11:42 / 03-07-2022
Biz teatrı niyə sevmirik?
İlham Əliyev beynəlxalq konfransda çıxışı ilə bir daha sübut etdi ki, Azərbaycan dünya üçün çox vacib ölkədir-Kamilə Əliyeva
Tarix: 02-05-2022 14:20 | Bölmə: Siyasət


    Dünyanın böyük siyasi xadimləri, qabaqcıl siyasi araşdırmalar və beyin mərkəzlərinin nüfuzlu ekspertləri Prezident cənab İlham Əliyevin dünyada gedən prosesləri dərindən bilən, dərin təfəkkürə malik, qətiyyətli və güclü siyasətçi liderə xas xüsusiyyətlərə malik bir şəxs olduğunu vurğulayırlar. Doğrudan da Azərbaycan xalqı xoşbəxt xalqdır ki, onun İlham Əliyev kimi bir lideri var.
    Aprelin 28-də Şuşada işinə başlayan və Bakıda davam edən "Cənubi Qafqaz: inkişaf və əməkdaşlıq" mövzusunda keçirilən beynəlxalq konfransda ölkə başçımız cənab İlham Əliyev post müharibə dövründə regionda yaranmış yeni reallıqlar, geosiyasi vəziyyət, dünyada baş verən siyasi proseslər, Azərbaycanla Ermənistan arasında münasibətlərin normallaşdırılmasına dair Azərbaycan tərəfinin irəli sürdüyü təşəbbüslər və beynəlxalq qurumların münasibətlərin tənzinməsində oynadıqları rol barədə xarici ekspertlərin çoxsaylı suallarını cavablandırdı. Üç saata gədər davam edən bu görüşdə cənab İlham Əliyevin çıxışı bir çox xarici KİV- lərdə dərc olundu.
    Ölkə başçımız hər çıxışında olduğu kimi, bu dəfə də, dünya ictimaiyyətinin diqqətini 30 illik işğal dövründə Ermənistanın Azərbaycanın əzəli torpaqları olan Qarabağ və Zəngəzurda törətdikləri vəhşiliklərə yönəltdi. Bütün şəhər və kəndlərimizi yerlə yeksan etməklə yanaşı Ermənistan hökuməti Kəlbəcər, Laçın, Şuşa və Zəngilan rayonlarında qeyri qanuni məskunlaşma proqramları həyata keçirmişdilər. Təəssüflər olsun ki, beynəlxalq qurumlar buna da göz yummuşdular.
    Vətən müharibəsindəki gələbəmizdən sonra regionda yeni reallıqlar yarandı. Beynəlxalq konfransda ölkə başçımız bir daha Azərbaycan dövlətinin regionda sülhün bərqərar olmasını, Azərbaycan xalqının əmin-amanlıq və mehriban qonşuluq şəraitində yaşamaq istəyini vurğuladı. Azərbaycanla Ermənistan arasında sülh sazışının bağlanması üçün Azərbaycan dövləti beş prinsipdən ibarət təklif irəli sürmüşdü. Ermənistan hökuməti də bu prinsipləri gəbul etdiklərini bəyan etmişdir. Eyni zamanda Ermənistan tərəfi bu prinsiplərə əsaslanaraq Azərbaycanla sərhədlərin delimitasiya proseslərinin başlanması üçün birgə işçi qrupunun yaradılmasına da razılıq vermişdir. Bu 30 ildə Ermənistan tərəfindən gələn ən pozitiv xəbər oldu. Azərbaycanla Ermənistan dövlətləri arasında bağlanacaq sülh müqaviləsi Cənubi Qafqazla yanaşı regionun digər dövlətlərinin də inkişafına böyük təsir göstərəcək.
    Cənab İlham Əliyev çıxışında Qarabağda yaşayan ermənilərin Azərbaycan dövlətində özlərini təhlükəsiz və rahat yaşaya biləcəkləri barədə mesaj verdi. Ermənilər Azərbaycanda gözəl və firavan yaşamaq istəyirlərsə ilk növbədə separatizm meylərinə son qoymalı və Azərbaycanın qanunlarına riayət etməlidirlər. Ermənilər anlamalıdırlar ki, yaxın vaxtlarda yüz minlərlə azərbaycanlı öz torpaqlarına qayıdacaq və onlar azərbaycanlılarla qonşuluq şəraitində yaşamalı olacaqlar.
