Ordubad folklor mühitindən bəhs edən monoqrafiyanın təqdimatı olub
Tarix: 15-03-2021 19:46 | Bölmə: Ədəbiyyat


AMEA Naxçıvan Bölməsində İncəsənət, Dil və Ədəbiyyat İnstitutunun Folklorşünaslıq şöbəsinin böyük elmi işçisi, filologiya üzrə fəlsəfə doktoru Aytən Cəfərovanın “Ordubad folklor mühitinin regional xüsusiyyətləri” monoqrafiyasının təqdimatı keçirilib.


AMEA Naxçıvan Bölməsinin mətbuat xidmətindən Sabaha-inamla.az-a verilən məlumata görə tədbiri giriş sözü ilə açan AMEA-nın müxbir üzvü, professor Əbülfəz Quliyev hər bir xalqın, millətin təşəkkülü prosesində onun folklor nümunələrinin də milli sərvət kimi zənginləşdiyini, inkişaf etdiyini söyləyib.
Ulu öndər Heydər Əliyevin “Azərbaycan Milli Elmlər Akademiyasının Naxçıvan Bölməsinin təsis edilməsi haqqında” 7 avqust 2002-ci il tarixli Sərəncamını xatırladan alim bölmənin fəaliyyəti dövründə Naxçıvan bölgəsinin hərtərəfli tədqiqata cəlb olunduğunu və mühüm elmi nəticələrin qazanıldığını diqqətə çatdırıb. Qeyd olunub ki, İncəsənət, Dil və Ədəbiyyat İnstitutunun aparıcı şöbələrindən olan Folklorşünaslıq şöbəsi də ötən dövr ərzində öz elmi istiqaməti üzrə yüksək elmi əhəmiyyəti olan işlər həyata keçirib. Yenicə işıq üzü görən monoqrafiya məhz zənginliyi və milli köklərə bağlılığı ilə seçilən Ordubad folklor mühiti ilə bağlı uzunmüddətli tədqiqatların nəticəsidir.
“Ordubad folklor mühitinin kompleks tədqiqi monoqrafik təqdimatda” mövzusunda məruzə edən institutun şöbə müdiri, filologiya üzrə fəlsəfə doktoru, dosent Elxan Məmmədov bildirib ki, təqdim edilən monoqrafiya sanballı elmi-tədqiqat işi kimi Ordubad regionunun tarixi, etnoqrafiyası, coğrafi xüsusiyyətləri, təsərrüfat və məişət həyatı haqqında dolğun informasiya mənbəyidir. Müəllif əsərdə Ordubad bölgəsinin folklor nümunələrinin toplayıcısı olmaqla yanaşı, həm də tədqiqatçılıq bacarığını sərgiləmişdir. Belə ki, kitabda folklor nümunələri həm ümumtürk folkloru kontekstində, həm də Azərbaycanın digər regionlarına məxsus örnəklərlə müqayisəli şəkildə öyrənilmişdir.
Giriş, dörd fəsil, nəticə və ədəbiyyat siyahısından ibarət əsərin hər bir fəslinin mövzunu geniş və bənzərsiz şəkildə əhatə etdiyini tədbir iştirakçılarının diqqətinə çatdıran dosent Elxan Məmmədov fəsillərin əhatə etdiyi mövzu və elmi istiqamətləri təhlil və izah edib.
Vurğulanıb ki, 200-ə yaxın Azərbaycan, rus və türk dillərində mənbələrə müraciət edən tədqiqatçı Aytən Cəfərova sonda, sözün əsl mənasında, Ordubad
folklor mühiti ilə bağlı mükəmməl bir tədqiqat işi ortaya qoymuş, folklorşünaslıq elmi üçün sanballı mənbə ərsəyə gətirmişdir. Yeni monoqrafiya həmçinin Naxçıvanşünaslıq elminin zənginləşdirilməsi üçün əhəmiyyətli əsər sayıla bilər.
Sonra bölmənin İncəsənət, Dil və Ədəbiyyat İnstitutunun əməkdaşları, filologiya üzrə fəlsəfə doktoru, dosent Zülfiyyə İsmayıl və filologiya üzrə fəlsəfə doktoru Çinarə Rzayeva çıxış edərək monoqrafiya ilə bağlı fikirlərini bölüşmüşlər.
Sonda çıxış edən müəllif təqdimat iştirakçılarına minnətdarlığını bildirib.

Sabaha-inamla.az


Baxış sayı: 122


Bölməyə aid digər xəbərlər
12-06-2021, 15:09 Çingiz Qacar vəfat etdi
30-05-2021, 12:50 Əziz Musa vəfat etdi
8-05-2021, 23:25 ELMDƏN UCA -Ramiz QASIMOV