Bütün xəbərlər
Bu gün şair Oruc Şahbuzlunun doğum günüdür-TƏBRİK EDİRİK!
Tarix: 17-04-2020 21:10 | Bölmə: Ədəbiyyat
Bu gün-17 aprel Azərbaycan Yazıçılar Birliyinin üzvü şair Oruc Şahbuzlunun doğum günüdür. 
Oruc Şahbuzlu 1958-ci ildə Naxçıvanın Şahbuz rayonunun Keçili kəndində anadan olub. 1982-cildə D.Bünyadzadə adına Xalq Təsərrüfatı İnstitutunu bitirib. Onun "Fəsilsiz ada", "Qartal qonan izim var" kitabları işıq üzü görüb.Şair uzun illərdir Bakı şəhərində yaşayır.
Oruc müəllimi doğum günü münasibətilə səmimi qəlbdən təbrik edirəm, ona can sağlığı və yaradıcılığında uğurlar arzulayıram. 100 yaşa Oruc müəllim. Hər zaman Allahın nəzərində ol!
Namiq Məmmədli
Sabaha-inamla.Az xəbər portalının baş redaktoru



ATA YURDUM VAR MƏNİM
Ata yurdum Zəngəzurun ətəyi,
Gül-çiçəkdən beçə-balı pətəyi,              
 Süfrəsində halal zəhmət çörəyi,            
Toxluqayam,  Şahbulağım var mənim.

Yaylağında mal-davarı, sürülər,
Çubuq şişdə əmlik əti yeyilər.
Bulaqbaşı gözəl sözlər deyilər,
Keçəldağım,  Xanbulağım var mənim.


Günəş qalxar təbiətə nur saçar,
Qayalardan qartal uçar, kəl qaçar.         
Basdırmanı axşamüstü dost açar,
Batabatım, Zorbulağım var mənim.

Coşan təbim Çınqıllının saf suyu,
Isti yayda ləzzət eylər bol suyu.
Sağlamlığa töhfəmizdir Turşsuyu,
Üçqardaşım, Ağbulağım var mənim.

Şahbuzluyam, Azərbaycan oğluyam,
Ulu türkəm|, soy-kökümə bağlıyam.
Zirvədəyəm, cənnətməkan dağlıyam,
Çamalqalam, Daşbulağım var mənim.

ATA YURD
Təbim coşur, ürək hələdöyünür,
Nəvələrim qələmimlə öyünur,
Hər misrada min illərim görünür,
Sevgimizin zirvəsisən ata yurd.

Xoş günləri yoxlayıram xəyalla,
Əriyirəm sorğularla, sualla.
Seçilməyir indi haram halalla,
Təqvamızın mayasısan ata yurd.

Kədər duyma söz əhlinin sözündən,
Didərginik zəmanənin üzündən.
Seçilməyir əyriləri düzündən,
Gözlərimin ziyasısan ata yurd.

Ayrı düşdüm yal-yamacdan, düzündən.
Şikəst oldum ayağımdan, dizimdən,
Yada düşüm silinməyən izimdən,
Zəhmətimin qayəsisən ata yurd.

Oruc deyər Güney-Quzey vətəndir,
Hər qarışda qönçəgülü bitəndir.
Doğma yurddan ayrı düşmək çətindir,
Gecəmizin röyasısan ata yurd.







Baxış sayı: 768


Bölməyə aid digər xəbərlər