Bütün xəbərlər
ADPU-DA MÜASİR UŞAQ ƏDƏBİYYATININ TANINMIŞ SİMASI ZAHİD XƏLİLİN 80 İLLİK YUBİLEYİ QEYD EDİLİB
Tarix: 06-04-2022 22:11 | Bölmə: Ədəbiyyat


Azərbaycan Dövlət Pedaqoji Universitetinin (ADPU-nun) Filologiya fakültəsinin dekan vəzifəsini icra edən professor Mahirə Nağıqızı Hüseynovanın təşəbbüsü və təşkilatçılığı ilə 5 aprel 2022-ci il tarixində ADPU-da yazıçı, şair, pedaqoq, tərcüməçi, Yazıçılar Birliyinin üzvü, filologiya elmləri doktoru, professor Zahid Xəlilin 80 illik yubileyinə həsr olunmuş "Bizim bağçamıza bir çəmən düşüb, Sürüşüb baharın çiynindən düşüb" adlı tədbir keçirilib. Tədbirdə tanınmış ziyalılar, Yazıçılar Birliyinin üzvləri, ondan çox mətbuat nümayəndələri və televiziya kanallarının əməkdaşları, o cümlədən universitetin professor-müəllim heyəti və tələbələri iştirak ediblər.
Giriş sözü ilə çıxış edən ADPU-nun rektoru, tarix elmləri doktoru, professor Cəfər Cəfərov tədbirə gələn qonaqları və universitet əməkdaşlarını salamlayıb, tanınmış uşaq şairi və nasiri professor Zahid Xəlili 80 illik yubileyi münasibəti ilə təbrik edib, onun  elm və təhsil sahəsindəki xidmətindən, çoxşaxəli bədii yaradıcılığından bəhs edib.
     Sonra Filologiya fakültəsinin Ədəbiyyatın tədrisi texnologiyası kafedrasının dosenti Bilal Həsənov və Azərbaycan Yazıçılar Birliyinin üzvü, filologiya elmləri doktoru, professor Rafiq Yusifoğlu Zahid Xəlilin ömür yolu, elmi-pedaqoji fəaliyyəti, bədii yaradıcılığı haqqında geniş məruzə ediblər.
      Məruzələrdə bildirilib ki, 1959-1965-ci illərdə ADU-nun (indiki BDU) Filologiya fakültəsinin jurnalistika şöbəsində qiyabi təhsil alan Zahid Xəlilov əmək fəaliyyətinə Yevlax Tütün Fermentləmə zavodunda texnik kimi başlayıb. 1965-1966-cı illərdə Yevlax şəhər Mədəniyyət evinin müdiri, "Qələbə" adlı rayonlararası qəzetin redaksiyasında ədəbi işçi, "Təşəbbüs" adlı Yevlax rayon qəzetində məsul katib, "Mübarizə" adlı Goranboy rayon qəzetində ədəbi işçi, məsul katib vəzifələrində işləyib.
     1966-cı ildə Azərbaycan Dövlət Pedaqoji İnstitutunda nəşr olunan "Gənc müəllim" qəzetinin redaktoru təyin olunub. 1969-1970-ci illərdə Universitetdə partiya komitəsinin katibi seçilib. 1970-ci ildə "Ədəbiyyat tarixi" kafedrasında baş müəllim, 1980-ci ildə "Ədəbiyyat və onun tədrisi" kafedrasında dosent işləyib. 1977-ci ildən Azərbaycan Yazıçılar Birliyinin üzvüdür. 1975-ci ildə filologiya elmləri namizədi, 1990-cı ildə filologiya elmləri doktoru, 1991-ci ildə professor adını alıb. 1997-ci ildən Azırbaycan Dövlət Pedaqoji Universitetinin Pedaqoqika fakültəsinin dekanı vəzifəsində çalışıb. Filologiya fakültəsinin Ədəbiyyatın tədrisi metodikası kafedrasının müdiri olub.  2002-ci ildə "Qızıl qələm" mükafatı laureatı adına layiq görülüb. Hazırda Filologiya fakültəsinin Ədəbiyyatın tədrisi texnologiyası kafedrasının professorudur.
