Etirazlara səbəb olan cərimələnmə qanununda dəyişiklik ediləcək
Tarix: 02-07-2021 15:00 | Bölmə: Gündəm

                  Etirazlara səbəb olan cərimələnmə qanununda dəyişiklik ediləcək


“Mülki Prosessual Məcəlləyə təklif edilən maddə yeni redaksiyada veriləcək”.
“Qafqazinfo” xəbər verir ki, bunu Milli Məclisin bu gün keçirilən iclasında Hüquq siyasəti və dövlət quruculuğu komitəsinin sədri, deputat Əli Hüseynli Mülki Prosessual Məcəlləyə təklif edilən dəyişikliyin müzakirəsi zamanı deyib.
O qeyd edib ki, məhkəmə işə düzgün və tezliklə baxılmasına aşkar sürətdə mane törədən şəxsləri, işdə iştirak edənləri və ya vəkilləri cərimələyəcək:
“Qeyd olunurdu ki, niyə yalnız vəkillər nəzərdə tutulurdu. Bu, artıq aradan qaldırıldı, bütün tərəfləri nəzərə alacağıq. İkincisi, narazılıq yaradan məsələ rüsumlarla bağlı idi. Pulsuz hüquqi yardımla bağlı qanunun təqdim olunması nəzərdə tutulur. Bu baş verəndən sonra həmin narazılıq aradan qalxmış olacaq”.
Qeyd edək ki, əvvəlki redaksiyada dəyişiklik məhkəmənin açıq-aşkar əsassız vəsatət və şikayətlər verən, yaxud işə düzgün və tezliklə baxılmasına və onun həll edilməsinə aşkar surətdə maneçilik törədən tərəfi, onun nümayəndəsini və ya vəkilini 500 manatadək cərimə etməsini nəzərdə tuturdu. Yeni dəyişiklikdə isə məhkəmə işə düzgün və tezliklə baxılmasına və onun həll edilməsinə aşkar surətdə maneçilik törədən, o cümlədən dəfələrlə açıq-aşkar əsassız vəsatət və şikayətlər verərək işdə iştirak edən şəxsləri, onların nümayəndələrini və ya vəkilləri 500 manatadək cərimə edə biləcək.
Məcəlləyə təklif edilən dəyişikliklər II oxunuşda səsə qoyularaq qəbul edilib. 


Baxış sayı: 124


Bölməyə aid digər xəbərlər