Bütün xəbərlər
“Vətəni sevməyi SƏN-dən öyrəndik!” adlı kitabın təqdimatı keçirildi
Tarix: 10-03-2023 22:11 | Bölmə: Sosial


Sabunçu rayonu, 96 nömrəli tam orta məktəbin akt zalında "Vətəni sevməyi SƏN-dən öyrəndik!" adlı kitabın təqdimatı keçirildi.

Sabaha-inamla.az xəbər verir ki, bu barədə YAP Sabunçu rayon təşkilatı sosial şəbəkədə məlumat yayıb. 
Məlumata görə, tədbir Ümummilli Lider Heydər Əliyevin 100 illiyinə və "Heydər Əliyev İli"nə ithafən dərc edilmiş eyniadlı kitabın təqdimatına həsr edilib. Kitabda məktəbin yuxarı sinif şagirdlərinin tədqiqat xarakterli yazıları toplanıb. Bu məqalələri birləşdirən əsas ideya isə Heydər Əliyev irsinin gənc nəslin tərbiyəsində oynadığı mühüm rol və onlara aşıladığı milli, mənəvi və əxlaqi dəyərlərdir.
Tədbir Ulu Öndərin əziz xatirəsinin və vətənimiz Azərbaycanın azadlığı, bütövlüyü uğrunda canından keçmiş qəhrəman oğulların müqəddəs ruhunun bir dəqiqəlik sükutla anılması ilə başladı. Sonra dövlət himni səsləndi.
Tədbiri giriş sözü ilə açan məktəbin direktoru Mehriban Hacıyeva qonaqları salamlayaraq kitab haqqında ətraflı məlumat verdi, görülmüş işin məqsədi və mahiyyəti barədə tədbir iştirakçılarını məlumatlandırdı.
Kitabın təqdimatının ardınca söz Bakı Şəhəri üzrə Təhsil İdarəsinin müdiri Mehriban Vəliyevaya verildi. M.Vəliyeva çıxışında şagirdlərdə tədqiqatçılıq bacarığını formalaşdıran və onların müstəqil öyrənməsinə təkan verən bu addımı yüksək qiymətləndirərək bu istiqamətdə görülən işləri tədqirəlayiq hesab etdi və davamlı olmasını arzu etdi.
Daha sonra kitaba rəy vermiş millət vəkili, ilahiyyat üzrə fəlsəfə doktoru Ceyhun Məmmədov, millət vəkili, Avropa Şurası Parlament Assambleyasında Azərbaycan nümayəndə heyətinin üzvü Fazil Mustafa, Sabunçu Rayon İcra Hakimiyyəti başçısının müavini Rəna Fərəcova, Yeni Azərbaycan Partiyası Sabunçu rayon təşkilatının sədri Araz Xudadanov, Azərbaycan Dövlət İqtisad Universitetinin dosenti, Heydər Əliyev iqtisadi irsinin öyrənilməsi Mərkəzinin direktoru Cəlal Allahverdiyev çıxış edərək Heydər Əliyev irsinin öyrənilməsində bu kimi layihələrin əhəmiyyətindən söz açdılar. Tədbir şagirdlərin ifasında şeirlər və mahnılarda davam etdi.
Sonda xatirə şəkli çəkildi.

Sabaha-inamla.az

















Baxış sayı: 199


Bölməyə aid digər xəbərlər