Şuşa Bəyannaməsinin imzalanması region üçün çox böyük geosiyasi hadisədir. 2021-ci il iyunun 15-də Azərbaycan Prezidenti İlham Əliyev və qardaş Türkiyə Prezidenti Rəcəb Tayyib Ərdoğan arasında Şuşada imzalanmış Bəyannamə ölkələrimizin tarixi qardaşlığının, dostluğunun və birliyinin əyani təcəssümüdür. İki ölkə və onun xalqları arasındakı dostluq və qardaşlıqdan çıxış edərək ölkələrimizin münasibətləri keyfiyyətcə yeni, müttəfiqlik səviyyəsinə qaldıran Bəyannamə xalqlarımızın ümumi mənafelərinə xidmət edir. Bəyannamə ümummilli lider Heydər Əliyevin “Bir millət, iki dövlət” ifadəsindən irəli gələrək xalqlarımızın birliyini, ortaq milli-mənəvi dəyərlərini əks etdirir.
Eyni zamanda, Bəyannamənin imzalanması ilə eyni vaxtda qardaş Türkiyə Respublikasının Şuşa şəhərində konsulluq yaratmaq qərarı Qarabağımız üçün yeni inkişaf perspektivləri vəd edir. Geniş mənada bu inkişaf həm xalqımız, eləcə də Qarabağda yaşayan erməni əsilli Azərbaycan vətəndaşları üçün firavan gələcək vəd edir.
Bu fikirləri AZƏRTAC-a açıqlamasında Milli Məclis sədrinin müavini, Gənclər və idman komitəsinin sədri Adil Əliyev söyləyib.
A.Əliyev deyib: “Bu gün hər kəs anlayır ki, Vətən müharibəsində Rəşadətli Ordumuzun Ermənistana vurduğu sarsıdıcı zərbə nəticəsində işğalçı ölkənin bir dövlət olaraq tənəzzülü sürətlənib. Müharibədə şanlı Ordumuz tərəfindən qənimət olaraq ələ keçirilmiş, habelə məhv edilmiş Ermənistan ordusuna məxsus olan silahlar, texnikalar Ermənistanın ordusu ilə yanaşı, iqtisadiyyatını da məhv etdi. Həmçinin, erməni xalqı bu gün Ermənistanda baş verənlərdən bezib və özləri də başa düşürlər ki, revanşist hisslərə qapılmaq böyük itkilərlə nəticələnə bilər. Bunun isə öz növbəsində bir neçə əsas səbəbi var: “Birincisi, Ermənistanda baş verən iqtisadi böhran xalqın məişət şəraitini həddindən artıq ağırlaşdırıb və ölkədə baş verən səfalət, gündən-günə artan xarici borc və yoxsulluq nəticəsində insanların güzəranı həddindən artıq pisləşib və yoxsulluq artıb. İkincisi, Ermənistanın keçmiş siyasi rəhbərliyi - sabiq Prezident Levon Ter-Petrosyan, habelə digər yüksək vəzifəli sabiq məmurlar daxil olmaqla, ictimai fəallar Qarabağın birmənalı şəkildə Azərbaycanın ərazisi olduğunu qeyd edir və beynəlxalq hüququn aşkar şəkildə ölkəmizin tərəfində olmasını etiraf edirlər. Üçüncüsü, Ermənistanda sabitliyin olmaması hər gün baş verən küçə yürüşləri, mitinqlər və ən əsası, baş verənlərin Qarabağda yaşayan ermənilərin adı ilə bağlanması və baş verənlərdə onların günahkar görülməsi, cəmiyyətdə yaranmış qütbləşmə Qarabağdakı ermənilərin inteqrasiya prosesini sürətləndirəcək. Həmçinin Ermənistanın baş naziri Nikol Paşinyan sülh müqaviləsinin imzalanmasının lehinə olduğunu bildirir, sadə erməni xalqı da bunu qəbul edir. Çünki müharibədə aldıqları tarixi məğlubiyyəti yenidən yaşamaq istəmirlər”.
Milli Məclis sədrinin müavini diqqətə çatdırıb ki, bütün bunlara baxmayaraq, ABŞ-da və ayrı-ayrı ölkələrdə fəaliyyət göstərən erməni lobbisi və diaspor təşkilatları hər vəchlə bu sülhün qarşısını almağa çalışır, inteqrasiya prosesini ləngitməklə revanşizm hissini alovlandırmağa çalışırlar. Baxmayaraq ki, sülhü hər zaman dəstəklənməsi lazımdır.
Məsələn, keçən ay ABŞ Senatının xarici əlaqələr komitəsində keçirilən 2022-ci maliyyə ili ilə bağlı dinləmələr zamanı bir neçə senator Dövlət Departamentini Azadlığa Dəstək Aktına 907-ci düzəlişi dayandırmaqla Azərbaycanın maraqlarına xidmət edildiyini qeyd etdilər. Qeyri-mütənasib və əsassız mövqe göstərən senatorlar 907-ci düzəlişin qüvvədə saxlanılmasını bildirsələr də, onların bu fikirlərinə, təbii ki, heç bir məhəl qoyulmadı. Baxmayaraq ki, görüşdən əvvəl Amerikanın Erməni Milli Komitəsinin (ANCA) rəhbəri çıxışında bildirmişdi ki, 907-ci düzəliş yenidən qüvvəyə minəcək və “amerikalıların ödədiyi vergidən 1 dolların belə silah alınıb Azərbaycana göndərilməsinə yol verilməyəcək”. İrəli sürülən bu əsassız fikirlər təbii ki, qəbul edilə bilməzdi və edilmədi də. Sadəcə, ziddiyyətli fikirlər bəzi erməni diaspor təşkilatlarının sülhün qarşısında ən böyük əngəl olmasını bir daha göstərdi.
Bu gün Qarabağda böyük sürətlə abadlıq və bərpa işləri gedir. Təbii ki, Azərbaycan Respublikasının Prezidenti cənab İlham Əliyevin göstərişi əsasında sürətlə aparılan quruculuq siyasəti tezliklə öz bəhrəsini verəcəkdir. Deyə bilərik ki, Qarabağa yeni nəfəs gəlir və artıq Şuşa şəhəri uzun illərdən sonra yenidən böyük tədbirlərə, festivallara ev sahibliyi edir. İnanırıq ki, tezliklə Qarabağ dünyanın ən gözəl guşələrindən birinə çevriləcəkdir. Bunun üçün isə, ilk növbədə regionda sülhün, sabitliyin bərqərar olması ən vacib amildir.