YAŞASAYDI 65 YAŞI OLACAQDI...YAŞAMADI...DOYDU RUHUNU SIXAN DÜNYADAN...TƏLƏSDİ...
Tarix: 04-03-2021 22:20 | Bölmə: Ədəbiyyat



Tapılmadı bir simsarı,həyanı,
Ürəyini gözlərindən duyanı.
Bəh- bəh ilə bəy deyilən dünyanı,
Bəyənmədi Sabir Sarvan desinlər.

Dünya ilə könül bağı quranlar onun alına,malına deyil,mənasına aldanırlar.Sabir Sarvan da dünyayla söz bağı,könül bağı qurmuşdu,sözə könlünü vermişdi.Dərdlə yüklənəndə,dərdlə təklənəndə söz onu ovundururdu,könlünü alırdı,həmdəm olurdu,həmdərd olurdu.Söz ona ana olurdu,bala olurdu,yar olurdu.O,bu dünyadan sözdən başqa heç nə ummurdu.Gözünün yaşını sözlə silib,yaralarını sözlə sarıyırdı.Sözdən yaralanırdı.Sözdən vurulurdu.Sözdən sıxılırdı,sözdən yıxılırdı.Dünya da onu sözlə sınağa çəkirdi.Sözdən başqa bu dünyaya verəcək bir əmanəti də yoxdu.Dünya madar balasını əlindən alandan saxtını kəsmişdi dünyayla,arası sərin idi...

Elə sındırdın ki,özünə bəyi,
Qalmadı təpəri,qalmadı heyi.
Oldun yer bəzəyi,torpaq bəzəyi,
Beləmi vermişdi pay verən səni?!

Heç vaxt,heç kəsin gözünə sınıq görünmədi.Sınan yerini,bəyliyi,bəyzadəliyi ilə bəzədi, gizlədi,adamların içində özünü tox tutdu.Dərdi- qəmi özünə tay tutmadı.
Ay zalım adamlar,hərdən sizə elə acığım tutur... Bəzən bu dünyayla könül bağından,söz dağından başqa heç nəyi olmayan insanlardan elə çox şeylər umub,ruhunu,həyatını ağrıdırsınız ki...

Gözlərimin nuru kimi azalır
Üzü qiblə,sözü gerçək adamlar.
Hər görəndə bulandırır könlümü,
Qaraniyyət,qara milçək adamlar.

...Çiynim dönsə,əlinizdə daş oyaq,
Hərkəsənin öz yükü var ,daşıyaq.
Siz tor qurun,mən yol çəkim, yaşayaq,
Ay yarımçıq,ay hörümçək adamlar...

Üstünə şər- böhtan yağışı yağdırıb,üzünə duranlar ruhunu incidəndə sözə sığınmışdı,sözə gileylənmişdi.
Ölümə də yendirmədi.Gəlir- gəlsin-, dedi.Çünki ölməyəcəyindən əmin idi.Dünyasını dəyişirdi.Onu bu dünyada əbədiləşdirəcək 5 kitablıq söz,ədəbiyyatımız üçün vicdanla gördüyü işlər və insanların sevgisi yaşadacaqdı.Bundan əmin idi...Məqamın uca olsun,SABİR SARVAN!


Gülnarə Cəmaləddin


Baxış sayı: 260


Bölməyə aid digər xəbərlər
12-06-2021, 15:09 Çingiz Qacar vəfat etdi
30-05-2021, 12:50 Əziz Musa vəfat etdi
8-05-2021, 23:25 ELMDƏN UCA -Ramiz QASIMOV