Bütün xəbərlər
Demokratiya və azadlıq carçılarının növbəti susqunluğu
Tarix: 22-07-2020 18:31 | Bölmə: Siyasət
    Bu günlərdə Ermənistanı yenidən vətəndaş qarşıdurması dalğası bürüdü. Ermənistan prezidentinin və hökumətinin apardığı siyasəti tənqid etməsi nəticəsində “Çiçəklənən Ermənistan” Partiyasının sədri, fraksiya lideri Qaqik Sarukyanın deputatlığının ləğv edilməsi, siyasi təqiblərə və təzyiqlərəməruz qalması, tərəfdarlarına və jurnalistlərə qarşı təhlükəsizlik qüvvələri tərəfindən zor tətbiq edilməsi bir daha göstərdi ki, Paşinyan özünü toxunulmaz şəxs elan edib. Başqa sözlə desək, heç kim onu tənqid edə bilməz, əks halda həmin insanı və onun yaxınlarını böyük cəza gözləyir.
         Qeyd etmək lazımdır ki, Ermənistan artıq siyasi böhran içindədir. Ölkədə açıq şəkildə siyasi repressiyalar həyata keçirilir, totalitar inqilabi diktatura hökm sürür. Öz populist bəyanatları ilə gündəmə gəlmək istəyən Paşinyan isə ölkənin tanınmış ictimai və siyasi xadimlərini həbs etməyə davam edərək, xalqın və digər siyasi partiyaların dakəskin etirazına səbəb olur. Q.Sarukyanın ətrafında baş verən hadisələrlə əlaqədar olaraq, “Daşnaksütun”, “Vətən”, “Vahid Ermənistan” partiyalarının birgə bəyanatla çıxış etməsindən sonra keçmiş hakim Respublikaçılar Partiyası da öz etirazını bildirərək açıqlamasında yaşanan hadisələrin hökumətin istənilən repressiyaya əl atmağa hazır olduğunu göstərdiyini qeyd etmişdir. Onların fikrincə, bunun səbəbi hökumətin parlament və parlamentdənkənar dialoq yolu ilə müxalifətin heç bir tənqidinə əsaslandırılmış cavab vermək iqtidarında olmamasıdır. Bu o deməkdir ki, Paşinyan hakimiyyəti əlində zorla saxlayaraq, nəyin bahasına olursa olsun hakim rejimin idarəetməsindəki uğursuzluqlarını maskalamaq hədəfi güdür. Beləliklə, hakimiyyətin priorotet məqsədi avtoritar rejimi genişləndirməkdir ki, bunu da son günlərdəki siyasi təqiblər dalğası sübut edir.
         Ermənistanda baş verən hadisələrə Qərb dövlətləri, beynəlxalq qurumlar, vətəndaş cəmiyyəti, əcnəbi hüquq müdafiəçiləri isə birmənalı olaraq susqunluq nümayiş etdirirlər. Bəzi Qərb ölkələri özlərini demokratiyanın inkişaf yolundakı model, klassik demokrat hesab edirlər. Reallıqda isə onlar qeyri-obyektivlik göstərərək, Azərbaycanla bağlı ən xırda məsələyə reaksiya verdikləri halda, Ermənistanın ölkəmizə, xalqımıza qarşı illərdir yürütdüyü işğalçılıq siyasətinə, ölkədaxili qanunsuzluğa bir dəfə də olsa münasibət bildirməyərək ikili standartlara yol açırlar.
Bütün bunlar bir daha göstərir ki, başda ABŞ olmaqla, Avropa, Qərb dünyası, xüsusən də AŞPA və onun kimi özlərini demokratiyanın carçısı, insan hüquqlarının təminatçısı elan etmiş beynəlxalq qurumlar ilk növbədə özləri dünyada demokratikləşməyə, demokratik dəyərlərə böyük zərbə vururlar. Elə bu qurumların dəstəyi ilə işğalçı Ermənistan bu gün də öz əməllərini açıqca bəyan etməkdən çəkinmir. Əslində Qərbin demokratiya siyasəti özü artıq dünya xalqları üçün təhlükəyə çevrilmişdir. Son dövrlərin hadisələrinə nəzər salsaq, bu siyasəti heç şübhəsiz qeyri-sabitlik, müharibələr və qarşıdurmalar ifadələri ilə eyniləşdirmək mümkündür.
Bu da təsadüfi deyil, çünki ABŞ və Avropa Birliyi ölkələrində çoxlu sayda irqi və dini ayrıseçkilik halları ilə bağlı faktlar mövcuddur. Dünyaya demokratiya dərsləri öyrətməyə çalışan ABŞ insan hüquqları ilə əlaqəli 13 konvensiyanın 9-na qoşulmayıb. Avropa Birliyinə gəldikdə isə burada hələ də insan haqlarının vəziyyətinə nəzarət edən bir quruluş yoxdur.Bu baxımdan Ermənistanda baş verən hadisələrə bu cür dövlətlərin və beynəlxalq təşkilatların səssiz qalması təəccüb doğurmamalıdır. Onsuz da illərdir Azərbaycan həqiqətlərini görmək istəməyən, ikili standartlara xidmət edən və antiazərbaycan siyasəti yürüdən ermənipərəst təşkilatlar var. Bununla belə dövlətimiz hər zaman beynəlxalq qurumlarla, digər dövlətlərlə əlaqələrin inkişafına böyük əhəmiyyət verərək beynəlxalq hüququn prinsiplərinə tam əməl edir, mənəvi dəyərlərlə zəngin xalqımız isə dünyaya humanizm və tolerantlıq nümayiş etdirir.
Elvin Talışınski
Siyasi elmlər üzrə fəlsəfə doktoru, politoloq,
“Elin Səsi” Milli-Mənəvi Dəyərlərimizin Qorunması
İctimai Birliyinin sədri


Baxış sayı: 323


Bölməyə aid digər xəbərlər