Bütün xəbərlər
İstintaq Komitəsi: Basayev və Xəttab dəstəsinin daha iki üzvünə hökm oxunub
Tarix: 04-07-2025 11:21 | Bölmə: Karusel

1999-cu ildə Şimali Qafqazda hərbçilərə hücumda əli olan Basayev və Xəttab dəstəsinin daha iki üzvünə hökm oxunub.

Sabaha-inamla.az rus mətbuatına istinadən xəbər verir ki,  bu barədə Rusiya Federasiyası İstintaq Komitəsinin rəsmi nümayəndəsi Svetlana Petrenko məlumat verib.
Göstərilir ki, Vaxit Həmzətxanov və Tahir Begeldiyev “Dəstədə iştirak”, “Silahlı iğtişaş” və “Hərbi qulluqçuların həyatına qəsd” maddələri ilə cinayət törətməkdə təqsirli biliniblər.
İstintaqın məlumatına görə, təqsirləndirilən şəxslər 1999-cu ildə Şamil Basayev və Əmir Xəttabın rəhbərlik etdiyi dəstəyə könüllü qoşulublar. Cinayətkar birlikdə Xamzatxanov və Begeldiyev Xəttabın göstərişi ilə Çeçenistanda Rusiya Müdafiə Nazirliyinin hərbçilərinə silahla hücum ediblər, nəticədə 15 hərbçi həlak olub, daha 28 nəfər yaralanıb.
“Cənub Dairə Hərbi Məhkəməsinin hökmü ilə Həmzətxanov 24 və Begeldiyev 21 il müddətinə azadlıqdan məhrum ediliblər”, - Petrenko bildirib.
O, bildirib ki, Həmzətxanov və Begeldiyev cəzalarını ciddi rejimli cəzaçəkmə müəssisəsində çəkəcəklər.
Mayın sonunda Rusiya Federal Təhlükəsizlik Xidməti 1999-2000-ci illərdə Şimali Qafqazda rus hərbçilərinə qarşı hücumlarda iştirakda ittiham olunan Basayev və Xəttab dəstəsinin dörd yaraqlısının həbs olunduğunu bildirib. Həbslər Dağıstan, Stavropol, İnquşetiya və Həştərxan vilayətində aparılıb.
Basayev və Xəttab dəstəsi İkinci Çeçen müharibəsi zamanı Çeçenistan və Dağıstanda fəaliyyət göstərib. Cinayətkar qrup 2002-ci ildə Dubrovka Teatrının ələ keçirilməsi də daxil olmaqla bir neçə böyük terror aktı törədib.



Baxış sayı: 27


Bölməyə aid digər xəbərlər