"Salam, qadın, necəsən?"-Xanım İsmayılqızı
Tarix: 08-03-2022 22:53 | Bölmə: Ədəbiyyat



Şairə, bəstəkar Xanım İsmayılqızı "Salam, qadın, necəsən?" adlı şeir yazıb. Və "bu güllər və bu şeir sizin olsun, əziz qadınlar" ifadəsini işlədib.
Sabaha-inamla.az Xanım İsmayılqızının məhz 8 martda qadınlar üçün yazdığı və sosial şəbəkədə paylaşdığı şeiri təqdim edir:
***
Salam, qadın, necəsən?

Güzgüdə öz özünə
hər gün baxa bilirsən?
Nəyə var, nəyə yoxsan?
Qadın doğulduğunu
hələ unutmamısan?

Ürəklə yaşatdığın
kimdirsə, hələ sağdır?
Hisslərinin içindən
ayağı yalın keçən,
bütün ömrünü içən,
yatıbdır, ya oyaqdır?

Yenədəmi yuyursan
əllər soyulanadək
arzularını bir-bir?
Yamaya bilirsənmi
xatirəsi sökülən
duyğularını bir-bir?

Dilində bitib qalan
fikirlərin içində
nələri basdırırsan?
Hər günü toya çəkib
nələrə oynayırsan,
Nələri azdırırsan?

Yenədəmi varının
üstünə varlıq qatan
içində yox gizlənir?
Hələdəmi axırı
bilinməyən dünyanın
acında tox gizlənir?

Saçlarının dənini
rənglərə boyayaraq
ağını gizlədirsən?
Gülüşünün altında
gözünlə örtmədiyin
dağını gizlədirsən?

Gözlədiyin yoldumu?
İstədiyin oldumu?
Bilmədiyini bildin?
Sağınla və solunla,
Boşunla və dolunla
Ölmədiyini bildin?

Salam, qadın, necəsən?
Güzgüdə öz üzünə
sığal çəkə bilirsən?
Nəyə var, nəyə yoxsan?
Qadın doğulduğunu
hələ unutmamısan?
Kaş ki, unutmayasan...

Xanım Ismayılqızı





Baxış sayı: 351


Bölməyə aid digər xəbərlər
15-04-2022, 11:23 Miraslan Rasim-Şeirlər