Köçəryan küçə mübarizəsinə qayıdır: "Onun qarşısında iki yol var"- Politoloq Yeganə Hacıyeva
Tarix: 22-07-2021 01:16 | Bölmə: Siyasət

                        gun az article


Ermənistanın sabiq prezidenti, seçkilərdə “Hayastan” blokunun baş nazirliyə namizədi olmuş Robert Köçəryan deputat mandatından imtina edib. 
                                              Gunaz.tv
O, imtina barədə rəsmi ərizəsini bu gün MSK-ya təqdim edib.
“Mən xaraktercə icraçı adamam. Əminəm ki, indi öz yerimi komandama güzəştə getmək daha yaxşı olar. Onların hər biri yaxşı deputat olacaq”-deyə, o bildirib.
Robert Köçəryan deyib ki, Ermənistan prezidenti postundan sonra deputat mandatı onu cəzb etməyib: “Seçkidə mənə səs verənlər baş nazir postunda görmək istəyirdilər”.
Robert Köçəryanın bu addımı birmənalı  qarşılanmır. Sabiq prezident parlament tribunasından niyə imtina etdi?  O, seçki yolu ilə mübarizənin perspektivinə inanmır? 
Sabiq dövlət başçısı Nikol Paşinyanı devirmək üçün çevriliş yoluna baş vuracaq? 
Gənc Demokratlar İnstitutunun sədri, politoloq Yeganə Hacıyeva Günaz.TV-yə açıqlamasında deyib ki, Köçəryan yeni siyasi mübarizə yoluna baş vurmaq istəyəcək:

              Yeganə Hacıyeva: BMT-nin ən ağrılı problemi ilə bağlı Əliyev dünyaya daha  bir çağırış etdi - TŞ qətnamələri kağız parçaları kimi qalacaq, ya...

“Köçəryan mandatdan imtina edib. O, hesab edir ki, seçkidə haqqı tapdalanıb. Seçkinin saxtalaşdırıldığını iddia edir və bunu əsaslandırır. O, küçədən başlanan mübarizə üsuluna keçib. Məsələ burasındadır ki, Ermənistandakı seçki sistemi hakimiyyətin seçki yolu ilə dəyişdirilməsi üçün əlverişli deyil.
Seçki komissiyası üzvlərinin mütləq əksəriyyəti hakim partiyanın üzvləridir. Seçkinin nəticələrini təsdiqləyən Konstitusiya Məhkəməsi müstəqil deyil. Hakimlər iqtidarın tövsüyyəsi ilə təsdiq edilir. Seçkinin özünün keçirilməsi zamanı inzibati resurslardan istifadə edilir. 
Media, dövlət televiziyaları hakimiyyətin nəzarətindədir. Bütün bunlar Ermənistanda hakimiyyətin seçki yolu ilə dəyişdirilməsini mümkünsüz edir. Lakin düşünürəm ki, Robert Köçəryanın parlamentdə qalıb mübarizə aparması daha məqsəduyğun olardı. Çünki o faktiki ana müxalifətin rəhbəri idi. Robert Köçəryan Xocalıda qətliam törətmiş adamdır. 
Qadın, qoca və uşaqların qatilidir. O, istənilən anti-konstitusion addıma gedə bilər. Lakin hazırda onun belə bir rıçaqları yoxdur. Siyasətdə mövcud şərtlərlə oynamaq zorundadır. Bununla belə hesab edir ki, hazırkı durum, parlamentdəki vəziyyətin onun qələbəsi üçün yetərli deyil. Hesab edir ki, küçə metodları daha effektli olar”.
Politoloq bildirib ki, son parlament seçkilərinə tərəddüdlə girən Köçəryanın qarşısında iki yol var: “Ya o siyasəti və Ermənistanı tərk edib getməlidir. Ya da siyasətdə qalıb fəaliyyətini davam etdirməlidir. Belə görünür ki, o, getməyi deyil, qalıb mübarizə aparmağı seçib.
Nikol Paşinyanın Köçəryandan fərqi ondadır ki, Baş nazir proseslərə media vasitəsilə təsir imkanlarına malikdir. 
O, ictimai rəyə sosial media üzərindən təsir edir. Paşinyanın idarə etdiyi 7 “youtube” kanalı var ki, ölkədə gündəmin formalaşmasında böyük rol oynayır.
Köçəryan isə küçə metodlarından yararlanmaq istəyir. Qısası, Paşinyan “facebook qəhrəmanı”, sosial media siyasətçisidir, Köçəryan isə mitinqlərdə aktivdir. Köçəryanın parlamentə getməməsi Paşinyanın işinə yarayır. Bu durum Paşinyanın işini daha asanlaşdıracaq”.


Baxış sayı: 99


Bölməyə aid digər xəbərlər