“Nağı Nağıyev: taleyi və sənəti” kitabının təqdimatı olub
Tarix: 28-01-2021 17:01 | Bölmə: Ədəbiyyat


     AMEA-nın Naxçıvan Bölməsində görkəmli ictimai xadim, yazıçı, dramaturq, tərcüməçi, redaktor, rəssam, pedaqoq Nağı Nağıyevə həsr olunmuş “Nağı Nağıyev: taleyi və sənəti” kitabının təqdimatı keçirilib.
     AMEA Naxçıvan Bölməsinin mətbuat xidmətindən Sabaha-inamla.az-a verilən məlumata görə tədbiri giriş sözü ilə açan bölmənin sədri, akademik İsmayıl Hacıyev bildirib ki, 2007-ci ildən başlayaraq İncəsənət, Dil və Ədəbiyyat İnstitutunun Ədəbiyyatşünaslıq şöbəsi tərəfindən “Taleyi və sənəti” seriyası üzrə kitabların nəşri artıq ənənə halı alıb. “Nağı Nağıyev: taleyi və sənəti” kitabı da həmin seriya çərçivəsində nəşr olunan sayca 14-cü kitabdır.
     Naxçıvan Muxtar Respublikası Ali Məclisinin Sədri yanında Bilik Fondunun dəstəyi ilə nəşr olunan kitab “Əcəmi” Nəşriyyat Poliqrafiya Birliyində çap olunub. Kitabın elmi redaktoru AMEA-nın müxbir üzvü, professor Əbülfəz Quliyevdir.
     Akademik görkəmli nasirin çoxşaxəli fəaliyyətindən bəhs edərək söyləyib ki, Nağı Nağıyev eyni zamanda tərcüməçi və redaktor kimi də uğurlu fəaliyyət göstərmişdir. Onun məhsuldar fəaliyyəti nəticəsində dünya ədəbiyyatının bir neçə incisi Azərbaycan oxucusuna təqdim edilmiş, ədəbiyyatımız daha da zənginləşmişdir.
     Tədbirdə çıxış edən AMEA-nın müxbir üzvü, professor Əbülfəz Quliyev Nağı Nağıyevin həyatı və yaradıcılığı haqqında ətraflı məlumat verib.Çıxışda vurğulanıb ki, Naxçıvan ədəbi mühitinin görkəmli nümayəndələrindən biri olan Nağı Nağıyev nasir, tərcüməçi, redaktor, rəssam olmaqla yanaşı, eyni zamanda bir pedaqoq kimi də fəaliyyət göstərmiş, vətənpərvərliyi, doğma torpağa sədaqəti öz timsalında gənc nəslə aşılamışdır. Alim yazıçının yaradıcılığının Naxçıvan və Bakı dövrləri haqqında ətraflı məlumat verərək qeyd edib ki, ötən əsrin ortalarında Naxçıvana göstərilən ögey münasibət Nağı Nağıyevin fəaliyyətinə də təsir göstərmiş, o, yalnız Bakıda yaşadığı dövrdə əsərlərinin nəşrinə müvəffəq olmuşdur.
     Yazıçının yaradıcılığına göstərilən dövlət qayğısından bəhs edən alim bildirib ki, kitabda Nağı Nağıyevin həyatının bütün dövrləri tədqiqata cəlb olunmuş, çoxşaxəli yaradıcılığının ən incə məqamları işıqlandırılmışdır. Burada Naxçıvan Bölməsinin İncəsənət, Dil və Ədəbiyyat İnstitutu əməkdaşlarının Nağı Nağıyevə həsr olunmuş 12 məqaləsi verilmiş, onun həyatı, yaradıcılığının üslub xüsusiyyətləri, hekayələri, povestləri, dramaturgiyası, Naxçıvan teatrındakı fəaliyyəti və digər məsələlərlə tədqiq edilmişdir.
     “Müasirləri Nağı Nağıyev haqqında” adlı başlıqda Süleyman Rəhimovun “Zəhmətkeş yazıçı”, Cavad Cavadlının “Ədibin xatirəsi”, Sevda Əlibəylinin
