10:50 / 04-08-2020
Fəttah Heydərov vəfat etdi
Naşir-publisist Hacı Mehman Fərzullayevin Sabaha-inamla.az-a məktubu
Tarix: 31-07-2020 15:02 | Bölmə: Ədəbiyyat

Sabaha-inamla.az saytına
Hörmətli sayt rəhbərliyi!
Milli Mətbuat günündə sizin saytda yazıçı-publisist Sevda Əlibəylinin üç yazısını oxudum. Biri cənub bölgəsində ən məşhur jurnalist olan Əyyub Rzayev, o biri Lerik adlı dağlar diyarının ilk Əməkdar jurnalisti Həmzə Vəliməmmədov, digəri yazıçı-dramaturq, publisist ictimai xadim Aqşin Babayev haqqında.
Oxuduğum yazıların üçü də məni eyni ovqata köklədi və bu məktubu elə sizin sayt vasitəsilə mənə bacım qədər doğma olan Sevda xanıma ünvanlamağa məcbur etdi.
Sevda xanım! Yazılarınızı oxudum. Oxudum deyəndə siz danışdınız, mən qulaq asdım. Səs sizin deyildi, həzin bir bulağın səsiydi. Yayın qızmarında əsən bir meh idi. Yarpaqların pıçıltısı idi... Salyanda bir göl var. Gölün yanında restoran da var. Restoranın həyətində çinar ağacları illərdi baş-başa verib. Başqa yerdə hava necə olur-olsun, orda hər zaman sərin meh olur. Adamın əsəblərini sığallayan meh. Yarpaqlar sanki nəğmə oxuyur. Doğma yurdum Lənkərana getmək mənə bir də qismət olsa, inşallah o “yarpaq nəğməsi”ni lentə alacağam.
Sizin səsiniz, daha doğrusu, yazılarınızdan gələn kövrək notlar qəlbimi ovsunladı. Bu yazıları ürəyinizin qanı ilə qələmə almasaydınız, qəlbimizi bu dərəcədə ovsunlayıb fəth etməzdi. Qələminizə qüvvət, bacı! Allah sizi dünyamıza çox görməsin. Ürəkdən yazmısınız. Bulaq kimi çağlamısınız. Sərin meh kimi əsmisiniz...
“Respublika” qəzetində respublikamızın ilk poliqrafçı alimi, mənim ustadım Şəddat Cəfərovun “Söz”ün “mənəvi anası”, “Kredo” qəzertində şair-publisist Ağamir Cavadın “Sevda ömrü” yazılarını da oxudum. Olduğunuz kimi, bəlkə də olduğunuzdan az dəyərləndiriblər sizi. Yazılarda bir məqam da diqqətimi cəlb etdi. Mayın 9-da zəng vurub doğum gününüzü təbrik etmişdim. 8 may – Şuşanın işğalı ilə bağlı doğum gününüzü qeyd etmədiyinizi bilirik. Nə edək ki, həqiqət belədir, doğum tarixiniz mayın 9-dur. Yubiley yaşınız barədə yazıları məhz Milli Mətbuat günümüzün də 145 illik yubiley günündə yazmaları yerinə düşüb. Axı siz həqiqətən “Əkinçi”si ilə maarifçilik ideyaları yayan Zərdabi babamızın əsl ziyalı, zəhmətkeş varisisiniz. Baş redaktoru olduğunuz “Söz” jurnalını məhz peşənizə olan fanat məhəbbətiniz, insanlara təmənnasız sevginiz, sədaqətiniz sayəsində ərsəyə gətirirsiniz. Bu yolda da sizə uğurlar arzulayıram.
Milli Mətbuat günündə oxuduğum yazılar haqqında sizə Qurban bayramında məktub ünvanlayıram. Bu mübarək Qurban bayramında Allah təala dualarımızı eşitsin, arzularımızı çin eləsin. İnşallah.

Hacı Mehman Fərzullayev,
naşir-publisist




Baxış sayı: 301


Bölməyə aid digər xəbərlər