Bütün xəbərlər
Hicran Hüseynova: " Müvəkkilin məruzəsində hər bir təklif dəqiq izah olunur və əsaslandırılır"
Tarix: 24-04-2020 18:05 | Bölmə: Siyasət

Sabaha-inamla.Az  Miili Məclisin Ailə, qadın və uşaq məsələləri komitəsinin sədri Hicran Hüseynovanın Azərbaycan Respublikasının İnsan Hüquqları üzrə Müvəkkilin (Ombudsman) 2019-cu il üzrə məruzəsi ilə bağlı fikirlərini və təklifini oxuculara təqdim edir.

Ulu Öndər Heydər Əliyevin müəllifi olduğu Azərbaycan Respublikasının Konstitusiyası qəbul edildikdən sonra, ölkədə bu sahədə demokratik, hüquqi islahatların həyata keçirilməsi və insan hüquqlarının səmərəli təmini məqsədilə institusional mexanizmlər sistemi yenidən qurulmuşdur. İnsan hüquqlarının daha dolğun və səmərəli təmin edilməsi məqsədilə respublikamızda da bir çox inkişaf etmiş demokratik ölkələrdə olduğu kimi Ulu Öndərimiz tərəfindən hüquqi dövlətin mühüm atributlarından sayılan Ombudsman institutu təsis edilmişdir. Cənab Prezident İlham Əliyevin insanların hüquq və azdlıqlarının təmin edilməsi, onların sağlamlıqlarının qorunması, sosial vəziyyətlərinin yaxşılaşdırılması istiqamətində gördüyü işlər, verdiyi fərman və sərəncamlar bu cür təsisatların fəaliyyətini daha da genişləndirir. Düşünürəm ki, hörmətli Ombudsmanımız Səbinə xanım qısa bir vaxtda öz bilik və bacarığı, işgüzarlığı ilə Ombudsmanlıq İnstitutunun işini hörmətli Elmira Süleymanovanın vaxtında olduğu kimi peşəkarlıqla aparır. Elə Ombudsmanın bugünkü məruzəsi də buna əyani sübutdur.
Mən Ombudsmanın 2019-ci il üzrə illik məruzəsi ilə tanışam. Bu illik məruzə təkmil, əhatəli hazırlanmışdır, eyni zamanda məruzədə xeyli təkliflər də irəli sürülmüşdür. Əlbəttə, hesabatın əhatəli, geniş olması həm Ombudsmanın fəaliyyəti, həm də ötən il neqativ hallara qarşı mübarizənin gücləndirilməsi ilə əlaqədar insan hüquq və azadlıqlarının müdafiəsi istiqamətində kompleks tədbirlərin həyata keçirilməsi ilə bağlıdır. Hesabatdan da göründüyü kimi Ombudsman təsisatına inam və etimadın göstəricisidir ki, bu quruma daxil olan müraciətlərın sayı xeyli yüksək olmuşdur. Xüsusilə, Müvəkkilin təşəbbüsü ilə “Uşaq hüquqları aylığının” keçirilməsi, uşaqların sağlamlığı, reabilitasiyası və onların təhsili, zorakılıq qurbanı olan şəxslərə dəstək verilməsi, ana və uşaq ölümünün habelə qüsurlu uşaqların dünyaya gəlməsinin qarşısının alınması ilə bağlı, o cümlədən qadın hüquqları ilə bağlı görülən işlər və irəli sürülən xeyli təkliflər hesab edirəm ki, diqqətəlayiqdir. Müvəkkilin məruzəsində hər bir təklif dəqiq izah olunur və əsaslandırılır,  insan hüquqlarının daha etibarlı qorunması mexanizminin yaradılmasına yönəlmişdir.
Bildiyimiz kimi, cənab Prezidentin qanunvericilik təşəbbüsü ilə Parlament “Uşaqların zərərli informasiyalardan qorunması haqqında” Qanun qəbul etmişdir. Qanunun əsas məqsədi müasir dünyada sərhədsiz şəkildə yayımlanan zərərli informasiyalardan uşaq və yeniyetmələri qorumaq, onların sağlamlığına və inkişafına vuracaq ziyan və təhlükənin qarşısını almaqdır. Bilirsiniz ki, “təhlükəsiz internet” problemi artıq bütün dünyanı düşündürür. Xüsusilə, təcrübəsi, informasiyası az olan, düşünmək qabiliyyəti o qədər də yetkin olmayan uşaqlara qarşı virtual aləmdə zorakılıq əlamətləri geniş yayılmaqdadır. Bu baxımdan təklif edirəm ki, Ombudsman İnstitutu uşaq zorakılığının və əməyinin istismarının qarşısının alınmasında həm maarifləndirici, həm də nəzarət mexanizmini gücləndirsin. Çünki bu istiqamətdə icrası tələb olunan yetərincə qanunvericilik aktlarımız vardır.
