2020-ci il tariximizə Zəfər ili olaraq düşdükdən sonra qarşımızdakı əsas hədəf işğaldan azad olunmuş ərazilərimizdə aparılan abadlıq və quruculuq işləri, sonra isə məcburi köçkünlərin uzun illər davam edən həsrətdən sonra öz doğma evlərinə qayıtmalarıdır.
Bu sözləri AZƏRTAC-a açıqlamasında Milli Məclis sədrinin müavini Adil Əliyev deyib.
Adil Əliyev qeyd edib ki, artıq onların geri qayıtması reallığa ən yaxın arzudur. Bu da onu deməyə əsas verir ki, qısa müddətdən sonra məcburi köçkünlərimiz öz dədə-baba yurdlarına geri dönəcəklər.
“Artıq “Azərbaycan 2030: sosial-iqtisadi inkişafa dair Milli Prioritetlər” müəyyən olunub. Milli Prioritetlər ölkəmizin bundan sonrakı inkişafını müəyyənləşdirəcək yol xəritəsidir. Yəni, Azərbaycan Respublikasının əsas hədəflərini, əsas məqsədlərini göstərən bələdçidir. Prioritetlərin müəyyən edilməsi və işlərin onlara uyğun olaraq qurulması əsas siyasi xəttimizi müəyyənləşdirir. Həmçinin qəbul edilmiş prioritet istiqamətlər Birləşmiş Millətlər Təşkilatının “Dünyamızın transformasiyası: 2030-cu ilədək dayanıqlı inkişaf sahəsində Gündəlik”lə həmahəngdir”, - deyən Milli Məclis sədrinin müavini bildirib ki, Vətən müharibəsindən sonra bölgənin və ölkəmizin inkişafının təmin olunması, regionda sülhə nail olmaqla yanaşı, yeni tranzit yolların qurulması ölkəmizin inkişafının əsas cizgilərini müəyyən edir.
“Sosial-iqtisadi inkişafımızın bazasını müəyyən edən Milli Prioritetlərin qorunması və reallaşdırılmasına xidmət etmək hər bir vətəndaşın ümdə vəzifəsidir. Milli Prioritetlər müəyyən edilərkən ən mühüm məsələlərdən biri də iqtisadiyyat olub. Dövlətin təməl dayaqları, inkişafı birbaşa olaraq iqtisadiyyatdan asılıdır. Pandemiya bizə əyani şəkildə göstərdi ki, əgər iqtisadiyyat zəifdirsə, inkişafdan heç bir halda söhbət gedə bilməz. İqtisadiyyatı zəif olan dövlətlər pandemiya bəlasından qurtula bilmədi. Lakin Azərbaycan kimi dayanıqlı iqtisadiyyata sahib olan ölkələr pandemiyada iqtisadiyyatları zərər görsə belə, bu bəlanı dəf edə bildilər. İqtisadiyyatda yalnız Cənubi Qafqazda lider olmaqla kifayətlənməli deyilik, həm də dəyişən dünyanın standartlarına uyğun dayanıqlı iqtisadiyyat qurmaq əsas hədəfimizdir. Eyni zamanda, Milli Prioritetlər içərisində dinamik, inklüziv və sosial ədalətə əsaslanan cəmiyyətin qurulması da əsas şərtlərdən biri kimi müəyyən edilib. Belə ki, cəmiyyətin inkişafı dövlətin inkişafı ilə düz mütənasib olan bir haldır. Əgər ilkin olaraq rəqabətyönümlü iqtisadiyyat nəzərdə tutulursa, ikinci mühüm amil inkişaf edən iqtisadiyyata uyğun cəmiyyətin qurulmasıdır. Bu cəmiyyətdə ayrı-seçkilik əlaməti yoxdur və cəmiyyətin əsas fokus nöqtəsi daha da inkişaf etmək, müasirləşmək və insanlar arasında münasibətləri daha da sıxlaşdırmaqdır”.
Dövlətimizin başçısının əsas kapitalımızın insan kapitalı olduğunu dəfələrlə qeyd etdiyini bildirən Adil Əliyev deyib: “İnsan kapitalının inkişafı ilə bağlı müxtəlif sənədlər qəbul olunub. Habelə xaricdə təhsil üzrə dövlət proqramlarının əsas xəttini də insan kapitalının inkişafı təşkil edir. Milli Prioritetlərdə əsas məsələlərdən biri də təmiz ətraf mühit və “yaşıl artım”a önəm verilməsi, ölkəmizin ekoloji tarazlığının qorunması və ekosistemin qurulmasıdır. Hər il ölkəmizdə yeni parklar salınır, habelə yaşıllıqların artırılması istiqamətində mühüm tədbirlər görülür. Təəssüf ki, Ermənistanın törətdiyi terror nəticəsində meşələrimiz də böyük zərər görüb, işğal altında olan ərazilərimizdə böyük meşə massivləri məhv edilib. Qarabağda aparılan abadlıq-quruculuq işlərinin tərkib hissəsi kimi, meşələrin bərpası istiqamətində də mühüm addımlar atılacaq, yeni yaşıllıqlar salınacaq”.