16:29 / 21-04-2021
Stadnik yarımfinalda
11:04 / 21-04-2021
Ramiq Muxtar vəfat etdi
"Bütün bunlar erməni xislətinin əsl mahiyyətini göstərdi" - Deputat
Tarix: 02-03-2021 23:43 | Bölmə: Müsahibə

“Bütün bunlar erməni xislətinin əsl mahiyyətinin nədən ibarət olduğunu dünyaya göstərdi. Hesab edirəm ki, ermənilər bu durumdan lazımi nəticə çıxarmasalar, gələcəkdə onların dövlətçiliyi təhlükə altında olacaq”.
Bu sözləri e-huquq.az-a açıqlamasında Milli Məclisin deputatı Nəsib Məhəməliyev deyib. Onun sözlərinə görə, İrəvandakı çaxnaşmaların kökündə 44 günlük Vətən müharibəsində Azərbaycan Ordusunun Ermənistan ordusunu darmadağın etməsi durur.
“Uzun illər bütün ölkələrdə erməni lobbisi və diasporası tərəfindən aparılmış saxta təbliğat nəticəsində yaranmış “məğlubedilməz” erməni mifi heç bir tarixi faktlara söykənmir. Dünya erməniliyi qısa zaman kəsiyində Müzəffər Azərbaycan Ordusu tərəfindən məğlub edildiklərini qəbul etmək istəmir. Bu baxımdan revanşist qüvvələr, 17 siyasi partiya birləşərək məğlubiyyətdə Paşinyan iqtidarını günahlandırır. Paşinyan da öz növbəsində generalları, Ermənistan ordusunun rəhbərliyini və onlara himayədarlıq edən özündən əvvəlki cinayətkar “Qarabağ klanı” nın nümayəndələrini, Robert Kaçaryanı, Sers Sarkisyanı ordunu dağıtmaqda və onu lazımi səviyyədə qurmamaqda, silah alınması üçün ayrılan vəsaitlərin korrupsiya yolu ilə mənimsəməkdə, keyfiyyətsiz silahlarla təmin olunmasında, ordunun döyüş hazırlıqlarını təşkil etməməkdə günahlandırır”, - deyə deputat bildirib.
O qeyd edib ki, bu qarşılıqlı ittihamlar Ermənistan ictimai-siyasi həyatını iflic vəziyyətinə gətirib çıxarıb. Əgər, ermənilər bu durumdan lazımi nəticə çıxarmasalar, gələcəkdə onların dövlətçiliyi təhlükə altında olacaq.
“Onlar bu biabırçı məğlubiyyətdən nəticə çıxarmaq, tarixi mifik yalanlardan imtina etmək, dövlət quruculuğunu və qonşu ölkələrlə normal münasibətləri formalaşdırmaq əvəzinə, yenə də köhnə siyasətlərini davam etdirməyə çalışırlar. Dünənki proseslərdə də gördük ki, çox acınacaqlı vəziyyətdə yəhudi millətini təhqir edirdilər. Hətta İkinci Dünya müharibəsində Hitler kimi faşistin yəhudiləri və digər millətləri qətlə yetirməsinə haqq qazandırırdılar. Bütün bunlar erməni xislətinin əsl mahiyyətinin nədən ibarət olduğunu dünyaya göstərdi. Əgər, ermənilər bu durumdan lazımi nəticə çıxarmasalar, gələcəkdə onların dövlətçiliyi təhlükə altında olacaq.
Bu günlərdə cənab Prezident xarici və yerli mətbuat nümayəndələri ilə 4 saatdan artıq davam edən mətbuat konfransında onlar üçün çox gözəl yol xəritəsi çəkdi. Kommunikasiyaların açılması baxımından gələcəkdə normal əməkdaşlığın həyata keçirilməsi Ermənistan xalqının xilas yoludur. Bu tarixi şəraitdən ermənilər düzgün nəticə çıxarmalıdırlar. Əgər nəticə çıxarmasalar, təbii ki, ictimai-siyasi vəziyyət hər zaman gərgin olacaq, dövlət idarəetmə sistemi işləməyəcək. Bu da təbii ki, iqtisadiyyata biləvasitə təsir edəcək”, - N.Məhəməliyev bildirib.
Deputatın fikrincə, indiki vəziyyətdə Paşinyanın hakimiyyətdən kənarlaşdırılması real görünmür: “Görünən odur ki, məsələ sadəcə Paşinyan və müxaliflərlə tamamlanmır. Burada kifayət qədər geosiyasi maraqları olan qüvvələr var. Qərb və Şərq. İndiki halda Qərb tərəfdən Paşinyan və onun tərəfdarları müdafiə olunur. Nəzərə alsaq ki, 20 il ərzində Ermənistanda hakimiyyətdə olmuş cinayətkar “Qarabağ klanı”na erməni xalqının da çox böyük nifrəti var, ona görə də tam qətiyyətlə demək olar ki, erməni xalqı öz siyasətçilərinə qarşı hər hansı inam və arxayınlıq hissi görmür. Həm iqtidar, həm də müxalifəti təmsil edən siyasətçilər o qədər yalan danışıblar ki, burada xalqı birləşdirəcək konkret bir qüvvə görünmür. Bu baxımdan hesab edirəm ki, Paşinyanın devrilməsi problem olacaq. Onu devirə bilməyəcəklər. Burada hər hansı qanunsuz fiziki gücün tətbiq olunması istisna deyil. Bu baş versə, Ermənistan dövləti dünya miqyasında demokratiyanın düşməni kimi qəbul olunacaq. Dünyada belə dövlət çevrilişləri qəbul olunmur. Ona görə də düşünürəm ki, Paşinyan hələ hakimiyyətdə qalacaq”, - deyə deputat qeyd edib.



Baxış sayı: 104


Bölməyə aid digər xəbərlər