 O cümlədən, Azərbaycan dövlətinin diqqətində olan mühüm məsələlərdən biri də ailə institutunun möhkəmləndirilməsidir. Hazırda ölkəmizdə iki milyondan çox ailə vardır. Xalqımız hər zaman ailə dəyərlərini, ailə ləyaqətini hər şeydən uca tutmuş və bu bizim milli adət-ənənəyə çevrilmişdir. Konstitusiyamızda, Ailə Məcəlləsində ailə-nikah məsələləri ilə bağlı normalar beynəlxalq hüquqi sənədlərlə uyğunluq təşkil edir. Ölkəmizin birinci vitse-prezidenti hörmətli Mehriban xanım Əliyevanın təşəbbüsü ilə “Gender bərabərliyinin təmin edilməsi”, “Məişət zorakılığının aradan qaldırılması haqqında” Azərbaycan Respublikasının Qanunları qəbul edilmişdir. Hazırda, ölkəmizdə ailələrin rifahının daha da yaxşılaşdırılması istiqamətində olduqca mühüm tədbirlər həyata keçirilir.
Lakin bu gün dünyada olduğu kimi ölkəmizdə də boşanmaların sayının yüksək olması hər birimizi narahat edən problemdir. Təəssüflər olsun ki, bağlanan hər 5-6 nikahdan biri boşanma ilə nəticələnir. Bu da özlüyündə bir sıra sosial problemlərin ortaya çıxmasına gətirib çıxarır. Maraqlı da budur ki, boşanmaların səbələri sırasında ən çox xasiyyətlərin uyğun olmaması göstərilir. Mövcud qanunvericilikdən irəli gələrək məhkəmlər hər bir halda nikaha xitam verməyə məcburdurlar. Və beləliklə tək valideynli və rifahı alimentdən asılı olan uşaqların, çarəsiz vəziyyətdə qalan anaların, valideynlərin məsuliyyətsizliyi səbəbindən icra olunmayan məhkəmə qərarlarının sayı artır. Bütün bunların qarşısının alınması üçün bir sıra ölkələrin təcrübəsindən yararlanaraq ailə-nikah məsələləri ilə bağlı qanunvericiliyin təkmilləşdirilməsinə, ailə məhkəmlərinin yaradılmasına və yaxud ancaq ailə mübahisələri üzrə ixtisaslaşmış hakimlərin müəyyən edilməsinə böyük ehtiyac vardır. Bu məsələ bir çox MDB ölkələrində də aktualdır. Ailə mübahisələrinin qəlizliyindən və sosial əhəmiyyətindən irəli gələrək ailə mübahisələri üzrə xüsusi ixtisaslaşmış hakimlərin müəyyən ediloməsi prosesinə başlanılmışdır.
Hesabatdan göründüyü kimi ölkəmizdə ailə-məişət problemləri, o cümlədən uşaq və qadın hüquqlarının pozulması halları hələ də mövcuddur. Xüsusilə, yeniyetmələrin yaxud azyaşlı qızların ərə verilməsi, onların təhsildən yayındırılması faktları hələ də müzakirə mövzusudur. Bu baxımdan, mən də Ombudsmanın illik məruzəsindəki "Qadın zorakılığının müdafiəsi və gender bərabərliyinin təmin edilməsi"bölməsindəki sonuncu təklifi ilə qismən razıyam. Və təkif edirəm ki, nigah yaşının aşağı salınma səbəbləri Ailə Məcəlləsində göstərilsin. Qanunvericilikdə bu səbəblərin siyahısı göstərilməyib, nigah yaşının bir yaş aşağı salınması məsələsi tamamilə yerli icra hakimiyyətinin mülahizəsinə buraxılıb. Bu isə müəyyən sui-istifadə hallarına yol aça bilir. Ona görə də nigah yaşının aşagı salınması səbəbləri məcəllədə göstərilməlidir.
Ombudsman tərəfindən görülən işləri yüksək qiymətləndirirəm və qeyd olunan illik məruzəni qənaətbəxş hesab edirəm.


Baxış sayı: 787


Bölməyə aid digər xəbərlər