"Hər bir azərbaycanlı anlamalıdır ki, xaricdə ölkə əleyhinə çıxış edən kimi, ermənilər bundan sui-istifadə edirlər. Ona görə də Avropada prezidentə və dövlətə qarşı çıxış edən azərbaycanlılar öz əməllərindən əl çəkməlidir”. 
Bu sözləri Sfera.az-a açıqlamasında Milli Məclisin Azərbaycan-Fransa parlamentlərarası əlaqələr üzrə işçi qrupunun sədri, deputat Rauf Əliyev bildirib. Rauf Əliyev deyib ki, xaricdə Azərbaycan əleyhinə iş aparan şəxslər ermənilərin əlinə əsas verir:
"Ermənilər hər dəfə beynəlxalq təşkilatlarda bizə yalandan bəhanə gətirir ki, guya Qarabağ erməniləri Azərbaycanda qeyri-demokratik vəziyyət olduğu üçün Azərbaycana birləşmək istəmir. Ona görə də xaricdə Azərbaycan əleyhinə qarayaxma kampaniyası aparan şəxslərə çağırış edirəm ki, əl çəkin bu pis əməllərinizdən. Çünki siz bu əmməllərinizlə Azərbaycanın dövlət maraqlarına ziyan vurursunuz, Dağlıq Qarabağ münaqişəsinin həllinə mənfi təsir göstərirsiniz və sairə. Siyasi mübarizəni dinc və əxlaq normalarına uyğun aparmaq lazımdır. Heç indiyədək kimsə görübmü ki, xaricdəki ermənilər nə zamansa Serj Sarkisyanın fotolarını əllərinə götürüb, onu təhqir etsinlər? Xeyr, ermənilər mübarizəni aparanda belə onu ölkə daxilində aparırlar. Bu gün Ermənistanda kütləvi etirazlar mövcuddur, insanlar polis tərəfindən tutulur, şərlənir. Ancaq ermənilər bunu ölkə xaricində çıxarmırlar". Deputat dünyanın hər yerində mitinq iştirakçılarının polis tərəfindən həbs edildiyini söyləyib:
"Bu gün əksər insanlarımız Avropa ölkələrinə gedib-gəlir. Hər kəs orada mitinq iştirakçılarının polis tərəfindən necə dağıdıldığını yaxşı bilir. Azərbaycan dövləti həmin Avropa ölkələrindən daha çox sərbəst toplaşma azadlığını təmin edir. Ona görə də mən çağırış edirəm ki, bütün tanınmış və görkəmli ziyalılarımız, ictimaiyyət nümayəndələri, deputatlar və jurnalistlər xaricdə Azərbaycan dövləti əleyhinə qarayaxma kampaniyası aparan şəxslərin əməllərinə sərt münasibət bildirməli, onları bu əməllərindən geri çəkindirməlidir. Onlara göstərmək lazımdır ki, söyüş və təhqirlə mübarizə aparmaq düzgün yol deyil. Bu cür hallar ancaq bizi geri atar”.
Rauf Əliyev xarici ölkələrdə Azərbaycan əleyhinə kampaniya aparan şəxslərin fəaliyyət göstərdiyi ölkələrlə də sıx iş aparılmasının vacibliyini vurğulayıb:
"Həmin ölkələrin səfirliklərinə, Parlamentlərarası Dostluq Qrupu üzvlərinə, Azərbaycanın xaricdəki diaspora üzvlərinə çatdırmaq lazımdır ki, həmin şəxslərin əməlləri cinayət xarakteri daşıyır. Buna imkan vermək olmaz. Bu gün heç kəs deyə bilməz ki, filan ölkədə problem yoxdur. ABŞ-ın özündə belə çatışmamazlıqlar mövcuddur. Hər bir ölkədə olduğu kimi, Azərbaycanda da müəyyən çatışmazlıqlar var. Ancaq onun həlli istiqamətində dövlətin iradəsi var. Dövlət zaman-zaman ortaya çıxan problemləri aradan qaldırır. Ona görə də problemlərin həllinə dinc yollarla nail olmaq lazımdır. ABŞ-da Ağ Evin qarşısında da mitinqlər olur. Amma onlar gəlib dinc şəkildə mitinq keçirib, çıxıb gedirlər. Biz hər zaman nəzərə almalıyıq ki, Azərbaycanın Ermənistan kimi işğalçı düşməni var. Hər birimiz də əməllərimizə ona görə diqqət etməliyik. Elə etməliyik ki, düşmən sevinməsin”.