Ermənistan 30 ilə yaxın müddətdə cəbhə xəttində bir neçə mərhələdən ibarət gücləndirilmiş müdafiə istehkamları qurmuşdu. Lakin onların heç biri Azərbaycan Ordusunun hücumlarını əngəlləyə bilmədi və bölmələrimiz müharibənin ilk saatlarından düşmənin ön cəbhə xəttindəki bütün səngərləri ələ keçirdilər.
Azərbaycan tərəfinin mina xəritələrinin təqdim edilməsi ilə bağlı çoxsaylı çağırışlarına baxmayaraq, Ermənistan son günlərədək bundan imtina edib. Lakin aparılan məqsədyönlü fəaliyyət öz bəhrəsini verib və əldə edilmiş razılığa əsasən, iyulun 3-də Ermənistan tərəfindən işğal dövründə Füzuli və Zəngilan rayonlarında basdırılmış tank və piyada əleyhinə təqribən 92 min minaya dair xəritələr Rusiya Federasiyasının təşəbbüsü ilə Azərbaycana təqdim edildi. Bu hadisə bir daha göstərdi ki, Azərbaycanın mina xəritələrinin mövcud olması barədə iddiaları tamamilə haqlı, Ermənistanın bəhanələri isə yalan imiş.
Bunu AZƏRTAC-a açıqlamasında Milli Məclisin deputatı Anar Məmmədov deyib.
Deputat diqqətə çatdırıb ki, Füzuli və Zəngilan rayonlarında basdırılan minaların xəritələrinin Ermənistandan alınması Prezident İlham Əliyevin həyata keçirdiyi müdrik və çoxşaxəli fəaliyyətin məntiqi nəticəsi, siyasi-diplomatik qələbəsidir. Eyni zamanda, növbəti mina xəritələrinin Azərbaycana verilməsi dövlətimizin başçısının düşünülmüş və qətiyyətli siyasəti nəticəsində Ermənistanın çıxılmaz vəziyyətə düçar olduğunu və bu xəritələri verməyə məcbur qaldığını sübut edir. Humanist addım olaraq Azərbaycan tərəfi isə məhkəmənin hökmü ilə azadlıqdan məhrum edilmiş və təyin olunmuş cəza müddəti bitmiş 15 ermənini Ermənistana təhvil verib. Beləliklə, Azərbaycan tərəfi mina xəritələri müqabilində 15 erməni vətəndaşı Ermənistana təqdim etməklə həm humanistlik, həm də mina təhlükəsi ilə üzləşə biləcək hər bir vətəndaşımızın təhlükəsizliyinin bizim üçün dəyərli olduğunu göstərdi.
“Bildiyimiz kimi, müharibədən dərhal sonra azad edilmiş ərazilərdə Azərbaycan vətəndaşlarının normal yaşayışını təmin etmək üçün in¬tensiv işlərə başlanılıb və bu tədbirlər bu gün də sürətlə davam edir. Bu mənada qarşımızdakı yeganə əngəl ərazilərin minalanmasıdır. Təbii ki, ilk növbədə, işğaldan azad olunmuş ərazilərdə minatəmizləmə işləri aparılmalı, təhlükəsizlik təmin edilməlidir. Qısa müddətdə respubli¬kamızda minatəmizləmə əməliyyatları üzrə milli standartlar müəyyənləşdirildi. Bu prosesin dünya standartlarına uyğun həyata keçirilməsi üçün lazımi tədbirlər görülür. Çünki azad edilmiş ərazilərimizdə basdırılan minaların sayı dünya miqyasında bəlkə də ən böyük rəqəmlərdən biridir”, - deyə A.Məmmədov qeyd edib.
Deputat vurğulayıb ki, Azərbaycan Prezidentinin bölgədə yaratdığı reallıqlar artıq öz sözünü deyir. Kapitulyasiya aktını imzalayan Ermənistan hakimiyyəti indi də mina xəritələrini vermək məcburiyyətində qalıb. Mina xəritələrinin olmaması təkcə Füzuli və Zəngilan rayonlarının ərazisinin minalar¬dan təmizlənməsi prosesini illərlə uzada bilərdi ki, bu da Azərbaycanın büdcəsinə əlavə yük olardı, həmçinin çoxsaylı vətəndaşımızın ölümünə gətirib çıxarardı. Təbii ki, belə olan halda, bərpa işləri ləngiyər və məcburi köçkünlərin bu torpaqlara qayıdışını təmin etməkdə çətinliklər yara¬nardı.
“Bu baxımdan, 92 min minaya dair xəritələrin Azərbaycana təqdim edilməsi tarixi torpaqlarımızın yenidən canlanmasına və Böyük Qayıdışa mü¬hüm töhfə olacaq. Ən əsası, Cənubi Qafqaz regionunda əməkdaşlığın və sa¬bitliyin təmin olunması üçün Ermənistan tərəfi əsassız iddialarını kənara qoyacaq, yeni reallıqlarla barışacaq və üzərinə düşən öhdəlikləri yerinə yetirəcək. Hadisələrin başqa istiqamətdə inkişafı isə yalnız Ermənistanın ziyanına olacaq. Buna görə də Ermənistanın mina xəritələri vermək məcburiyyətində qalması Prezident İlham Əliyev diplomatiyasının növbəti böyük nailiyyətidir”, - deyə A.Məmmədov fikirlərini yekunlaşdırıb.