Sabaha-inamla.az rus mətbuatına istinadən xəbər verir ki,Almaniya kansleri Olaf Şolts Rusiya prezidenti Vladimir Putinin noyabrın 15-16-da İndoneziyanın Bali adasında keçiriləcək G20 sammitində iştirak etməmək qərarına gəlməsindən təəssüflənir.
"Prezident Putin G20 sammitinə getsəydi, yaxşı olardı", - Şolts bunu Hanoyda işgüzar səfəri zamanı deyib.
RİA Novosti yazır ki, kansler izah edib ki, Rusiya lideri dünyanın bir çox ölkələrinin sualları və tənqidləri ilə üzləşməli olacaq.
Daha əvvəl Rusiya prezidentinin sözçüsü Dmitri Peskov bildirib ki, Putinin G20 sammitində iştirak etməmək qərarı onun qrafiki və Rusiyada olması zərurəti ilə bağlıdır. Putin həmçinin videobağlantı vasitəsilə forum iştirakçılarına müraciət etməyi planlaşdırmır.
G20 sammitində Rusiya nümayəndə heyətinə xarici işlər naziri Sergey Lavrov başçılıq edəcək.
Bu arada, Qərb mətbuatının yazdığına görə, prezident Coko Vidodo başda olmaqla İndoneziya siyasətçiləri G20 sammitində iştirak edən Qərb liderlərini Rusiyaya qarşı ritorikasını yumşaltmağa çağırırlar. Vidodo ümid edir ki, Rusiya tərəfi görüşün sonunda kommünikedə iştirak edəcək.