Bütün xəbərlər
“Naxçıvanda ordu quruculuğu müasir mərhələdə” mövzusunda açıq dərs keçirilib
Tarix: 06-11-2022 01:25 | Bölmə: Sosial


       Naxçıvan Muxtar Respublikası Ali Məclisinin Naxçıvanşünaslıq Mərkəzinin təşkilatçılığı və Heydər Əliyev adına Hərbi Liseyin kursantlarının iştirakı ilə “Naxçıvanda ordu quruculuğu müasir mərhələdə” mövzusunda açıq dərs keçirilib.  
      Açıq dərsi giriş sözü ilə açan Mərkəzin elmi katibi Nihad Tarverdiyev qeyd etmişdir ki, Azərbaycanın zəngin dövlətçilik tarixində güclü, mütəşəkkil, peşəkar və yüksək döyüş hazırlığına malik ordunun yaradılması, formalaşdırılması və inkişafı Ümummilli lider Heydər Əliyev adı ilə bağlıdır. Ulu öndər Heydər Əliyev tərəfindən əsası qoyulmuş müasir ordu quruculuğu siyasəti bu gün Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev tərəfindən uğurla davam etdirilir. Dünyanın ən güclü orduları sırasında yer alan 100 yaşlı Azərbaycan Ordusunun həm silah arsenalı, həm də maddi-texniki bazası genişlənir, şəxsi heyətin sosial-məişət şəraiti yaxşılaşır, mənəvi-psixoloji hazırlığı və döyüş ruhu daha da yüksəlir. Ordumuzun bu gücə qovuşmasında xalq-ordu birliyinin də mühüm rolu var. Bu gün xalqla ordu arasında möhkəm əlaqənin, sarsılmaz birliyin mövcud olması nəticəsində məğlubedilməzliyi və qələbə əzmi daha da artan Azərbaycan Ordusunun şəxsi heyəti bütün döyüş tapşırıqlarının öhdəsindən layiqincə gələrək işğal altındakı torpaqlarımızı düşmən tapdağından azad edib.
   Qeyd olunmuşdur ki,  ölkəmizdə ordu quruculuğu istiqamətində görülən işlər Naxçıvan Muxtar Respublikasında uğurla davam etdirilir. Muxtar respublikada hərbi hissələrin maddi-texniki təminatı möhkəmləndirilir, yeni əsgəri-məişət-yaşayış kompleksləri tikilir, zabit ailələrinin mənzil-məişət şəraiti yaxşılaşdırılır, şəxsi heyətin döyüş və mənəvi-psixoloji hazırlığı əhəmiyyətli dərəcədə artırılır.Naxçıvan Muxtar Respublikası Ali Məclisinin sədri cənab Vasif Talıbovun yüksək diqqət və qayğısı sayəsində uzun illər müxtəlif mərhələlərdən keçərək formalaşmış Əlahiddə Ümumqoşun Ordu bu gün yerləşdiyi coğrafi mövqeyə, kontingentinə və döyüş qabiliyyətinə görə keçmiş SSRİ və indiki MDB ölkələrinin silahlı qüvvələri səviyyəsində analoqu olmayan statusa malikdir.
     Diqqətə çatdırılıb ki, Əlahiddə Ümumqoşun Ordunun keçirdiyi və hərb tariximizə qızıl hərflərlə yazılan uğurlu Günnüt əməliyyatı Azərbaycan əsgərinin rəşadət əzmini bir daha bütün dünyaya nümayiş etdirdi. Belə ki, 2018-ci ilin mayında Naxçıvan Muxtar Respublikasının 11 min hektar ərazisi və Şərur rayonunun Günnüt kəndi düşməndən azad edildi və həmin ərazilər ordumuzun nəzarəti altına keçdi.  Elə həmin ilin iyunun ayının 26-da Azərbaycan Ordusunun yaranmasının 100 illiyi ilə bağlı keçirilən möhtəşəm paradda Azərbaycan Respublikasının  Prezidenti, Silahlı Qüvvələrin Ali Baş Komandanı cənab İlham Əliyev ordumuzun digər uğurları ilə yanaşı, Əlahiddə Ümumqoşun Ordunun keçirdiyi Günnüt əməliyyatı haqqında da dəyərli fikirlər səsləndirib, bu əməliyyatı peşəkarlıq və məharətlə həyata keçirilən uğur adlandırıb.
     Bu gün Dünyanın ən güclü orduları sırasında yer alan, mükəmməl döyüş taktikası ilə yeni nəsil müharibə nümunəsi göstərən Silahlı Qüvvələrimiz 30 il müddətə yaxın erməni işğalı altında olan torpaqlarımızın azadlığı uğrunda gedən 44 günlük Vətən müharibəsində olduğu kimi, Ali Baş Komandan cənab İlham Əliyevin rəhbərliyi ilə bu gün də, sabah da istənilən yadelli qüvvələrə layiqli cavab verməyə qadirdir. Hər bir azərbaycanlı yenilməz ordumuzun qələbəsindən qürur duyur, azərbaycanlı olmağımızla fəxr edirik. Şanlı ordumuz öz zəfərləri ilə bütün dünyaya gücünü, dövlətimizin qüdrətini, ordumuzun yenilməzliyini sübut etdi. Çünki şanlı Azərbaycan Ordusu yenilməzdir.    
      Sonda Heydər Əliyev adına Hərbi Liseyin zabiti baş leytenant Aqil Kazımzadə çıxış edərək kursantlara gələcək zabit həyatında uğurlar arzulamış və daha sonra mərkəz ilə tanışlıq həyata keçirilib.
Sabaha-inamla.az
 





Baxış sayı: 93


Bölməyə aid digər xəbərlər