22:59 / 15-04-2024
Məsciddə yanğın törədib
Bütün xəbərlər
Qazanılan uğurlar təsdiqləyir ki, Azərbaycan hər bir hədəfə zamanında nail olur
Tarix: 15-02-2024 23:14 | Bölmə: Siyasət

Qazanılan uğurlar təsdiqləyir ki, Azərbaycan hər bir hədəfə zamanında nail olur


Fevralın 7-də keçirilən növbədənkənar prezident seçkiləri yeni dövrün başlanğıcı oldu. Seçkilərdə xalqın 92,12 faiz səsini qazanaraq Azərbaycan Respublikasının Prezidenti seçilən İlham Əliyevin fevralın 14-də Milli Məclisdə andiçmə mərasimi keçirildi. Bundan sonra da Azərbaycanın hərtərəfli inkişafı, ərazi bütövlüyümüzün qorunması üçün əlindən gələni əsirgəməyəcəyini bildirən dövlətimizin başçısı nitqində son 20 ildən artıq dövrdə Azərbaycan xalqının dəstəyi ilə görülən işlərdən, qazanılan uğurlardan, qələbələrdən geniş bəhs etdi. Bir daha vurğulandı ki, 2003-cü ildə verilən bütün vədlər yerinə yetirildi. Əldə edilmiş bütün nailiyyətlərin mənbəyi Azərbaycan xalqı, onun Prezidentə göstərdiyi inam və vahid amal ətrafında birləşmə bacarığıdır.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib. “Azərbaycan xalqı dünyaya sübut edib ki, böyük xalqdır, öz taleyimizi özümüz həll edirik. Ölkəmiz bu illər ərzində sürətli inkişaf yolu keçdi, tarixi nailiyyətlər qazandı. Hər bir ölkənin tərəqqisində əsas amil olan iqtisadiyyatın inkişafı istiqamətində atılan addımlar və uğurlu nəticələr bu gün işğaldan azad edilmiş ərazilərimizdə aparılan genişmiqyaslı bərpa-quruculuq işlərində özünün aydın ifadəsini tapır. Son 20 ildən artıq dövrün reallıqları fonunda güclü Azərbaycanı görür və bundan böyük qürur hissi keçiririk. Dövlətimizin başçısı İlham Əliyev andiçmə mərasimində bu məqamı xüsusi vurğuladı ki, güclü Azərbaycan həmişə hədəfimiz olub. Əgər güclü Azərbaycan qurmasaydıq, kimdənsə istər siyasi, istər iqtisadi sahədə asılı olsaydıq, heç vaxt ərazi bütövlüyümüzü bərpa edə bilməzdik”, - deyə o əlavə edib.
Malik Həsənov İlham Əliyevin 2018-ci ildə keçirilən andiçmə mərasimində çıxışı zamanı qarşıya qoyduğu hədəflərdən danışaraq bildirib: “Bu gün bu çağırışların hər biri reallıqda öz əksini tapıb. Azərbaycan həmin andiçmə mərasimindən cəmi 2 il yarım sonra Müzəffər Ali Baş Komandan İlham Əliyevin qətiyyəti, ordumuzun gücü, xalqımızın yumruq kimi birliyi sayəsində torpaqlarımızın böyük bir hissəsini azad etdi. Şəhidlərimizin və on minlərlə Azərbaycan gəncinin şücaəti, fədakarlığı, qəhrəmanlığı sayəsində bu gün ərazi bütövlüyümüzü, öz ləyaqətini bərpa edən xalq kimi yaşayırıq, şəhər və kəndlərimizi yenidən qururuq. Prezident İlham Əliyev hər bir çıxışında ərazi bütövlüyümüzün və suverenliyimizin tam bərpa olunmasının əsas hədəf olduğunu bildirmişdi. Tarixi Zəfərimizdən üç il sonra suverenliyimizin bərpa olunması ilə ölkəmizin həyatında yeni dövr başladı”.
Deputat onu da əlavə edib ki, müharibədən sonrakı dövrdə də Azərbaycan bütün məsələlərdə prinsipial mövqeyini göstərib. Ermənistanın üzərinə düşən öhdəlikləri yerinə yetirməməsi, mütəmadi hərbi təxribatlar törətməsi bir günlük antiterror tədbirlərini qaçılmaz etdi. Azərbaycan Silahlı Qüvvələrinin ötən il sentyabrın 19-da həyata keçirdikləri lokal antiterror tədbirləri nəticəsində suverenliyimiz tam təmin olundu. Azərbaycan ərazisində seperatizmin kökü kəsildi.
Malik Həsənov bildirib ki, dövlətimizin başçısı fevralın 14-də andiçmə mərasimindəki nitqində yeni dövrün hədəflərini də açıqladı. Nitqində bu çağırışı səsləndirdi: “Əgər əvvəlki dövrdə xarici siyasətimizin əsas istiqaməti Ermənistan-Azərbaycan münaqişəsinin həlli idisə, bu gün artıq bu məsələ gündəlikdə durmur. Xarici siyasətimizin yeni istiqamətləri üstünlük təşkil etməlidir”.
“Qazanılan uğurlar, zəfərlər, həmçinin müəyyənləşdirilən yeni hədəflər bu reallığı təsdiqləyir ki, Azərbaycan daim irəli baxır. Hər bir hədəfə zamanında nail olur. İrəli sürdüyü təşəbbüslər beynəlxalq dəstək qazanır. Hər bir enerji layihəsinin uğurlu sonluqla başa çatması əməkdaşlığın coğrafiyasının genişləndirilməsində əhəmiyyətli rol oynayır. Avropa ilə Asiyanın qovşağında yerləşən Azərbaycan müxtəlif mədəniyyətləri, dinləri bir araya gətirir, dostluq körpüsü yaradır. Azərbaycan daim ənənələri olan ölkə kimi dəyərləndirilir. İlham Əliyev andiçmə mərasimindəki nitqində bir daha bu çağırışı etdi: “Biz elə bir gənc nəsil yetişdirməliyik ki, onlar da daim bizim kimi milli ənənələrə, milli-mənəvi dəyərlərə sadiq olsunlar, onların beyinləri saf olsun”. Bunun üçün bütün cəmiyyətin həmrəy olması vacib amildir. Bu gün belə bir həmrəyliyin şahidiyik. Prezident İlham Əliyev 7 fevral prezident seçkilərinin fonunda bu məqamı xüsusi qeyd etdi ki, seçkilərdə göstərilən həmrəylik cəmiyyətimizi bir qaya kimi möhkəmləndirir və belə olan halda heç bir kənar qüvvə bizə qarşı heç bir məkrli plan həyata keçirə bilməz”, - deyə deputat bildirib.
Malik Həsənov Prezident İlham Əliyevin nitqindəki hər bir çağırışın güclü Azərbaycanın qarşısında geniş imkanlar açdığını vurğulayıb.


Baxış sayı: 66


Bölməyə aid digər xəbərlər