“Pedaqoq, nasir, dramaturq, rəssam, ictimai xadim” adlı yazıları və başqa tanınmış insanların onunla bağlı mətbuatda dərc edilən məqalələri oxuculara təqdim olunmuşdur.
      Kitabın “Nağı Nağıyev xatirələrdə” başlığı altında yazıçının oğlu, Azərbaycanın əməkdar mühəndisi Vasif Nağıyevin “Atamdan qalan xatirələr” adlı yazısı oxuculara təqdim edilmiş, sonda yazıçının həyatının müxtəlif dövrlərində çəkilmiş fotoşəkilləri və kitablarının şəkilləri verilmişdir.
      Yazıçının bəzi ailə üzvləri də tədbirdə onlayn iştirak edərək N.Nağıyev haqqında fikirlərini, xatirələrini yığıncaq iştirakçıları ilə bölüşüblər.
     Təqdimat mərasimində Bakı şəhər 102 saylı orta məktəbin müəllimi, filologiya üzrə fəlsəfə doktoru Mələk Süleymanovanın, Naxçıvan Bölməsinin İncəsənət, Dil və Ədəbiyyat İnstitutunun şöbə müdiri, filologiya üzrə fəlsəfə doktoru, dosent Ramiz Qasımovun və Bakı Dövlət Universitetinin müəllimi, filologiya üzrə fəlsəfə doktoru Yeganə Qəhrəmanlının çıxışları dinlənilib. Çıxış edənlər bildiriblər ki, Nağı Nağıyev yaradıcılığında insan sevgisi ön plandadır. Əsərlərində insanları daim saflığa, düzlüyə səsləyən yazıçı oxuculara özünütənqid hissi aşılayır. Onun öz yaradıcılıq nümunələrində mənfi personajları islah yoluna yönəltməsi də həmin sevginin təzahürüdür. O, öz əsərlərində həyata müxtəlif peşə sahiblərinin gözündən baxır, hadisələri onların nöqteyi-nəzərindən təhlil edir ki, bu xüsusiyyət hər yaradıcı insana nəsib olmur. Sovet dövrünün qəliblərini əsərlərində darmadağın edən Nağı Nağıyev öz həyatının bəzi dövrlərini ərsəyə gətirdiyi bədii nümunələrdə uğurla təsvir etməklə bir çox aktual məsələləri işıqlandırıb.
      Dövrün sərt ideologiyasına rəğmən “Vətən birdir”, -deyən yazıçının bütün əsərlərində doğma yurda olan sevgisi diqqət çəkir. Vurğulanıb ki, N.Nağıyevin əsərlərində Naxçıvan mövzusu əsas istiqamətlərdəndir. Onun əsərlərində Naxçıvanın şifahi xalq yaradıcılığına, etnoqrafiyasına sadiqliyi qabarıqlığı ilə seçilir. Yazıçının sərgilədiyi milli təəssübkeşliyin fonunda folklorumuz, etnoqrafiyamız, adət-ənənələrimizlə bağlı bir çox məlumatlar gələcək nəsillərə çatdırılır. Dialektizmlərin geniş şəkildə istifadəsi, ana dilinin səlisliyi məsələsini öz əsərlərində daim gündəmdə saxlaması yazıçının əsl yurd, millət sevgisinin təzahürüdür.
      Sonda yazıçının nəvələri Mələk Süleymanova və Yeganə Qəhrəmanlı Nağı Nağıyev ədəbi irsinə göstərilən diqqət və ehtirama görə Naxçıvan Muxtar Respublikası Ali Məclisinin Sədri başda olmaqla, nəşrin ərsəyə gəlməsində əməyi olan hər kəsə öz minnətdarlıqlarını ifadə ediblər.

Sabaha-inamla.az



Baxış sayı: 110


Bölməyə aid digər xəbərlər