23:50 / 18-03-2024
Prezident xalqı təbrik etdi
22:44 / 18-03-2024
Petr Yan sıradan çıxıb
Bütün xəbərlər
Bu gün ölkəmiz bir sıra Avropa dövlətlərinin enerji təhlükəsizliyində mühüm rol oynayır-Kamilə Əliyeva
Tarix: 03-06-2023 10:45 | Bölmə: Siyasət


Ulu öndər Heydər Əliyevin 1993-cü ildə hakimiyyətə gəlişindən sonra Azərbaycan dirçəliş yoluna qədəm qoydu. Ulu öndər Heydər Əliyevin uzaqgörən, müdrik siyasəti nəticəsində 1994-cü ildə Ermənistanla atəşkəs haqqında müqavilə imzalandı.
Bütün xarici təzyiqlərə baxmayaraq ulu öndərin qətiyyəti və qərb ölkələri liderlərinin və nəhəng xarici neft şirkətlərinin Heydər Əliyevə olan inamı və etibarı sayəsində 1994-cü ildə "Əsrin müqaviləsi" adlandırılan neft kontraktları imzalandı. Xarici sərmayədarlar Azərbaycana böyük investisiyalar yatırmağa başladı. Azərbaycan iqtisadiyatı sürətlə inkişaf etməyə, əhalimizin sosial vəziyyəti yaxşılaşmağa başladı. 1994-cü ildən etibarən keçirilən Xəzər neft-qaz sərgisində Azərbaycan öz potensialını beynəlxalq investorlara təqdim etməyə başladı.
Prezident cənab İlham Əliyev 31 may tarixində 28-ci Beynəlxalq Xəzər Neft və Qaz və 11-ci Xəzər Beynəlxalq Energetika və Yaşıl Enerji sərgisinin açılışında Azərbaycanda yaradılmış nəhəng enerji infrastrukturu barədə, Azərbaycanda istehsal olunan istər neft-qaz, istərsə də bərpa olunan enerjinin Avropanın enerji təhlükəsizliyinə verdiyi töhfələr haqqında çıxış etdi. Bakıda enerji həftəsinə ABŞ prezidenti Co Bayden və Böyük Britaniyanın baş naziri Sunakın məktub ünvanlaması bu dövlətlərin tədbirə böyük maraq göstərdiklərini, eləcə də Azərbaycanın enerji resurslarının inkişaf etdirilməsinə dəstək olduqlarının nümunəsidir. "Əsrin müqaviləsi" imzalandıqdan sonra Azərbaycan dünya enerji bazarında etibarlı tərəfdaş ölkə olaraq digər dövlətlərlə sıx əməkdaşlıq edir.
Müasir dünyada hər bir dövlət enerji təhlükəsizliyinə böyük diqqət göstərir. Artıq enerji təhlükəsizliyi dövlətlərin milli təhlükəsizliyilə bərabər tutulur. Azərbaycanın Avropa İttifaqı ilə enerji sahəsində sıx əməkdaşlığı nəticəsində bu gün ölkəmiz bir sıra Avropa dövlətlərinin enerji təhlükəsizliyində mühüm rol oynayır. Bərpa olunan enerji sahəsində də Azərbaycanda böyük layihələr həyata keçirilməkdədir. Yaxın vaxtlarda Azərbaycanın istehsal etdiyi yaşıl enerji də qonşu ölkələrlə yanaşı bir sıra Avropa dövlətlərinə də ixrac ediləcək. Azərbaycandan Cənub Qaz Dəhlizi vasitəsilə Avropaya ixrac edilən qazın həcmi hər il artmaqdadır. 2027-ci ildə Avropaya ixrac ediləcək qazın həcmi 20 milyard kub metrə çatdırılacaq. Bunun üçün ölkəmizdə qaz mənbələri mövcuddur. Azərbaycandan qaz almaq istəyən dövlətlərin sayı artmaqdadır. Bu dövlətlər Azərbaycanı etibarlı tərəfdaş ölkə hesab edirlər. Azərbaycandan Avropaya ixrac edilən qazın nəqlində bu günə gədər heç bir fasilə olmamışdır. Böyük maliyyə təşkilatları da Azərbaycana sərmayə yatırmağa böyük maraq göstərir. Bu gün Prezident cənab İlham Əliyevin həyata keçirdiyi uğurlu neft strategiyası nəticəsində Azərbaycan tək Avropa üçün deyil, ümumilikdə dünya üçün də önəmli bir ölkəyə çevrilmişdir.
bu gün ölkəmiz bir sıra Avropa dövlətlərinin enerji təhlükəsizliyində mühüm rol oynayır.

Kamilə Əliyeva,
Milli Məclisin deputatı, professor



Baxış sayı: 177


Bölməyə aid digər xəbərlər