Bu gün Qarabağda böyük quruculuq işləri aparılır. Ərazilərin elektrik enerjisi ilə təminatı təmamilə yenilənir. İşğal dövründə ermənilər Qarabağ və Şərqi Zəngəzurda 30-dək su elektrik stansiyalarını təmamilə dağıtmışdılar. Artıq bütün regionu birləşdirən elektrik şəbəkəsi yaradılmışdır. İşğal dövründə ermənilər həmçinin Qarabağda Azərbaycan xalqına məxsus mədəni irsi də tamamilə dağıtmışdılar. Dünyada mədəni irsin qorunması missiyasını öz üzərinə götürmüş UNESKO buna laqeyd münasibət göstərmiş və "siyasi məsələlərə qoşulmamaq" bəhanəsilə həmin ərazilərə missiya göndərməkdən imtina etdilər. Torpaqlarımız işğaldan azad edildikdən sonra bu təşkilat fəallaşaraq "erməni tarixi irsi"-nin müdafiəsinə qalxdılar. Bu ikili standartların ən bariz nümunələrindən biridir.
    Cənab İlham Əliyev görüşdə Qətnamələr qəbul edən BMT TŞ-nın üç daimi üzvünün həmçinin ATƏT in Minsk qrupunun həmsədrləri olduqlarını da vurğuladı. Minsk qrupunun həmsədrləri münaqişənin həll edilməsində heç bir səmərəli iş görmədi. İşğalın davam etməsini Ermənistan və Minsk qrupu özləri üçün məqbul hesab edirdi, amma Azərbaycan dövləti heç vaxt işğalla barışmayacağını vurğulayırdı.
Prezident cənab İlham Əliyev torpaqlarımızın işğaldan azad edilməsi üçün ordu quruculuğuna xüsusi diqqət ayırırdı. Ölkə başçımız hər zaman vurğulayırdı ki, güclü orduya sahib olmaq üçün ölkəmizin iqtisadiyatı yüksəlməli və dayanıqlı iqtisadi gücümüz olmalıdır. Müharibədə qalib gəlməyimizin ən əsas şərtlərindən biri də gənc nəslin vətənpərvər ruhda yetişməsi oldu. Son 18 ildə Azərbaycanda elə bir nəsil yetişdiki torpaqlarımızı işğaldan azad etmək üçün ölümə belə getdilər. Ölkə başçımız xaricdə, xüsusən Fransada yaşayan güclü erməni diasporunun regionda sülhün yaranmasına böyük maniələr törətdiyini də hər kəsin diqqətinə çatdırdı. Fransada müəyyən hakim qüvvələr Azərbaycana qarşı qərəzli mövqe nümayiş etdirirdi. Halbuki Azərbaycan dövləti Fransa ilə münasibətlərin normal olmasına böyük əhəmiyyət verir.
    Bu gün Azərbaycanla qonşu Gürcüstan dövləti arasında ikitərəfli və beynəlxalq səviyyədə sıx əməkdaşlıq mövcuddur. Lakin Ermənistan üçtərəfli və beynəlxalq normalara söykənən əlaqələr qurmağa səy göstərmir. Ermənilər başa düşməlidirlər ki, bu regionda onlar təkbaşına, təcrid halında yaşaya bilməzlər. Ermənistan Azərbaycan və Türkiyəyə qarşı ərazi iddialarından əl çəkməli və üçtərəfli əlaqələrin qurulmasında maraqlı olmalıdılar.
    Azərbaycan dəfələrlə beynəlxalq təşkilatların dəstəyi ilə Ermənistanla ikitərəfli əlaqələrin qurulması təklifini irəli sürmüşdür. Azərbaycan tərəfinin xarici işlər nazirləri səviyyəsində, ekspertlərin görüşlərinin keçirilməsi, daha sonra vətəndaş cəmiyyəti səviyyəsində görüşlərin təşkil edilməsi təklifini Ermənistan tərəfi gəbul etməmişdir.
