“Türk ruhunun söz bayrağı ƏHMƏD CAVAD” kitabının təqdimatı keçirilib-VİDEO+FOTOLAR
Tarix: 18-09-2022 22:27 | Bölmə: Ədəbiyyat


    MM Mədəniyyət komitəsinin dəstəyi ilə İstiqlal muzeyində böyük şairimiz Əhməd Cavadın yubileyi ilə bağlı “Türk ruhunun söz bayrağı ƏHMƏD CAVAD” kitabının təqdimatı keçirilib.
     Milli Məclisin Mədəniyyət komitəsinin sədri Qənirə Paşayeva Azərbaycan ədəbiyyatının görkəmli nümayəndəsi, istiqlal şairi Əhməd Cavadın anadan olmasının 130, vəfatının 85-ci ildönümü və “Türk ruhunun söz bayrağı ƏHMƏD CAVAD” kitabının təqdimatı münasibəti ilə təşkil olunmuş ədəbi-bədii tədbirdə çıxış edib.
   


Tədbirin aparıcısı – Milli Məclisin Mədəniyyət komitəsinin eksperti, Beynəlxalq “Alaş” Ədəbiyyat mükafatı laureatı Əkbər Qoşalı Əhməd Cavadın ömür yolu və bu tədbirin təşkilini zəruri edən mənəvi ehtiyacdan, vəfa borcundan söz açıb. O, tədbirin Milli Məclisin Mədəniyyət komitəsi və Azərbaycan İstiqlal Muzeyinin təşkilatçılığı ilə baş tutduğunu bildirib, elm, mədəniyyət, incəsənət xadimlərinin, hərbçilərin, QHT, KİV nümayəndələrinin iştirak etdiyini bildirib.
      Öncə şəhidlərimizin əziz xatirəsi ehtiramla yad edilib, ardınca Dövlət Himni səsləndirilib.
     Salamlama nitqi ilə çıxış edən İstiqlal Muzeyinin direktoru Sədi Miresyibli diqqətə çatdırıb ki, Əhməd Cavad ömrünü, canını, bütün varlığını türkçülük, turançılıq ülküsünə həsr edib. Düşmənləri Əhməd Cavadın ülkü və təfəkküründən daim təlaş keçirdikləri üçün onun məzarının olmasına belə imkan verməyiblər. Bütün bunlara baxmayaraq, Azərbaycanın müstəqilliyi, Türkiyənin, Türküstanın qurtuluşu yolunda yorulmaz fəaliyyət göstərən istiqlal şairimizin əziz xatirəsi milyonlarla insanın könlündə yaşayır.
     Milli Məclisin Mədəniyyət komitəsinin sədri, tədbirdə təqdim olunan “Türk ruhunun söz bayrağı ƏHMƏD CAVAD” kitabının həmmüəlifi Qənirə Paşayeva geniş məruzə ilə çıxış edib.


               

