Bütün xəbərlər
Ümid yeri Azərbaycanın mərd oğlu Heydər Əliyev idi-Şahin İsmayılov
Tarix: 21-11-2023 20:44 | Bölmə: Siyasət


Hər bir ölkənin gələcəyi ona rəhbərlik edən liderlərdən bilavasitə asılıdır. Müstəqil Azərbaycanın siyasi həyatında Ulu Öndər Heydər Əliyev kimi  şəxsiyyət olmasaydı bu gün dünya çapında öz sözünü deyən Azərbaycan dövləti ən azından bugünkü qədər qüdrətli olmazdı. Müstəqilliyin bərpasından sonra ölkə ağır günlər yaşayırdı. Baş verən siyasi proseslər müstəqilliyimizin qorunub saxlanımasını sual altına qoyurdu. Ziyalıların təklifi ilə Yeni Azərbaycan Partiyasının yaradılması və Heydər Əliyevin partiyaya rəhbər seçilməsi, daha sonra xalqın təkidli tələbi ilə Ulu Öndərin hakimiyyətə qayıtması müasir tariximizdə dönüş nöqtəsi oldu. İdarəolunmaz hala gələn ictimai-siyasi proseslər yalnız böyük təcrübəyə sahib, bununla yanaşı xalqına, vətəninə ürəkdən bağlı olan Heydər Əliyev tərəfindən nizamlana bilərdi. Müstəqilliyin bərpasınadək Azərbaycan üçün göstərdiyi xidmətlərlə yanaşı, müstəqilliyin bərpasından sonra Naxçıvanda görülən işlər də Ulu Öndər Heydər Əliyevə olan inamın artmasına əsas vermişdi.Siyasi hakimiyyətin səriştəsizliyinə görə yaranan xaos, hərc-mərclik xalqı narahat edirdi. Xalqın müqəddəratını təyin etmək üçün ciddi bir irəliləyişə ehtiyac duyulurdu. Ümid yeri Azərbaycanın mərd oğlu Heydər Əliyev idi.
1992-ci ilin sonları müasir Azərbaycan tarixində xalq üçün ən yaddaqalan zamanlardan biridir.Oktyabrın 16-da bir qrup ziyalı Azərbaycan xalqının iradəsini əks etdirən çağırış etdi. Onlar Ulu Öndər Heydər Əliyevə müraciət edərək yeni bir siyasi partiyanınyaradılması və onun partiyaya rəhbər gəlməsini xahiş etdi. Bununla da güclü və qüdrətli Azərbaycan üçün səfərbər olan yeni bir siyasi təsisatın yaradılması istiqamətində hazırlıq işləri başladı. Noyabrın 21-də ölkənin bütün regionlarını təmsil edən, 550 nəfərdən ibarət təşəbbüs qrupunun üzvlərinin iştirakı ilə təsis konfransı keçirildi. Həmin gün Azərbaycanın siyasi həyatında xüsusi rol oynayan tarixi bir gündür.
Yeni Azərbaycan Partiyası yarandığı gündən ölkənin çətin durumdan çıxarılması üçün ciddi fəaliyyət göstərməyə başladı. Böyük siyasətçi Heydər Əliyevin rəhbərliyi altında fəaliyyət göstərən partiya öz ətrafında xalqına və vətəninə xidmət etməyə can atan çox sayda insanları cəlb etdi. Təbii ki, partiyanın başlıca məqsədi xalqın dəstəyi ilə hakimiyyətə gəlib vətəni xilas etmək idi. Ulu Öndər Heydər Əliyevin hakimiyyətə gəlişindən sonra Azərbaycanı çətin durumdan çıxartmaq, böhran şəraitini minimuma endirmək və ölkəni durmadan inkişaf etdirmək üçün böyük vəzifələrin icrasına başlandı. Partiya bütün dövrlərdə hərtərəfli fəaliyyət göstərməklə öz ali məqsədlərinə doğru irəlilədi. Siyasi idarəetmənin təkmilləşdirilməsi, iqtidar-xalq birliyi, iqtisadiyyatın inkişaf etdirilməsi, ordu quruculuğu, beynəlxalq müstəvidə nüfuz qazanılması və bu kimi əsas fəaliyyətlər uğurlaicra edildi.Xalqın sevgisini qazanan YAP yarandığı gündən bugünkü tarixə qədər bütün seçkilərdə qələbə qazanmışdır. Bu amil partiyanın həyata keçirdiyi uğurlu fəaliyyətin xalq tərəfindən yüksək qiymətləndirilməsinin bariz nümunəsidir.
Ümummilli Lider Heydər Əliyevin siyasi kursununun layiqli davamçısı olan cənab Prezident İlham Əliyev Yeni Azərbaycan Partiyasının sədri olaraq Ulu Öndər tərəfindən əsası qoyulan siyasi idarəetməni uğurla icra edir. O, Azərbaycanı daha da inkişaf etdirib qalib ölkəyə çevirməklə Ulu Öndərin qarşıya qoyduğu hədəfləri tamamlamışdır. Azərbaycan xalqı ölkəmizin günbəgün inkişaf edəcəyinə əmindir və bu səbəbdən Prezident İlham Əliyevin ətrafında sıx birləşməyə davam edəcək. Bu, Yeni Azərbaycan Partiyasının ümumxalq partiyası olduğunu göstərir.

Şahin İsmayılov,
 Milli Məclisin deputatı,
YAP İdarə Heyətinin üzvü


Baxış sayı: 176


Bölməyə aid digər xəbərlər