qlobal məsələlər üzrə prezidenti, KromatixSA şirkətinin baş icraçı direktoru, Signify şirkətinin baş icraçı direktoru, CarlsbergGroup şirkətinin prezidenti və baş icraçı direktoru, Litva Prezidenti, BMT-nin Məskunlaşma Proqramının icraçı direktoru, Niderland Krallığının Baş naziri, Xorvatiyanın Baş naziri, Avrops Birliyinin büdcə və administrasiya üzrə komissarı, Dünya İqtisadi Forumunun sədri, Monteneqronun Baş naziri, “Adani Group" şirkətinin təsisçisi və sədri, Avropa Yenidənqurma və İnkişaf Bankının birinci vitse-prezidenti və Latviya Prezidenti ilə görüşü olub. (Burada, yazı yazılanadək olan görüşlər vurğulanıb).
Davosda Azərbaycanın enerji layihələrinin genişləndirilməsi məsələləri müzakirə edilib.
İlham Əliyev Davosda Çinin CGTN televiziya kanalına müsahibə verib.
Prezident Davos Forumunda “Yeni enerji reallığının istiqamətləndirilməsi" mövzusunda dəyirmi masada, panel iclasında
iştirak edib.
Cənab Prezidentin Davosda aparılan müzakirələrdəki fikirlərini qruplaşdırmağa çalışsaq, mənzərə bu şəkildə olar:
-Azərbaycan Respublikası öz enerji potensialını reallaşdırmaq və ixrac etmək üçün qonşu ölkələrlə bərabərhüquqlu bağlantılar qurur, bu bağlantıları inkişaf etdirir və bununla da, qarşılıqlı faydalı işgüzar ortam formalaşmış olur;
-Enerji resurslarının ixracı üçün uyğun bazarı və marşrutları müəyyən etmək, onları həyata keçirməkçün Azərbaycanın imkan və siyasi iradəsinin mövcudluğu danılmaz faktdır;
- Azərbaycanın enerji potensialı və dünyada ona tələbatın artması, Azərbaycanın dünya enerji bazarında önəmli iştirakçıya çevrliməsi də günümüzün vacib həqiqətidir. Məsələn, “Orta xətt”in məhz Azərbaycanın yaratmış olduğu yeni reallıqlar və məhz Azərbaycanın nəqliyyat-tranzit potensialı sayəsində real müstəvi qazanması bütün maraqlı tərəflərin yüksək diqqətini (dəstəyini) haqq edir. Bu, Azərbaycan qədər digər “Orta xətt” iştirakçıları üçün maraq kəsb edir.
Azərbaycan yalnız dəhliz yaratmır, eyni zamanda müəssisələrin, nəqliyyat obyektəırinin və s. olacağı yeni (böyük) infrastruktur formalaşdırır. Obrazlı desək, “Orta xətt” Baş xətt olacaq!
Beləliklə, Azərbaycanla Avropa Birliyi arasında əlaqələrin inkişafı və özəlliklə enerji sahəsində əməkdaşlığın daha da güclənməsi müşahidə olunur.
İndi işə baxın ki, Avropaya sözün hər mənasında enerji verən, Asiya imkanları ilə Avropa təlabatını əlaqələndirən Azərbaycan, parazit və dalan Ermənistanın - yarandığı 104 il içində “yıxılmağa yer gəzən”, onun-bunun hesabına dolanan, Şərqli-Qərbli Avropaya “0” xeyri olan Ermənistanın ayağına verilməyə çalışılır. Öz başınızçün! 30 illik işğalda əzəmətini, duruşunu itirməyən Azərbaycana indi nəyisə diqtə edə bilməyəcəksiz! Qazi Mustafa Kamal Paşa Atatürkün sözləri ilə desək, hər halda dünyada Haqq var və o Haqq qüvvətdən yüksəkdir!
DÖVLƏTİMİZ ZAVAL GÖRMƏSİN!
20 yanvar 2023-cü il,
Bakı. Müstəqil və Qalib AZƏRBAYCAN


Baxış sayı: 170


Bölməyə aid digər xəbərlər