“Vaksinlərlə bağlı Rusiya ilə sənədlər imzalansa da...”
Tarix: 26-02-2021 18:04 | Bölmə: Sosial

                     “Vaksinlərlə bağlı Rusiya ilə sənədlər imzalansa da...”


“Rusiya ilə ilk günlərdən etibarən “Sputnik” və “AstraZeneca” peyvəndlərinin tədarükünə dair müvafiq sənədlər imzalanıb. Belə ki, Rusiya bu vaksinin distribüteridir. Ancaq bu vaksinlər hələ ki, bizə gəlib çatmayıb”.
“Qafqazinfo” xəbər verir ki,  bu barədə Prezident İlham Əliyev bu gün yerli və xarici jurnalistlər üçün videoformatda keçirdiyi mətbuat konfransında bildirib.
“Bizdə olan məlumata görə, “Sputnik V” vaksini hələ ki, yerli tələbatı qarşılamaqdadır. Bu vaksinlərdən xarici ölkələrə çox məhdud sayda çatdırılıb. “CoronaVac” vaksininə gəldikdə isə, 4 milyon doza tədarükə dair müqavilə bağlanıb. Hazırda hər gün 15-20 min insan vaksin olunur. Bu istiqamətdə biz bütün imkanlardan istifadə edəcəyik, bu sahəyə müvafiq maliyyə vəsaitləri də ayrılıb. Sadəcə istehsalçılardan vaksinləri gözləyəcəyik”.
Dövlət başçısı dünyada vaksin alışında ədalətsizliyə yol verildiyini də diqqətə çatdırıb:
“Vaksinlərlə bağlı bir məsələyə münasibət bildirmək istəyirəm, hansını ki, Qoşulmama Hərəkatının sədr ölkəsi kimi biz beynəlxalq səviyyədə də qaldırmışdıq. Bizim təşəbbüsümüz ilə BMT Baş Assambleyasının “COVID-19”a həsr olunmuş xüsusi sessiyası keçirildi. Təşəbbüs 150-dən çox ölkənin dəstəyini aldı. Bu sessiya keçən ilin dekabrında baş tutdu. 
Səsləndirdiyim tezislərdən biri peyvəndlərin dünya ölkələri arasında ədalətli bölgüsü ilə bağlı idi. Ki, dünyada bu məsələdə proteksionist və millətçi yanaşma olmasın. Ancaq təəssüf ki, biz fərqli mənzərənin şahidiyik. Biz görürük ki, hətta müttəfiqlər arasında problemlər yaranır. Kim nə qədər vaksin istifadə edib, kim kimə nə qədər verməyib, saymağa başlayıblar. Bu vəziyyət bir daha göstərir ki, ortaq mübarizə ilə bağlı bütün həmrəylik bəyanatlarına baxmayaraq, praktikada tamamilə əksini görürük. Bir sıra ölkələr lazım olandan 3-4 dəfə çox vaksin alıblar, məsələn Kanada. Bu o deməkdir ki, kiməsə çatmayacaq. Amma onlara axı bu qədər lazım deyil. Ancaq onlar sözlərdə bərabərlikdən, insan hüquqlarından və demokratiyadan danışırlar. Praktikada isə milyonlarla insanların haqlarına girirlər. Kasıb ölkələrdə yaşayan insanların haqlarına!
Mən sizə açıq deyirəm, əgər biz bütün istehsalçılarla razılaşma əldə etməsəydik, bu gün biz də peyvəndsiz qalardıq. Biz “AstraZeneca”nı çoxdan əldə etməliydik, əldə etmədik. Artıq bir neçə aydır. “Sputnik” peyvəndini əldə etmədik. “Covax” xətti ilə “Pfizer” və “Moderna” vaksinlərini əldə etməliydik, əldə etmədik. Və bizə bunları nə vaxt əldə edəcəyimizi demirlər. Yaxşı ki, bizim çinli tərəfdaşlarımız öz öhdəliklərini yerinə yetirirlər”.


Baxış sayı: 104


Bölməyə aid digər xəbərlər