11:39 / 13-08-2022
Tramp həbs oluna bilər
Pəncəli Teymurov – Vətənpərvərlik nümunəsi, qəhrəmanlıq məktəbidir-Cəmil Quliyev
Tarix: 31-07-2022 01:11 | Bölmə: Sosial

Tarixən bölgəmiz düşmənə qarşı mübarizədəqəhrəman oğulları ilə döyüş meydanında öz sözünü deyib.Buna misal olaraq 2 dəfə Sovet ittifaqı qəhrəmanı General Həzi Aslanov, Ziya Bünyadov, Mirzə Cəbiyev, Milli qəhrəmanlar Rövşən Abdullayev, Əsgər Əliyev, Mübariz İbrahimov, 44 günlük Vətən müharibəsi qəhrəmanları Ramiz Cəfərov, Rəşad Abdullayev və neçə neçə şəhid, qazi, müharibə iştirakçısı olan igidlərimizi bu siyahıya əlavə etmək olar. 31 iyul 2022–ci il tarixində Astaranın Əzərüd kəndində şəhid Pəncəli Teymurovun ev muzeyini və şəhidin qəbrini ziyarət etdik. Bu ad artıq Astaranın Əzərüd kəndinin pasportuna çevrilib. Əlbəttə, ermənilərin başına 1 milyard pul qoyduğu bu “gözəgörünməz adam” mümkün qədər gizli fəaliyyət göstərməli idi. Özü hər nə qədər sirli olsa da, qəhrəmanlıqları düşməni vahiməyə gətirmişdi.Pəncəli Teymurov 24 mart 1981–ci ildə Astara rayonunun Əzərüd kəndində dünyaya göz açıb. Orta məktəbi bitirdikdən sonra hərbi xidmətə yola düşüb.Hərbi xidmətin başa vurduqdan sonra könüllü olaraq xidmətini davam etdirib.1999–cu ildən başlayaraq Xüsusi Təyinatlı Qüvvələrdə gizir kimi xidmət edib. XTQ–də xidmət etdiyi 17 il ərzində özünü çox bacarıqlı bir kəşfiyyatçı kimi göstərib. Dövlət tərəfindən çoxsaylı medallarla təltif olunub. Azərbaycan Respublikasının Prezidenti İlham Əliyev onu “İgidliyə görə”, “Vətən uğrunda” medalı ilə mükafatlandırıb.Pəncəli Teymurov 2016–cı ilin aprel ayının 3–də Lələtəpə yüksəkliyinin azad olunması uğrunda gedən döyüşlərdə qəhrəmancasına şəhid olmuşdur. Pəncəli Teymurovun ən böyük arzusu canından çox sevdiyi vətəni uğrunda şəhid olmaq idi. O, öz toyunda çıxış edərək “Mən hər zaman xalqım üçün, vətənim üçün canımdan, qanımdan keçməyə hazıram. Mən həmişə özümə arzu eləmişəm ki, vətənim üçün şəhid olum, Azərbaycan Respublikasının üç rəngli ay ulduzlu bayrağına bükülü tabutum dəfn olunmağa getsin” demişdi. Bu sözlər şəhidin qəbrüstü abidəsində qeyd olunmuşdu. Bizim gəlişimiz şəhidin atası Nurməmməd Teymurovun 3 mərasiminə təsadüf edirdi. Mərasimdə Dini Qurumlarla İş üzrə Dövlət Komitəsinin Lənkəran bölgəsi üzrə şöbəsinin əməkdaşı Emin Həmidli, Sosial Xidmətlər Agentliyinin 13 saylı filialının müdiri Ramin Hüccətov, İnsan hüquqları üzrə müvəkkilin (Ombudsman) Cəlilabad regional nümayəndəliyinin rəhbəri Ziya İsmayılov, Lənkəran Dövlət Universitetinin nəzdində Sosial və Aqrar–Texnoloji Kollecin ictimaiyyətlə əlaqələr üzrə direktor köməkçisi, tarix üzrə fəlsəfə doktoru Cəmil Quliyev, hüquqşunas Şahin Hüccətov iştirak edirdilər.
Vətəni sevmək imandandır. Vətənimizin müstəqilliyi, torpaqlarımızın azad olunması naminə ölümü gözə alan gənclərimiz bu müqəddəs amal uğrunda şəhid olursa, bu, xalqımızın böyüklüyüdür. Şəhid verməyən xalqın mənliyi olmaz. Şəhid qanı axmayan torpaqdan Vətən olmaz.  Bizim xalqımız Vətəninə, torpağına bağlı qəhrəmanlar yetişdirən xalqdır. İgid qardaşlarımız bu qəhrəmanlığı, mübarizliyi I Qarabağ, aprel döyüşləri, 44 günlük Vətən  müharibəsi zamanı nümayiş etdirdilər. Düşmən təxribatının qarşısını alarkən canından keçən mərd oğullar fəda verdik. Həmin gün onlar düşməni bir addım da irəli buraxmayaraq son damla qanlarına kimi vuruşdular. Qorxu duymadan, ürəklərində böyük Vətən sevgisi ilə qəhrəmancasına döyüşüb şəhid olaraq bir daha sübut etdilər ki, bu xalqın qəhrəmanları yüzlərlə, minlərlədir. Onların ömür yolu gənclərimizə nümunədir. Uşaqdan–böyüyə hər bir vətəndaşımız şəhidlərimizi daim böyük ehtiramla anmalı, onların qəhrəmanlığını örnək bilməli və gələcək nəsillərə təbliğ etməlidirlər. Məqaləni bizə Zəfər sevincini yaşadan, Müzəffər Ali Baş Komandan, Cənab Prezident İlham Əliyevin fikirləri ilə yekunlaşdılrmaq istəyirəm.
Prezident İlham Əliyev :"Biz Birinci Qarabağ müharibəsini də heç vaxt unutmamalıyıq, şəhidləri unutmamalıyıq. O vaxt onlar şəhid oldular, amma torpaqlar da getdi. Bu dəfə şəhid oldular, amma torpaqlar qayıtdı. Fərq budur və təsəlli bu ola bilər. İndi torpaqların yenidən qurulması işinə start vermişik. Azad edilmiş torpaqlarda, indi yaradılan binalarda, evlərdə, məktəblərdə, xəstəxanalarda, o binaların hər bir daşında şəhidlərimizin əbədi təsviri həkk olunub. Onlar bu torpaq üçün həlak oldular, Vətəni hər şeydən üstün tutdular”. Azərbaycanda əsası Ulu öndər Heydər Əliyev tərəfindən qoyulan siyasi xətt bu gün Dövlətimizin başçısı İlham Əliyevin həyata keçirdiyi tədbirlər sayəsində ölkəmizin inkişafına böyük töhfə verib. Vətənimiz uğrunda canlarını qurban vermiş qəhrəman övladlarımızın da əziz xatirəsi ehtiramla anılmalı, Vətən təəssübü, milli və dövlət mənafelərimiz hər zaman uca tutulmalıdır.Allahdan bütün şəhidlərimizə rəhmət diləyirik.

Cəmil Quliyev,
tarix üzrə fəlsəfə doktoru








Baxış sayı: 140


Bölməyə aid digər xəbərlər