QHT-lərin taleyi: suallara cavab varmı?
Tarix: 05-09-2021 11:27 | Bölmə: Sosial
                         

İlk dəfə idi ki, susurdum... 
Rəhbərlik etdiyim təşkilatın yarandığı gündən himayəsində olan 80 yaşlı ağbirçəyin mənə ünvanlandığı sualına cavabım yox idi. Daha doğrusu var idi, amma səsləndirə bilmirdim.
“Siz mənə hər bayramda köməklik edirsiniz... Allah razı olsun! Bu il Ahıllar günündə də məni yəqin ki, sevindirəcəksiniz...” – deyən bu ahıl yaşlı tənha qadına nə cavab verəcəyimi bilmədim.
İllər boyu ölkəmizdə vətəndaş cəmiyyətinin ayrılmaz tərkib hissəsi olan QHT-lərin qrant müsabiqələrində iştirak edib xeyriyyəçilik layihələri ilə yaşlı və tənha insanlara diqqət və qayğı göstərməyə çalışan təşkilatımız – “Ahıllara və Tənhalara Dəstək” İctimai Birliyi himayəsində olan həssas əhali qrupuna nə cür anlatsın ki, özü digər ictimai qurumlar kimi həssas və çıxılmaz bir durumdadır.
Qeyri-hökumət təşkilatı öz məqsəd və məramları ilə vətəndaş və dövlət arasında “körpü” rolunu oynamaqla həm ölkədə vətəndaş cəmiyyətinin formalaşması və inkişafında, həm də hüquqi dövlət quruculuğunda fəal iştirak edən ictimai qurumdur. Bu qurumun maddi durumuna istənilən mənfi təsir – “körpünün” dirəklərini laxlatmaq deməkdir. 
Ölkə Prezidentinin sərəncamı ilə QHT-lərə Dövlət Dəstəyi Agentliyinin yaradılması Azərbaycanda sağlam vətəndaş cəmiyyətinin bərqərar olması və inkişafı istiqamətində atılmış mühüm addımdır. Lakin bir sıra dövlət qurumlarının məsuliyyətsizliyi səbəbindən bu gün ölkə QHT-ləri fəaliyyətsiz qalmış, bu mühüm addımın möhkəmliyinə şübhə yaranmışdır. Bir çox sahələrdə durğunluq yaratmış pandemiya dövründə, əzəl torpaqlarımızın işğaldan azad edilməsi uğrunda müharibə dövründə ölkə başçısının ətrafında sıx birləşərək, dövlətə etibarlı dayaq olaraq öz daxili imkanları hesabına fəaliyyət göstərmiş QHT-lər bu gün olduqca çətin durumdadırlar. Niyə QHT-lərə Dövlət Dəstəyi Agentliyinin Müşahidə Şurasının formalaşmasına, müsabiqəyə təqdim ediləcək qrant layihələrinin mövzularının müəyyən edilməsinə baxmayaraq, müsabiqə barədə elan verilmir? Niyə cənab Prezidentin sərəncamının icrasına məsuliyyət daşıyan qurumlardan vətəndaş cəmiyyətinə biganəliyin və ictimai qurumların aqibətinə laqeydliyin səbəbi soruşulmur? Niyə ölkədə fəaliyyət göstərən minlərlə QHT-nin on minlərlə təmsilçisinin taleyi bir neçə məsuliyyətsiz məmurdan asılı olmalıdır? Dövlətə dəstək göstərmək əzmi ilə çalışan, cəmiyyətdə müəyyən dərəcədə nüfuz sahibi olan, təmənnasız fəaliyyəti ilə adi vətəndaşların etibarını qazanan qeyri-hökumət təşkilatları nə vaxta qədər “laqeydlik epidemiyası”na yoluxmuş məmurların qeyri-ciddiliyinin qurbanı olacaqlar? 
Bu suallara cavab verən bir kəs tapılacaqmı? 
Cavab verməli olanlar susur...
Ağbirçək ananın mənə ünvanlandığı suala susduğum kimi...
Fərqli səbəblərdən susuruq: birimiz - xəcalətdən, digərimiz – cəhalətdən...    

Ruhiyyə Məmmədova,
“Ahıllara və Tənhalara Dəstək” İctimai Birliyinin sədri




Baxış sayı: 51


Bölməyə aid digər xəbərlər