“Naxçıvan” Universiteti Hindistanın Şri Venkateşvara Universiteti ilə birgə “Ali təhsil müəssisələrində informasiya texnologiyalarından istifadə edərək onlayn və distant təhsilin həyata keçirilməsi” adlı ikigünlük onlayn təlim təşkil edib.
“Naxçıvan” Universitetinin mətbuat xidmətindən AZƏRTAC-ın Naxçıvan bürosuna bildirilib ki, ali təhsil ocağının Beynəlxalq əlaqələr şöbəsinin müdiri Rəcəb Cəfərli tədbirdə çıxış edərək iki universitet arasındakı əməkdaşlıqdan danışıb. Qeyd edib ki, 2020-ci ildə imzalanan əməkdaşlıq memorandumuna əsasən ilk olaraq birgə təlim təşkil olunub.
Daha sonra Şri Venkateşvara Universitetinin Beynəlxalq əməkdaşlıq və təqdimat şöbəsinin müdiri Svetha Pasupuleti təlim və onlayn təhsil metodları, onun üstünlükləri və yeni trendlər haqqında danışıb, universitetlər arasındakı əlaqələrin bundan sonra daha da möhkəmlənəcəyinə əminliyini bildirib.
Qeyd edək ki, təlimin məqsədi “Moodl” tədris platforması vasitəsilə distant təhsilin tətbiqi, “Google” sinif otaqlarının yaradılması, imtahan sessiyasının onlayn keçirilməsinin təşkilində yeni trendlər, interaktiv video dərslərin hazırlanmasından ibarətdir.