09:10 / 18-07-2024
Bayden koronavirusa yoluxub
Bütün xəbərlər
2024 "QURAN SƏDASI" MÜSABİQƏSİNİN FİNAL MƏRHƏLƏSİ
Tarix: 10-07-2024 12:02 | Bölmə: Sosial

Rəhimli və mərhəmətli Allahın adı ilə!
2004- cü il iyul ayının əvvəlində "Quran sədası" müsabiqəsinin Final mərhələsi başa çatdı.
Qeyd edim ki, artıq Azərbaycanda ikinci dəfədir telelayihə çərçivəsində "Quran sədası" adlı müsabiqə keçirilir. Müsabiqənin keçirilməsində əsas məqsəd Həzrət Muhəmmədin (s) yer üzündəki ümmətinə vəsiyyət edərək qoyduğu iki mühüm və ağır əmanəti qoruyub saxlamaqdan ibarətdir. Uca Allahın bəşəriyyət üçün hidayət çırağı olaraq göndərdiyi müqəddəs Qurani-Kərimin olduğu kimi qorunub saxlanılaraq düzgün oxuyub nəsildən-nəsilə ötürülməsi və Əhli-beyt!
Məhz bu mübarək və məsuliyyətli məqsəd və prinsiplər çərçivəsində görülən bütün işlər İlahinin bizlərə bəxş etdiyi müqəddəs və ali əmanətlərimizə olan bağlılığın bariz nümunəsidir. Həmd olsun Aləmlərin Rəbbinə ki, Azərbaycanda bu mübarək misyanı layiqincə təmsil edən yüksək dəyərlərə malik elm-ürfan sahibi Quran ustadlarımız var. Ümmətin ən şəfaətçi nümayəndələrindən biri də Quranı həmd edənlər və oxuyub başqalarına öyrədənlərdir. Düzgün və gözəl Quran oxuyanların sayının çoxalması məqsədilə başladılan "Quran sədası" müsabiqəsi iki mərhələdən ibarət idi. Birinci mərhələdə çoxsaylı Quran qariləri arasından ölkəmizin dəyərli ruhaniləri və Quran ustadlarımız tərəfindən 10 nəfər iştirakçı seçilmişdir. 10 həftədən artıq davam edən müsabiqə iştirakçıları aşağıdakılardır.
1. Eldar Əhmədzadə
2. Fuad Əliyev
3. Əlixan Əhmədov
4. Simran Əliyev
5. Mahir Əliisgəndərov
6. Ramil Vəlişov
7. Hümmət Məmmədov
8. Yusif Hüseynov
9. Tural Hüseynli
10. Kamran Hacıyev
Müsabiqədə əsas üstünlük muğam, səslər, təcvid, ləhn və məlahətə verilirdi. Ən böyük məqsəd və missiya ondan ibarət idi ki, qüsursuz və düzgün şəkildə Quran oxuyanların sayı çoxalsın. Həmçinin bütün bacarıq və qabiliyyətlərini nümayiş etdirən iştirakçılarımız üçün gələcəkdə beynəlxalq Quran yarışlarında iştirak etməyə əlverişli şərait yaransın. Çünki təcvid, üzdən oxu və gözəl səs qari olmaq üçün bir insanda vəhdət təşkil etməlidir. Bunun üçün dəyərli münsiflər heyəti hər bir iştirakçı ilə ayrı-ayrılıqda məşq edərək həmin 10 həftə ərzində böyük əmək sərf etdilər.
Çox hörmətli münsiflər heyətinin nümayəndələri Quran qarimiz-Quran mərkəzinin sədri Ustad Hacı Ruslan Qasımov, layihənin rəhbəri Quran qarimiz ustad Hacı İlkin Həsənzadə və dəyərli ruhanimiz Quran ustadı Seyyid Mirəli Musayev idi. 10 nəfər iştirakçıların hər biri üçün münsiflər heyətinin ayrı-ayrılıqda 100 ballıq sistem üzrə qiymətləndirmə hüququ vardı. Muğamlardan 40 bal, təcvid 40 bal, vəqfi-ibtidadan 20 bal. Həmçinin balların hesablanma sırasında müsabiqə boyunca sona qalan 3 iştirakçı növbəti mərhələyə keçid etmək üçün pərdə arxası 100 qarinin və tamaşaçıların səsvermə hüququndan istifadə etməyə sahib idilər.
