Prezidentin göstərişləri ölkənin inkişafı və vətəndaşların sosial rifahının daha da yaxşılaşdırılmasına hesablanıb
Tarix: 28-07-2022 22:28 | Bölmə: Siyasət


    Prezident İlham Əliyevin cari ilin 25 iyul tarixində Masallı, Lerik və Göygöl Rayon İcra Hakimiyyətlərinin yeni başçılarını vəzifələrinə təyin olunmaları ilə əlaqədar qəbul edərkən ciddi tapşırıqlar verdi. Bu tapşırıqlar kifayət qədər əhatəli və əhəmiyyətlidir. Eyni zamanda, bu tapşırıqlar yalnız yeni təyin olunan rayon icra hakimiyyəti başçılarına deyil, vəzifədə olan hər kəsə ünvanlanmış oldu. Prezidentin göstərişləri ölkənin inkişafı və vətəndaşların sosial rifahının daha da  yaxşılaşdırılmasına hesablanıb.
    Cənab Prezidentin söylədiyi kimi, regionların sosial-iqtisadi inkişafı Dövlət Proqramının icrası nəticəsində uğurlu nəticələr əldə edilmişdir. Bu qəbilədən olan işlərə kənd təsərrüfatı və turizmin inkişaf etdirilməsi, infrastruktur layihələrinin icrası və sosial inkişafla bağlı görülən çoxsaylı tədbirlər aiddir. Ötən dövr ərzində elektrik enerjisi ilə təchizat, qazlaşdırma, yol infrastrukturu, suvarma, içməli su, sosial infrastruktur layihələri icra olunmuş, rayonlarda müasir xəstəxana, tibb ocaqları və məktəblər inşa edilmişdir. Prezident İlham Əliyevin tapşırıqlarından biri də ondan ibarətdir ki, bu işlərin həcmi və keyfiyyəti artsın və vətəndaşların bütün problemləri öz həllini tapsın. Müasir idarəetmə qaydalarının tətbiqi ilə buna nail olmaq mümkündür.
     Sosial ədalət prinsipinə əməl edilməsi, yeni iş yerlərinin yaradılması və sahibkarlığın inkişafı üçün müxtəlif addımların atılması da tapşırıqlar sırasında diqqət çəkir. Prezident bildirdi ki, icra başçıları özləri sahibkarları rayonlara cəlb etməlidir və bəzi hallarda baş verən müəyyən qanunsuz tələblərə son qoyulmalıdır. Xüsusən də Göygöl, Masallı və Lerik kimi turizm potensialı olan rayonlarda bu öz bəhrəsini qısa zamanda verəcək. Dövlət yol infrastrukturu və bu kimi digər lazımi işləri görmüşdür.Regionların inkişafı üçün sahibkarlarla səmərəli əməkdaşlıq qurmaq mühüm amildir. Bu yeni iş yerlərinin açılmasında da xüsusi rol oynayır.
Dövlət başçısı Şəhid ailələri və müharibə iştirakçılarına qayğı göstərilməsi ilə bağlı məsələlərə də toxunaraq vacib tapşırığınıbir daha xatırlatmış oldu. “Heç kəs unutmamalıdır ki, azad edilmiş torpaqlarımıza bayrağımızı sancan bizim qəhrəman əsgər və zabitlərimiz olub” deyə qeyd edən Ali baş Komandanxüsusilə bu məsələ ilə bağlı hər zaman effektiv iş görməyin vacibliyini vurğuladı.
    Dövlət idarəçiliyində təmsil olunan hər bir kəsin qarşısında duran əsas vəzifələrdən biri də Prezidentin tapşırıqlarını layiqincə yerinə yetirməkdir. Bu tapşırıqlar ölkənin inkişafı və insanların əmin-amanlığı üçün lazım olan bütün işləri əhatə edir.

Şahin İsmayılov,
Milli Məclisin deputatı, YAP İdarə Heyətinin üzvü


Baxış sayı: 103


Bölməyə aid digər xəbərlər
23-07-2022, 14:57 DSX-də yeni təyinat