Ələt Azad İqtisadi Zonasının yaradılması ölkəmizin perspektiv inkişafına əsaslanan olduqca mühüm layihədir. Belə ki, ölkəmizdə qeyri-neft sektorunun inkişafı dövlət siyasətinin prioritet istiqamətlərindən biri olaraq müəyyən edilib. Xarici sərmayədarların portfellərində əsas yeri neft və qaz sahəsinə sərmayənin qoyulması tutsa da, iqtisadi zonanın yaradılması nəticəsində, eyni zamanda iqtisadi əlaqələrin daha da genişləndirilməsi mümkün olacaq. Dövlət tərəfindən iqtisadiyyata göstərilən xüsusi marağın nəticəsi olaraq yaranacaq yeni iqtisadi model öz üstünlüyünü qısa zamanda göstərəcək. Ələt Azad İqtisadi Zonasının 60 hektarında layihələndirmə başa çatıb və inşaat işləri başlayıb, infrastruktur yaradılır.
Bu fikirləri AZƏRTAC-a açıqlamasında Milli Məclis sədrinin müavini, Gənclər və idman komitəsinin sədri Adil Əliyev söyləyib.
Azad İqtisadi Zonanın Ələtdə yaradılması ilə bağlı vacib məqamlara diqqət çəkən A.Əliyev deyib: “İlk növbədə, Şərq-Qərb dəhlizi, Şimal-Cənub dəhlizi Ələt qəsəbəsindən keçdiyi üçün iqtisadi zonanın yerləşdiyi ərazi olduqca strateji və mühüm məntəqədir. İkincisi, Ələt qəsəbəsində böyük boş torpaq sahəsi mövcuddur. Bu torpaq sahələri kənd təsərrüfatı üçün tam yararsız olduğundan, burada iqtisadi zonanın yaradılması ilə həmin ərazinin səmərəli istifadəsinə şərait yarandı. Üçüncüsü, Ələt Azad İqtisadi Zonasının yerləşdiyi ərazidə, həmçinin Bakı Beynəlxalq Dəniz Ticarət Limanı yerləşir. Bu da Azad İqtisadi Zonanın səmərəli fəaliyyətinə mühüm töhfə olacaq. Bundan əlavə, Ələt qəsəbəsinin Bakıya yaxın olması proseslərlə daha çevik reaksiya verilməsini və uğurlu koordinasiyanı təmin edəcək”.
Ələt Azad İqtisadi Zonasının qurulmasının, eyni zamanda, ölkəmizin biznes mühitinin daha da sağlamlaşdırılmasına şərait yaradacağını bildirən Milli Məclis sədrinin müavini qeyd edib ki, hazırda pandemiya dünya iqtisadiyyatına olduqca böyük ziyan vurub. Bir çox ölkələrin iqtisadi tarazlığın pozulması səbəbindən böyük miqdarda borcu yaranıb və onlar bunu kompensasiya etmək üçün Dünya Bankı da daxil olmaqla, bir sıra nüfuzlu beynəlxalq maliyyə qurumlarından yardım alıblar. Lakin ölkəmizin iqtisadi potensialının artması nəticəsində Azərbaycan pandemiya ilə mübarizədən üzüağ çıxmağı bacardı, üstəlik, 30-dan çox ölkəyə və bir sıra beynəlxalq təşkilatlara maliyyə yardımı da göstərdi.
Azad İqtisadi Zonanın fəaliyyətə başlamasının ölkə iqtisadiyyatına böyük canlanma gətirəcəyini vurğulayan A.Əliyev bildirib ki, bu sahədə atılacaq addımlar dövlətimizin başçısı tərəfindən dəqiqliklə hesablanıb, ilk növbədə, Ələt Azad İqtisadi Zonasının yaradılması və fəaliyyətinin təşkili haqqında müvafiq sənəd imzalanıb. Sonra həmin sənədin icrasının təmin edilməsi məqsədilə “Ələt Azad İqtisadi Zonası haqqında” Azərbaycan Respublikasının Qanunu qəbul olunub.
“Qeyd etməliyik ki, xarici investorların cəlb edilməsi məqsədilə bu sahədə qanunvericilik bazası tam formalaşdırılıb və iqtisadi zonanın fəaliyyət qaydaları ilə tanışlıq hamı üçün əlçatan olub. Eyni zamanda, ölkəmizdə çox gözəl investisiya iqlimi var ki, bu da Azərbaycana kifayət qədər böyük sərmayələrin cəlb ediləcəyini proqnozlaşdırmağa imkan verir. Bu gün iqtisadiyyatımız dinamik şəkildə inkişaf edir və Dünya Bankının “Doing Business” hesabatında Azərbaycan 190 ölkə arasında 28-ci yerə layiq görülüb. Bu sahədə qazanılmış uğurlar investorlarda böyük maraq yaratmaqla yanaşı, onların ölkəmizə sərmayə qoymasına əlavə stimul verir. Ən mühüm faktlardan biri - ölkəmizdəki təhlükəsiz mühit xarici investorların cəlb edilməsi üçün əsas məqamlardan biridir. Azərbaycanın nəinki regionun, həmçinin dünyanın ən güclü ölkələrindən biri olması, habelə təhlükəsizliyin ən yüksək səviyyədə təmin edilməsi ölkəmizin həm də qüdrətinin göstəricisidir”, - deyə A.Əliyev əlavə edib.