Məruzələrdə Zahid Xəlilin bədii yaradıcılığına xüsusi yer verilib, şeirlərindən nümunələr gətirilib.
Rafiq Yusifoğlu Zahid Xəlilinin bədii yaradıcılığından bəhs edərək bildirib ki, şairin gənclik illərində yaratdığı şeirlərdəki poetik ovqat  indi də oxucuya təsir etmək gücündədir. Obrazlı deyim tərzi, təbiətə, həyata şair baxışı, maraqlı bənzətmələr onun poeziyasına xüsusi rəng qatır.
Tədbirdə Türkiyə Çanaqqala 18 Mart Universitetinin professoru Məmməd İsmayılın maraqlı çıxışı alqışlarla qarşılanıb.
  Tədbirdə AMEA-nın Nizami Gəncəvi adına Ədəbiyyat İnstitutunun elmi katibi, dosent Aygün Bağırova çıxış edərək Nizami Gəncəvi adına Ədəbiyyat İnstitutu tərəfindən keçirilən "Ən yaxşı uşaq tədqiqatçısı" müsabiqəsində Zahid Xəlilin qalib olduğunu və Elmi Şuranın qərarı ilə  "Abdulla Şaiq" adına Fəxri fərmanla təltif olunduğunu nəzərə çatdırıb və İnstitutun direktoru akademik İsa Həbibbəylinin adından Fəxri Fərmanı Zahid Xəlilə təqdim edib
Filologia fakültəsinin Ədəbiyyatın tədrisi texnologiyası kafedrasının professoru Yaqub Babayevin təbrik çıxışı da maraq doğurub.O, Zahid Xəlilin yüksək insani dəyərlərə, tükənməz elmi və pedaqoji potensiala malik alim olduğunu qeyd edib, uşaq yazıçısı kimi tanınıb sevilməsini diqqətə çəkib.
Tədbirin bədii hissəsi ADPU-nun Filologiya fakültəsinin nəzdində yaradılan "Meh" ədəbi dərnəyinin üzvləri tərəfindən həyata keçirilib.  Onların Zahid Xəlil yaradıcılığı əsasında qurduqları "Baba və nəvələri" adlı bədii kompozisiya, "Ata ocağı" pyesindən hazırladıqları hissə, şairin şeirlərinə bəstələnmiş mahnılar və səsləndirdikləri şeirlər böyük maraqla qarşılanıb. 
Sonra yubliyara həsr olunmuş videoçarx nümayiş olunub.
Tədbirin davamında Zahid Xəlil tələbə və müəllimlərin suallarını cavablandırıb və ona göstərilən diqqət və qayğıya görə universitetin rektoru, professor Cəfər Cəfərova, Beynəlxalq əlaqələr üzrə prorektor, professor Mahirə Hüseynovaya və iştirakçılara minnətdarlığını bildirib.
   Tədbirdə yekun çıxışı edən Filologiya fakültəsinin dekanı vəzifəsini icra edən professor Mahirə Nağıqızı Hüseynova müəllimi olduğu Zahid Xəlili həm müəllim, həm alim, həm də tanınmış uşaq yazıçı-şairi kimi xarakterizə edib.
Yubileyarı 80 yaşı münasibəti ilə təbrik edən Mahirə Hüseynova uzunmüddətli ədəbi və elmi-pedaqoji fəaliyyətinə görə Zahid Xəlilə ADPU rəhbərliyi adından "Fəxri Fərman" təqdim edərək tədbiri yekunlaşdırıb.
Tədbirin sonunda xatirə şəkli çəkilib.

Sabaha-inamla.az


















Baxış sayı: 413


Bölməyə aid digər xəbərlər
16-09-2022, 11:24 Şəhidim-Xalidə Nuray