Q.Paşayeva öncə Prezident İlham Əliyevin Əhməd Cavadın anadan olmasının 130 illiyi ilə bağlı imzaladığı Sərəncamı xatırladıb, tarixi şəxsiyyətlərimizin tanıdılmasına, mədəni irsimizin qorunması və klassik irsə yüksək həssaslıqla yanaşmasından söz açıb. O, illər keçsə də Əhməd Cavadın könüllərdə yaşadığını bildirib. Komitə sədri Əhməd Cavadın Stalin repressiyasının qurbanı olduğunu vurğulayıb:
“Repressiyalar, məhdudiyyətlər şairin adını ürəklərdən silə bilmədi. O, bu gün istiqlaliyyəti, Vətəni, Türk dünyasını sevən könüllərdə yaşayır. O, həyatda çox əzab-əziyyətlər gördü lakin öz ülküsündən dönmədi.
Əhməd Cavadın adının İstiqlal Muzeyində, qardaş ölkədən gəlmiş dəyərli aydınların iştirakı ilə keçirməyimiz təsadüfi deyil. Özəlliklə, 44 günlük müharibədəki Zəfərin fərəhi, qüruru içində istiqlal şairini, Dövlət Himninin söz müəllifini anmaq ayrı bir hadisədir! Müzəffər Ali Baş Komandan, Prezident İlham Əliyevin dediyi kimi, bu, bizim – Azərbaycanın və Türkiyənin müştərək qələbəsidir”!
     Sözlərinə davam edən Q.Paşayeva deyib: “XX yüzilin əvvələrində Anadolu insanı Sarıqamış faciəsinin ağrı-acısını yaşayanda Əhməd Cavad Azərbaycandan yardımların toplanılıb oralarda yaşayan qardaşlarımıza çatdırılması, millətimizin səsini daha geniş duyurmaq üçün çalışırdı. Yetim qalan qız uşaqlarını uyğun ortamlı ailələrin himayəsinə veriməsində iştirak edərək, “bu qızlar bizim namusumuzdur, onları öz övladlarınızdan ayırmadan böyüdün və yetişdirin” deyirdi. O, Azərbaycan üçün, Türkiyə üçün, Türk dünyası üçün bəzən silaha, bəzən qələmə sarılırdı. Dünyanın harasında yaşamasından asılı olmayaraq türk millətinin acıları onun acısı idi. İstiqlal şairi, mütəfəkkir, maarifçi müəllim Əhməd Cavad heç bir zaman unudulmayacaq, hər zaman sevgi-sayğı ilə anılacaq. Eyni unudulmazlıq, eyni sevgi-sayğı onun vəfalı ömür-gün yoldaşı Şükriyyə xanıma da aiddir. Hər ikisinin ruhu şad olsun!
    Bu gün Əhməd Cavadın məzarı yoxdur amma adı milyonların ürəyində uca yerdədir”!
    Q.Paşayeva kitabın nəşrində, tədbirin təşkilində əməyi keçən hər kəsə təşəkkürlərini bildirib.
      Tədbirdə Mədəniyyət Nazirliyinin şöbə müdiri Akif Marifli, qardaş Türkiyədə fəaliyyət göstərən “Əhməd Yəsəvi Kültür Dərnəyi” ictimai birliyinin İdarə heyətinin başqanı Dr. Fatma Sönməz, “Türk Ədəbiyyat” dərgisinin baş redaktoru yazıçı-tərcüməçi, kitabı Türkiyə türkcəsinə çevirən İmdat Avşar, AMEA Fəlsəfə və Sosiologiya İnstitutunun aparıcı elmi işçisi, təqdimatı keçirilən kitabın həmmüəllifi Dos.Dr. Faiq Ələkbərli, Quzey Kipr Türk Cümhuriyyətinin ölkəmizdəki təmsilçiliyinin Təhsil və Mədəniyyət attaşesi Tevfik Ulual, “Nəfəs” İB-nin sədri Firəngiz Balakişiyeva, “UNİTY Company” şirkətinin təsisçisi Fikrət Əliyev və b. öz ürək sözlərini, təqdim olunan kitabın önəmi barədə düşüncələrni bölüşüb.
Bildirilib ki, Əhməd Cavad Azərbaycan ədəbi-bədii fikri tarixində istiqlal şairi kimi özünəxas yolu, üslubu ilə seçilən söz ustadlarındandır. Bütün qəlbi ilə bağlı olduğu doğma xalqının müstəqillik ideallarına həyatı boyu sadiq qalmış sənətkarın azadlıq motivləri ilə zəngin yaradıcılığı milli məfkurədən yoğrulmuşdur. Azərbaycanın dövlət rəmzlərini yüksək şeiriyyətlə alovlu tərənnüm edən şairin müstəqil dövlətçiliyə sevgi aşılayan əsərləri dərin vətənpərvərlik duyğularının heyrətamiz poetik ifadəsidir.
     Sonra Əhməd Cavadın nəticəsi Cavad Axundzadə çıxış edib, tədbirin təşkilatçılarına və iştirakçılarına minnətdarlığını bildirib.
     Əməkdar artist Ağalar Bayramovun Əhməd Cavadın şeirlərini səsləndirməsi, Əməkdar artist Nuriyyə Hüseynovanın “Çırpınırdın, Qara dəniz”i ifası tədbirə xüsusi rəng qatıb.
     Sədi Mirseyibli Q.Paşayeva, F.Sönməz, İmdat Avşar, T.Ulual və TİKA-nın Bakı nümayəndəliyinin koordinatoru Fatih Yılmaza İstiqlal Muzeyinin nəşrlərini hədiyyə edib.
     Həmçinin Q.Paşayeva F.Sönməzə Azərbaycan həqiqətlərinin təbliği, tərənümü sahəsindəki töhfələrinə görə Mədəniyyət komitəsi adından Təşəkkür məktubu, Qarabağ motivli xatirə hədiyyəsi təqdim edib.
    Sonda tədbir iştirakçıları Azərbaycan İstiqlal Muzeyinin ekspozisiyası və 1937-ci repressiya hadisələrinin 85-ci ildönümünə həsr olunmuş sərgi ilə tanış olub. Sərgi oktyabrın 30-a qədər davam edəcək.

Sabaha-inamla.az










Baxış sayı: 56


Bölməyə aid digər xəbərlər
16-09-2022, 11:24 Şəhidim-Xalidə Nuray