Rektor I kurs tələbələri ilə görüşüb
Tarix: 16-09-2022 04:30 | Bölmə: Sosial

      Azərbaycan İlahiyyat İnstitutunun (Aİİ) rektoru Aqil Şirinov I kurs tələbələri ilə görüşüb.
      Tədbirdə respublikamızın ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
      Aİİ rektoru tələbələri ali təhsil müəssisəsinə qəbul olmaları münasibətilə təbrik edərək bildirib ki, bu onların həyatında yeni səhifədir. A.Şirinov vurğulayıb ki, Vətənə layiqli vətəndaş, milli şüura malik, zəngin dünyagörüşlü, perspektivli mütəxəssis olmaq üçün dayanmadan çalışmaq vacibdir.
     İnstitutda təhsilalanlar üçün yaradılan şəraitdən söhbət açan rektor ali təhsil müəssisəsi haqqında geniş məlumat verib. Bildirib ki, İnstitut Azərbaycan Respublikasının Prezidenti cənab İlham Əliyevin Sərəncamı ilə 9 fevral 2018-ci ildə Dini Qurumlarla İş üzrə Dövlət Komitəsinin tabeliyində yaradılıb. Ali təhsil müəssisəsi yarandığı gündən tələbələrin daha yaxşı təhsil almaları üçün əlindən gələni əsirgəmir.
     Dövlətin verdiyi imtiyazları xüsusi vurğulayan A.Şirinov tələbələrin pulsuz dərslik və yeməkpulu ilə təmin olunmaları məsələsinə də toxunub. O, həmçinin qeyd edib ki, semestr ərzində yüksək göstəricilərə malik tələbələrimiz dövlət tərəfindən verilən təqaüddən əlavə, digər təqaüd proqramlarından da yararlana bilərlər. Bunlar ümummilli lider Heydər Əliyev adına, Şeyxülislam adına, QMİ-nin təsis etdiyi akad. Vasim Məmmədəliyev adına, Mənəvi Dəyərlərin Təbliği Fondunun təsis etdiyi təqaüdlərdir.
      Aİİ rektoru daha sonra tələbələri İnstitutun ictimai həyatında fəal olmağa səsləyib. Bildirib ki, Aİİ il ərzində ölkədaxili səfərlər, qış və yay məktəbləri,müxtəlif yarışmalar və tədbirlərtəşkil edir.
      A.Şirinov sonda daha yüksək göstəricilər göstərərək Aİİ-yə daxil olan tələbələri təbrik edərək onlara hədiyyələr təqdim edib.
      Qeyd edək ki, Azərbaycan İlahiyyat İnstitutunun bakalavriat səviyyəsinə bu il 74 tələbə qəbul olub.
Sabaha-inamla.az











Baxış sayı: 60


Bölməyə aid digər xəbərlər