Beləliklə final mərhələsi "Quransevərlər" cəmiyyətinin yaradılmasının 21- ci ilinə təsadüf edilən 2024 "Quran sədası" müsabiqəsində birinci, ikinci və üçüncü yerin qalibləri müəyyən edildi.
1- ci yerin qalibi Yusif Hüseynov.
2-ci yerin qalibi Eldar Əhmədzadə.
3-cü yerin qalibi Fuad Əliyev.
Sonda hər üç iştirakçıya qalibiyyət diplomları təqdim edildi. Həmçinin birinci yerin qalibi Yusif Hüseynova iki nəfərlik Ümrə ziyarəti, ikinci yerin qalibi Eldar Əhmədzadəyə bir nəfərlik Ümrə ziyarəti və üçüncü yerin qalibi Fuad Əliyevə Kərbəla ziyarəti hədiyyə olundu. Allah qəbul etsin. Amin, İnşallah!
Bütün iştirakçılara uğurlar və müvəffəqiyyətlər diləyirəm. Allah məqamlarını daha da uca etsin. Amin!
Yer üzünə nazil olduğu zaman ilk ayəsi "Oxu" nidasıyla başlayan müqəddəs Quran uca Allahın əsrlər boyu dünya var olduqca araşdırılıb öyrənildikcə bitib tükənməyən möcüzələr xəzinəsi, elmi tədqiqatlar, inqilabi kəşflər baş verdikcə yenidən intəhəsızlıqlar kəşf edən sonuncu səmavi bir kitabdır. Allahın əzəli və əbədi varlıq olduğunu tərənnüm edən 114 surə, 6236 ayə və 30 cüzdən ibarət olan ilahi bir kitab müqəddəs himnidir. Əzəmətli və Uca Rəbbim hər zaman dünyamızı müqəddəs Quran sədasıyla rövnəqləndirərək münəvvər etsin. Uca Rəbbim müqəddəs Quran zikr edən edən gözlərə nur, dinləyən könüllərə hüzur bəxş etsin. Ömrümüzdən və həyatımızdan müqəddəs Quran sədasının gözəlliyi və ilahi hikmət payı heç bir zaman əskik olmasın. Ruhun əlifbası, etiqad, tövhid, həyat kitabı xoş xəbər verən, moizə edən, ilahi nur hikmət və şəfaət toplusu olan müqəddəs Quranın nuru əqidə və amalımızı, xislətimizi paklaşdıraraq bizləri həqiqi əməl sahiblərindən qərar versin.
Rəbbim ali əxlaqi dəyərlərə yüksək elmi mədəniyyətə xidmət edərək Allahın müqəddəs əmanətlərini şərəf və ləyaqətlə qoruyub uca tutan ustad və qarilərimizi Qurandan və Əhli-beyt əhlindən ayrı salmasın. Müsabiqə boyunca şəhidlərimizin müqəddəs və pak ruhuna hədiyyə olunan Quran zikirləri Allah dərgahında ali dərəcədə qəbul olunsun İnşallah!
Uca Allah dünyamızı imamət, hidayət, vilayət çırağının nuru müqəddəs Quranın hikmət, əzəmət və qüdrətinin gücüylə münəvvər edərək bizləri cənnətə doğru aparan yolları geniş və aydın etsin. Amin!
Fürsətdən istifadə edib dəyərli ruhanimiz Hacı Ramil Bədəlova və teleaparıcı Oktay Quliyevə həmçinin müsabiqənin keçirilməsində əməyi əziyyəti olan hər kəsə Quran aşiqləri adından dərin təşəkkür və minnətdarlığımı bildirirəm.
Allah bütün iştirakçıların ömrünə, elminə bərəkət, səsinə və nəfəsinə qüvvət versin. Bu müqəddəs məsuliyyətli və şərəfli yolda uğur sancağı daima qismətiniz olsun əzizlərim. Hər zaman müqəddəs Quranla məşhur olasınız. Amin İnşallah!

Zəkiyyə Musaqızı,
AJB üzvü






Baxış sayı: 344


Bölməyə aid digər xəbərlər