Milli dirçəlişimizin kökü Azərbaycan xalqının əzmkarlığına söykənir – Şahin İsmayılov
Tarix: 17-11-2021 21:39 | Bölmə: Siyasət


17 noyabr – Milli Dirçəliş Günü Azərbaycan tarixində xüsusi önəm daşıyan günlərdəndir. Bu gün xalqımızın öz hüquqlarını müdafiə etməsi üçün ayağa qalxması ilə ilə bağlıdır. Məhz belə bir milli oyanışın təşəkkülü bundan sonrakı dövrdə müstəqilliyimizin yenidən bərpa olunması və milli dəyərlərimizin qorunmasında misilsiz töhfələri ilə tarixə yazılıb. Milli dirçəlişimizin kökü Azərbaycan xalqının əzmkarlığına söykənir.
Azərbaycan xalqının 1988-ci il noyabrın 17-də başlayan uzunmüddətli mitinqlərində Azərbaycan hökumətinin iqtisadi əlaqələri kəsəcəyi haqqında Ermənistana qəti xəbərdarlıq etməsi, Topxana meşəsində nə işlərin görülməsinin televiziyada yayımlanması, Dağlıq Qarabağ Muxtar Vilayətində partiya və sovet orqanlarının buraxılması, orada Azərbaycanın hüquqi, siyasi və iqtisadi normalarının bərpa edilməsi, SSRİ Ali Sovetinin sessiyasında deputatların bu haqda məlumat verməsi kimi tələblər irəli sürülmüşdü. Azərbaycan xalqının bu tələbləri tarixi faktların əsasında müəyylənləşib. Belə ki, 1923-cü ildə sovet-bolşevik təsiri ilə yaradılan və regionda ədalətsizliyə səbəb olan Dağlıq Qarabağ Muxtar Vilayətinin ləğv edilməsi xalqımızın haqlı, ədalətli istəyi idi.
Mitinqdə irəli sürülən tələblərdən Dağlıq Qarabağ Muxtar vilayətinin ləğvi, Topxana meşəsi ilə bağlı məsələlərdə xüsusi diqqət çəkan məqamlar var.  Qondarma Dağlıq Qarabağ Vilayəti ilə bağlı məsələ bu hadisələrdən 30 il keçsə də öz həllini tapdı. Azərbaycan ordusunun Ermənistanı məğlub edərək öz ərazilərini işğaldan azad etməsi və Azərbaycanın güclü liderinin qətiyyətli mövqeyi ilə artıq belə bir qondarma vilayət yoxdur və heç bir zaman olmayacaq. Regionda lider dövlətə çevrilən Azərbaycan Respublikasının Prezidenti 2021-ci ilin 7 iyulunda "Azərbaycan Respublikasında iqtisadi rayonların yeni bölgüsü haqqında" Fərmanla Qarabağ və Şərqi Zəngəzur iqtisadi rayonlarını yaratdı. Qaydaları diqtə edən Azərbaycan Prezidenti belə bir muxtar vilayətin olmadığını və statusun olmayacağını qətiyyətləbəyan edib. O zaman gündəmdə olan Topxana meşəsi isə indi Azərbaycan tərəfindən yenidən bərpa edilir. Topxana meşəsini bərpa etmək rəmzi olaraq Qarabağa yeni nəfəsin qayıtdığını ifadə edir.
Şahin İsmayılov,
Milli Məclisin deputatı,
YAP İdarə heyətinin üzvü


Baxış sayı: 117


Bölməyə aid digər xəbərlər