Cənab İlham Əliyev görüşdə Azərbaycan - Rusiya, Azərbaycan - Türkiyə əlaqələrinə, eləcə də hər iki dövlətin Azərbaycanla Ermənistan arasında münasibətlərin normallaşdırılmasında mühüm rol oynadıqlarına da toxundu. Azərbaycanla Rusiya arasında müttəfiqlik qarşılıqlı fəaliyyət haqqında Bəyannamənin olması Azərbaycanın strateji maraqlarına əsaslanır. Rusiya Azərbaycanla qonşu dövlətdir və Qarabağ müharibəsindən sonra Rusiya Sülhməramlı qoşunları Qarabağda yerləşdirilib. Eyni zamanda Azərbaycanla Rusiya arasında uzunmüddətli iqtisadi əlaqələr mövcuddur və ölkəmiz Rusiyadan böyük həcmdə bazar qiymətlərinə silah alırdı. Ermənistan dövləti isə silahları pulsuz alırdı. Azərbaycanla Türkiyə arasında mədəniyyət paytaxtımız olan Şuşa şəhərində "Müttəfiqlik haqqında" Bəyannamə imzalanmışdır. Bu Bəyannamə hər iki dövlət arasında tarixən mövcud olan dostluğun və qardaşlığın rəsmiləşdirilməsi idi.
    Bu gün Qarabağda Türkiyə - Rusiya Monitorinq Mərkəzi fəaliyyət göstərir. Eyni zamanda Rusiya ilə Türkiyə arasında mövcud münasibətlər də nəzərə alınmalıdır. Türkiyə Prezidenti Rəcəb Tayyib Ərdoğan Ukraynada atəşkəsin əldə olunmasında vasitəçilik edir. Azərbaycan qonşu dövlətlərlə - Rusiya, Türkiyə, Gürcüstan və İranla çox sıx əlaqələr qurmuşdur. Bundan əlavə Azərbaycanın beynəlxalq qurumlarla da əlaqələri yeni mərhələyə qədəm qoymuşdur. Bu gün Azərbaycanla Avropa İttifaqı arasında sıx münasibətlər mövcuddur. Avropa İttifaqı Azərbaycanla Ermənistan arasında münasibətlərin normallaşdırılmasında, eləcə də sərhədlərin delimitasiya istiqamətində mühüm rol oynayır. BMT, ATƏT, QH, Aİ kimi nüfuzlu beynəlxalq təşkilatlar Azərbaycanın bölgədə yaratdığı reallığı gəbul edib. Cənab İlham Əliyev müharibə bitdikdən sonra ermənilərin bu ərazilərdə basdırdıqları minaların böyük insan tələfatına səbəb olduğunu xüsusi vurğuladı. Təəssüflər olsun ki, beynəlxalq təşkilatlar bu gün də ərazilərin minalardan təmizlənməsinə Azərbaycana lazımı dəstək göstərmir.
     Azərbaycan dövləti beynəlxalq iqtisadi layihələrdə çox fəal iştirak edir. Bugünkü çətin günlərdə Azərbaycanın Avropanın enerji təhlükəsizliyində oynadığı rol hər kəsə bəllidir. Azərbaycanın təbii qazı Cənub Qaz Dəhlizi vasitəsilə Türkiyəyə, Gürcüstana, Yunanıstana, Bolqarıstana və İtaliyaya ixrac olunur.
     Azərbaycan şərq-qərb nəqliyyat qovşağının yaradılmasında çox böyük işlər görüb. Məhz bu nəqliyyat dəhlizinin yaradılması dövlətlərarası yükdaşımanın həcminin artması ilə yanaşı, vaxta və maliyyə məsrəflərinin azalmasına səbəb olub. Bu gün Azərbaycan şimal-cənub nəqliyyat infrastrukturunun da fəaliyyət göstərməsində fəal rol oynayır.
Cənab İlham Əliyev aprelin 29-da "Cənubi Qafqaz: Inkişaf və əməkdaşlıq" mövzusunda beynəlxalq konfransda çıxışı ilə bir daha sübut etdi ki, Azərbaycan dünya üçün çox vacib ölkədir.

Kamilə Əliyeva,
Milli Məclisin deputatı, professor



Baxış sayı: 156


Bölməyə aid digər xəbərlər