Bütün xəbərlər
Qənirə Paşayeva Bərdə rayon Mədəniyyət Mərkəzində Xurşidbanu Natəvanın 190 illiyinə həsr olunmuş tədbirdə və həmmüəllifi olduğu kitabın təqdimatında çıxış edib
Tarix: 13-09-2022 22:53 | Bölmə: Ədəbiyyat

Təqdimatda millət vəkili Fatma Yıldırım, qardaş Türkiyədən olan ziyalılar – İstanbulda çıxan “Türk Ədəbiyyatı” dərgisinin baş redaktoru, yazıçı-tərcüməçi İmdat Avşar, Ankaradakı “Əhməd Yəsəvi Dərnəyi”nin rəhbəri Dr. Fatma Sönməz, şəhid ailələri, qazilər, regional idarə üzrə Bərdə, Tərtər, Yevlax rayonlarından, o cümlədən Mingəçevir şəhərindən olan mədəniyyət işçiləri, Bərdə regional “ASAN xidmət” mərkəzinin direktoru İlahə Quliyeva, “ASAN könüllüləri”, Gənclərin İnkişaf və Karyera Mərkəzinin Bərdə nümayəndəliyinin könüllüləri, Bərdə rayon Gənclər və İdman İdarəsinin əməkdaşları, tədbirə dəvət olunmuş fəxri qonaqlar iştirak edib. Tədbir başlamazdan öncə komitə sədri Qənirə Paşayeva, millət vəkili Fatma Yıldırım və tədbirin bir qrup iştirakçısı Bərdə Şəhidlər Xiyabanını ziyarət edib, ölkəmizin ərazi bütövlüyünün təmin edilməsi uğrunda müqəddəs şəhidlik zirvəsinə ucalan qəhrəmanların əziz xatirəsini dərin ehtiramla yad edib, şəhidlərin məzarı önünə gül dəstələri düzüb. Tədbiri Bərdə Regional Mədəniyyət İdarəsinin rəisi Vəsilə Möhsümova açaraq qonaqları salamlayıb, XIX yüzil Azərbaycan ədəbiyyatının görkəmli nümayəndəsi, ictimai xadim Xurşidbanu Natəvanın zəngin bədii yaradıcılığından bəhs edib. Milli Məclisin Mədəniyyət Komitəsinin sədri Qənirə Paşayeva əziz Şuşa şəhəri də daxil olmaqla, Qarabağın yalnız Azərbaycan və Türkiyəyə deyil, bütün Türk-İslam dünyasına görkəmli şəxsiyyətlər bəxş etdiyini diqqətə çatdırıb: “Bu kitabın Azərbaycanda ilk təqdimatını Nizami Gəncəvinin “Bərdə nə gözəldir, necə qəşəngdir, Yazı da, qışı da güldür, çiçəkdir. İyulda dağlara lalələr səpər, Qışını baharın nəsimi öpər...” deyə öydüyü Bərdədə keçiririk”. Q.Paşayeva vurğulayıb ki, Dos.Dr. Faiq Ələkbərli ilə birgə hazırladığı kitabın Türkiyədə nəşri və ötən ay TÜRKSOY-da, indi isə Bərdə Mədəniyyət Mərkəzində ilk təqdimatı Xurşidbanu Natəvan və Fatimə xanım Kəminə kimi görkəmli Azərbaycan şairlərinin yaradıcılığına verilən dəyərin ifadəsi olub, hər iki xanımın tarixi şəxsiyyət kimi ucalığını tərənnüm edir. Q.Paşayeva Azərbaycan Prezidenti, Müzəffər Ali Baş Komandan İlham Əliyevin başçılığı ilə şanlı Azərbaycan Ordusunun 44 günlük müharibədə qazandığı tarixi Zəfər sayəsində indi Şuşa ilə, Qarabağla bağlı tədbirləri qürurla, fərəhlə keçirdiyimizi deyib: “Şuşanın, Qarabağın hər guşəsi bizim üçün dəyərli olduğu kimi tarixi şəxsiyyətlərin, mədəniyyət, sənət xadimlərinin irsi də bizimçün əzizdir”. Komitə sədri Şuşanın Ermənistan silahlı qüvvələrinin işğalı altında olduğu illərdə mədəni irsə qarşı vandallıqlardan da söz açıb, Natəvanın, Üzeyir Bəyin, Bülbülün abidələri daxil olmaqla, heykəllərin belə güllələndiyini bildirib. “Əlbəttə, danılmaz həqiqətdir ki, qərinələr öncə Şuşada Xurşidbanu Natəvan, Fatma xanım Kəminə kimi tarixi şəxsiyyətlər yetişibsə, bu Şuşadakı mədəni mühiti, Qarabağda, ümumən Azərbaycanda qadına bəslənən münasibəti göstərir. Biz qürur hissi keçiririk ki, 1918-ci ildə Yaxın Şərqdə ilk, ümumən dünyada ilklərdən biri olaraq qadına seçmək, seçilmək hüququ verən Cümhuriyyət məhz Azərbaycanda qurulub. Və bu təsadüfi olmayıb, bunun tarixi, mədəni əsasları, kökləri olub”. Q.Paşayeva Bərdə Regional Mədəniyyət İdarəsinə, qardaş ölkədən gəlmiş ziyalılara, tədbirə təşrif buyurmuş şəhid ailələrinə, qazilərə, bütün iştirakçılara könül dolusu təşəkkür edib. Tədbirdə millət vəkili Fatma Yıldırım, qardaş Türkiyədən olan ziyalılar –yazıçı-tərcüməçi İmdat Avşar, “Əhməd Yəsəvi Dərnəyi”nin rəhbəri Dr. Fatma Sönməz, sözügedən kitabın həmmüəllifi Dos.Dr. Faiq Ələkbərli çıxış edib. Sonra yerli musiqiçilərin, o cümlədən VIII “MUĞAM” Televiziya Müsabi­qəsinin qalibi Fuad Sərxanoğlunun iştirakı ilə maraqlı bədii hissə təşkil olunub. “Qarabağdan doğan Günəş və Ay – Xurşidbanu Natəvan və Fatimə xanım Kəminə” kitabında şairələrin bioqrafiyaları və dünya görüşləri, eləcə də yaradıcılıqlarından örnəklər öz əksini tapıb. Qeyd edək ki, Azərbaycan Respublikasının Prezidenti cənab İlham Əliyev 14 mart 2022-ci il tarixdə “Xurşidbanu Natəvanın 190 illiyinin qeyd edilməsi haqqında” Sərəncam imzalamışdır. Azərbaycan Respublikası Nazirlər Kabinetinin 07.05.2019-cu il tarixli, 211 saylı Qərarı ilə Xurşidbanu Natəvanın (Xurşidbanu Natəvan xanım Cavanşir-Usmiyeva; 06.08.1832, ŞUŞA – 02.10.1897, ŞUŞA) adı “Azərbaycan Respublikasında əsərləri dövlət varidatı elan edilən müəlliflərin siyahısı”na daxil edilib.

Sabaha-inamla.az

               








Baxış sayı: 116


Bölməyə aid digər xəbərlər
16-09-2022, 11:24 Şəhidim-Xalidə Nuray