Bütün xəbərlər
“Azad edilmiş torpaqlarda ölüm saçan təhlükələr gizlənir” - Cəbrayılın deputatı
Tarix: 06-02-2021 02:39 | Bölmə: Müsahibə

                      “Azad edilmiş torpaqlarda ölüm saçan təhlükələr gizlənir” -  Cəbrayılın deputatı


“Ermənistan ordusu uzun illər işğalda saxladığı ərazilərimizdə dağıntılar törətməklə yanaşı çoxlu sayda minalar da basdırıb. Onların tapılıb zərərsizləşdirilməsi asan məsələ deyil”.
Bunu Azvision.az –a açıqlamasında Milli Məclisin Cəbrayıldan seçilən deputatı Ceyhun Məmmədov deyib. Onun sözlərinə görə, elə rayonlarımız var ki, həmin ərazilərdə minalanmış torpaqlar həddindən artıq çoxdur:
“Füzuli, Ağdam hər addımda təhlükə gizlənən ərazilərdəndir. Bəzi rayon və qəsəbələrdə isə basdırılmış minaların sayı nisbətən azdır. Təəssüf ki, kapitulyasiyadan sonra qarşı tərəf Azərbaycana minalanmış ərazilərlə bağlı heç bir xəritə, sxem təqdim etmədi. Əslində Ermənistan məğlubiyyətdən sonra, müharibə bitdiyi üçün minalar barədə əllərində olan xəritələri qarşı tərəfə verməli idi. Bu gün həmin torpaqlar hələ də ölüm saçan təhlükələrin gizləndiyi ərazilər kimi qalır. Biz artıq neçənci dəfədir ki, bədbəxt hadisələrin şahidi olumuşuq. Müharibədən sonra Ağdamda, Füzulidə, Cəbrayılda faciəvi mina partlamalarını görmüşük.

Təəssüf ki, bəzi vətəndaşlar tövsiyə və xəbərdarlıqlara məhəl qoymurlar, həmin bölgələrə gedərək bədbəxt hadisələrə səbəb olurlar. Bu cür arzuolunmaz addımlar hələ də davam edir. Baxmayaraq ki, vətəndaşlarımıza dəfələrlə xəbərdarlıqlar edilib, insanlar maarifləndirilirlər, amma yenə də bir neçə gün öncə belə faciəvi hadisə baş verdi. Biz anlayırıq ki, insanlar uzun illərdir səbirsizliklə bu günü, doğma torpaqlarının azad ediləcəyini gözləyirdilər. Ancaq təcrübə göstərir ki, təmkinli davranmaq daha uyğun variantdır, nəinki hamıdan qabaq o torpaqlara getmək. Təsəvvür edin, bir insan 30 ildir həsrətlə torpağının azad edilməsini gözləyir və səbirsizlik edərək gizli şəkildə həmin yerlərə gedərək ermənilərin basdırdığı minalara düşüb dünyasını dəyişir. Ona görə də hər bir vətəndaşımız bu mövzuda diqqətli olmalıdır, hələlik çalışıb o ərazilərə ayaq basmamalıyıq”.

Deputat deyir ki, ona da tez-tez bu mövzuda müraciətlər olur, işğaldan azad edilmiş ərazilərdə yaşamış insanlar öz dədə-baba yurdlarına baş çəkmələri üçün səbirsizləndiklərini söyləyirlər:

“Təbii ki, belə müraciətlərlə qarşılaşanda dərhal müəyyən tövsiyələrimizi veririk. Dönə-dönə başa salırıq ki, o kəndlər, qəsəbələr ilk növbədə təhlükəsiz əraziyə çevrilməli, minalardan və partlamamış mərmilərdən təmizlənməlidir ki, hər kəs istədiyi vaxt öz obasına gedə, gəzə, qala, yurd-yuva qura bilsin. Amma son hadisə bir daha onu göstərdi ki, hələ də hövsələsiz davranıb tərslik edənlər var. Dünən cənab Prezident çox haqlı və yerində səslənən fikirlərlə bu məsələyə öz münasibətini bildirdi, həmin insanlara müraciət etdi ki, faciəvi hadisələrə səbəb olacaq bu cür addımları atmasınlar. Burada narahatlıq doğuran məqamlardan biri də odur ki, onlar həmin ərazilərə gizli şəkildə gedirlər. Bu bölgələrə gedən yollarda postlar quraşdırılıb. Daxili İşlər Nazirliyi də ciddi tapşırıqlar verib ki, həmin torpaqlara hələlik heç kim buraxılmasın. Amma qeyd etdiyimiz kimi bəzi vətəndaşlar müəyyən yollarla postlardan yayınaraq təhlükəli ərazilərə keçirlər və nəticədə də biz belə bədbəxt hadisələrin şahidi oluruq.

Ona görə də, mən bir daha vətəndaşlara çağırış edirəm. Bir neçə dəfə bu mövzu ilə bağlı təmsil etdiyim bölgənin insanlarına müraciətlər də etmişəm. Sizin vasitənizlə bir daha müraciət edirəm ki, gəlin, bir müddət səbir edək. Biz 30 ilə yaxın səbir etmişik, bu müddət ərzində gözləmişik ki, torpaqlarımız azad edilsin. Artıq həmin tarixi günlər bizə nəsib oldu. İndi bir müddət də gözləməliyik ki, o ərazilər minalardan təmizlənərək təhlükəsiz bir şəkildə insanlara təhvil verilsin. Ondan sonra hər kəsə şərait yaradılacaq, hamı öz doğma yurduna gedəcək. Yaxın gələcəkdə hamıya təhlükəsiz şəkildə kəndlərinə baş çəkməsi, qəbiristanlıqlarda əzizlərinin qəbirlərini ziyarət etmələri, tarixi yurdlarında yaşamaları üçün şərait yaradılacaq. Bir daha qeyd edirəm ki, ermənilər bu kəndlərdə, hətta düzənlik sahələrdə belə hədsiz dərəcədə minalar basdırıblar deyə proseslər bir qədər çətin gedir. Təsadüfi deyil ki, həm Azərbaycan ordusu, həm ANAMA və digər nazirliklərin əməkdaşları, Fövqəladə Hallar, Rusiya sülhməramlıları,son günlərdə Türkiyədən gələn heyət və texnikalar əraziləri təhlükəsiz hala gətirmək üçün çalışırlar. Bütün bunlar basdırılan minaların nə qədər çox olmasını göstərir. Ona görə də təhlükələri hər kəs dərk etməli, səbirli davranmalıdır. Azərbaycan hökuməti hazırda ciddi səylə çalışır ki, ərazilər nəinki minasız hala gətirilsin, ümumilikdə müharibədən qalan istənilən təhlükəli vasitələrdən təmizlənsin. Bədbəxt hadisələrlə bir daha rastlaşmamaq üçün Prezidentin çağırışına hamılıqla əməl etməliyik”.

   






Baxış sayı: 405


Bölməyə aid digər xəbərlər