Ziyafət Əsgərov: “Ermənistan rəhbərliyi Prezidentin xəbərdarlığından nəticə çıxarmalıdır”
Tarix: 16-07-2022 14:38 | Bölmə: Siyasət

Ziyafət Əsgərov, Milli Məclisin Müdafiə, təhlükəsizlik və korrupsiya ilə mübarizə komitəsinin sədri




“Erməni silahlı qüvvələri Qarabağdan çıxarılmalı, Ermənistan status məsələsini birdəfəlik unutmalıdır. Prezident İlham Əliyevin bu ilin altı ayının yekunlarına həsr olunan müşavirədə bu barədə bəyanatı Ermənistana, Ermənistan rəhbərliyinə xəbərdarlıqdır və bu xəbərdarlıqdan nəticə çıxarmalıdırlar”.
Bunu APA-ya açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov bildirib.
Parlamentin komitə sədri bu ilin altı ayında Azərbaycan-Ermənistan əlaqələrinin normallaşdırılması istiqamətində müəyyən addımlar atılsa da, hələlik real nəticələr olmamasına diqqət çəkib: “Prezident İlham Əliyevin müşavirədə çıxışında qeyd etdiyi kimi, əgər müsbət məqamlardan söhbət açsaq, delimitasiya üzrə işçi qrupların birinci görüşü keçirilib və bu, müsbət addımdır. Bu da Azərbaycanın təşəbbüsü ilə reallaşıb. İlk görüş tanışlıq xarakteri daşıyıb, gələn ay ikinci görüşün keçirilməsi nəzərdə tutulur. İkinci görüşün artıq praktik məsələlərin müzakirəsinə həsr olunacağı gözlənilir. Tezliklə nəticə gözlənilməsə də, hər halda bu prosesin başlamasını uğurlu inkişaf kimi qiymətləndirmək olar. Digər müsbət hal Azərbaycanın təşəbbüsü ilə sülh müqaviləsinin əsasını təşkil edəcək beş əsas baza prinsipinin Ermənistan tərəfindən qəbul edilməsidir. Türkiyə, Rusiya və İranla müzakirələr zamanı da Azərbaycanın bu mövqeyi dəstəklənib. Prezident bildirdi ki, digər tərəfdaşlar - Avropa İttifaqı və ABŞ-la da bu məsələni müzakirə edilib. Beləliklə, faktiki olaraq indi sülh danışıqlarının başlanması üçün əsas yaradılıb. Ancaq Ermənistanın bizim beynəlxalq hüquq norma və prinsipləri əsasında formalaşan təkliflərimizi qəbul etməsi müsbət hal olsa da, hələ ki, konkret addımlar yoxdur. Bu aspektdə bu gün Azərbaycan və Ermənistan xarici işlər nazirləri görüşünün də nəticələrinin olacağına, sülh müqaviləsinin hazırlanması üçün Ermənistanın da öz işçi qrupunu artıq formalaşdıracağına ümid edirik”.
Ziyafət Əsgərov deyib ki, Ermənistanın 10 noyabr 2020-ci ildə imzalanmış Bəyannamədə əksini tapan bir sıra öhdəlikləri hələ də yerinə yetirməyib: “Bu öhdəliklərdən biri də erməni silahlı qüvvələrinin Qarabağdan çıxarılmasıdır. Dövlət başçısı müşavirədə Rusiya tərəfinin bununla bağlı vədini də xatırlatdı. Məlum oldu ki, bir neçə ay bundan əvvəl Rusiyanın Müdafiə Nazirliyinin yüksəkvəzifəli şəxsi Azərbaycanda səfərdə olarkən Azərbaycan Müdafiə Nazirliyinə söz verib ki, iyun ayına qədər erməni silahlı birləşmələri Qarabağdan çıxarılacaq. Ancaq Ermənistan indiyə qədər bu addımı atmayıb, Rusiya da Ermənistanı buna məcbur etmir. Erməni silahlı birləşmələrinin Azərbaycan ərazisində qalması tamamilə qəbuledilməzdir. Prezident bəyan etdi ki, biz qalib ölkəyik, biz öz ərazi bütövlüyümüzü bərpa etmişik və əgər Ermənistan Azərbaycan ərazisindən öz silahlı birləşmələrini çıxarmaq istəmirsə, onda bizə bunu açıq desin. Dövlət başçısının mesajı aydındır. Təbii ki, bu halda Azərbaycanın Ermənistanı həmin silahlı birləşmələri ərazimizdən çıxarılmasına məcbur etməkdən başqa yolu qalmayacaq. Digər tərəfdən, Ermənistan rəhbərliyi yenə də hansısa status haqqında danışmağa başlamasının son zamanlar adi hala çevrilməsi də müşahidə olunur. Prezidentin vurğuladığı kimi, status haqqında danışmaq Ermənistan üçün çox təhlükəli məsələdir, biz də Zəngəzur üçün status tələb edə bilərik. Yenə də ölmüş Minsk qrupunu diriltmək cəhdləri də yolverilməzdir. Bu mənfi meyllər hələ ki, bu, hansısa bir ciddi fəsada çevrilməsə də, bunun qarşısı alınmasa, bir gün bunun fəsadı ola bilər”.
Parlamentin komitə sədri Azərbaycanın müharibə istəmədiyini vurğulayıb: “Ancaq bu meyli görməmək də mümkün deyil. Azərbaycan Prezidenti, Ali Baş Komandan bəyan etdi ki, biz bunu görürük, təsbit edirik, xəbərdarlıq edirik. Hərə də bu xəbərdarlıqdan öz payını alsın”.


Baxış sayı: 65


Bölməyə aid digər xəbərlər
23-07-2022, 14:57 DSX-də yeni təyinat