Bütün xəbərlər
Əldə olunan genişmiqyasılı uğurlar iqtidarın gərgin əməyinin bəhrəsidir-Şahin İsmayılov
Tarix: 31-03-2023 13:13 | Bölmə: Siyasət


Azərbaycan dövlətinin siyasi dialoqla bağlı təşəbbüsləri özündə demokratik inkişafı, iqtisadi azadlıqların bərqərar olması, siyasi partiyaların güclənməsi üçün münbit şərait yaradılması və bu kimi bir sıra məsələləri təcəssüm edir. Ölkə başçısı sağlam dialoq mühitini siyasi dəyər kimi təsvir etmiş və onun tapşırığı ilə bu sahədə müsbət mənada fərqlənən çoxsaylı işlər görülmüşdür. Bütün bunlar siyasi sistemin gücləndirilməsi, bununla da ölkənin inkişafına xidmət etmişdir. Hakim Yeni Azərbaycan Partiyası iqtidar olaraq xalqa və dövlətçiliyə yönələn fəaliyyətini uğurla həyata keçirməkdədir. Siyasi dialoq mühitinin inkişaf etdirilməsi və siyasi partiyaların ölkənin ictimai-siyasi həyatında iştirakının artırılması istiqamətində görülən işlər də bu fəaliyyətin tərkib hissəsidir. Azərbaycanın inkişafı və dünyada artan nüfuzu göz qabağındadır. Təbii ki, əldə olunan genişmiqyasılı uğurlar iqtidarın gərgin əməyinin bəhrəsidir.
Son illərin siyasi dialoqla bağlı tarixçəsinə nəzər salanda bir neçə xüsusi məqamı qeyd edə bilərik. Bunlardan biri Vətən müharibəsi zamanıantimilli partiyalardan başqa əksər partiyaların birliyi idi. Digər önəmli faktorlardan biri də “Siyasi Partiyalar Haqqında” yeni qanun layihəsinin qəbul edilməsi idi. Bəzi dairələr qanun layihəsi ilə bağlı çaşqınlıq yaratmağa çalışsalar da bu niyyətləri baş tutmadı. Çünki, bu qanunvericlilik aktı siyasi sistemin inkişafına yönələn növbəti mütərəqqi addımdır.Qanun layihəsinin müzakirəsi zamanı rəy və təkliflərin bildirilməsi üçün lazımi şəraitin yaradılması, eləcə də ictimai dinləmələrin keçirilməsi, ictimai rəy sorğusunun keçirilməsi, ictimai rəy və Milli Məclisin iclaslarından sonra müsbətə doğru 100-dən çox düzəlişin edilməsi, Venesiya Komissiyasının tövsiyələrinin nəzərə alınması şəffaflığı və qanun layihəsinin əhəmiyyətini xarakterizə edir. Qanununun müsbət cəhətləri kimisiyasi partiyaların rəqabətə dözümlülüyü, ictimaiyyətə yaxınlığı, fəliyyətsizlikdən dolayı bəzi dairələrin təsiri altına düşməsi riskinin minimuma endirilməsi kimi önəmli arqumentləri vurğulaya bilərik.
Prezident İlham Əliyevin siyasi sistemdə sağlam müxalifətçiliyin əhəmiyyətini bildirən fikirləri bütün partiyalar üçün yol xəritəsi kimi qəbul edilməlidir. Cənab Prezidentin“müxalifət nümayəndələri bəzən iqtidar nümayəndələrinin görmədiyi qüsurları görürlər, onları dilə gətirirlər, onları diqqətə çatdırırlar və bu, çox müsbət haldır” - deyə qeyd etməsi də onun ölkədə siyasi plüralizmə göstərdiyi diqqətdir. Ali Baş Komandanın dövlətçilik və xalqımızın əmin amanlığı üçün qeyd etdiyi daha bir fikri isə siyasi ideologiya kimi qəbul edilməlidir: bütün siyasi qüvvələr üçün bir amal, bir məsələ toxunulmaz olmalıdır, bu da bizim müstəqilliyimiz, dövlətçiliyimiz və dövlət maraqlarıdır.

Şahin İsmayılov,
Milli Məclisin deputatı,
YAP İdarə Heyətinin üzvü


Baxış sayı: 156


Bölməyə aid digər xəbərlər