Bütün xəbərlər
Əliyev tərəfindən aparılan bütün islahatlar Azərbaycan dövlətinin milli maraqlarına xidmət edir-Kamilə Əliyeva
Tarix: 10-03-2023 19:33 | Bölmə: Siyasət


Prezident cənab İlham Əliyev hər zaman dövlətin inkişafının sürətləndirilməsi üçün islahatların aparılmasının vacibliyini vurğulayır. Aparılan islahatlar ölkəmizin sosial-iqtisadi vəziyyətinə müsbət təsir etməklə yanaşı cəmiyyətdə dövlətə, dövlət başçısına inamı artırmışdır. 2018-ci ildən başlayaraq Prezident cənab İlham Əliyevin tapşırığına əsasən mərkəzi və yerli icra strukturları da daxil olmaqla bütün sahələrdə köklü islahatlara start verildi.
Azərbaycan Respublikasının Milli Məclisi də ölkəmizdə aparılan islahatlardan kənarda qalmadı. V çağırış Milli Məclis özünün buraxılması və vaxtından əvvəl parlament seçkilərinin keçirilməsi haqqında qərar qəbul etdi. 2020-ci ilin fevral ayında VI çağırış Milli Məclisə deputat seçkiləri baş tutdu və parlamentə təcrübəli deputatlarla yanaşı savadlı gənclərimiz də seçildi. Ölkə başçımız cənab İlham Əliyev 10 mart 2020- ci il tarixdə VI çağırış Milli Məclisin ilk iclasında ölkədə aparılan dərin islahatlar barədə ətraflı çıxış etdi.
Azərbaycanda keçirilən parlament seçkilərinı müşahidə edən bütün beynəlxalq təşkilatlar seçkilərin demokratik, tam şəffaf şəraitdə keçirildiyini qeyd etdilər. Vl çağırış Milli Məclis çoxpartiyalı parlament olaraq formalaşdı. Azərbaycanda fəaliyyət göstərən bütün siyasi partiyalar seçkilərdə iştirak etmişdilər. Müxalifət partiyalarının nümayəndələrinin VI çağırış Milli Məclisin rəhbərliyində və komitələrin rəhbərliyində təmsil olunması sübut edir ki , Azərbaycanda demokratik dəyərlərə, eləcə də siyasi münasibətlərin sağlamlaşdırılmasına böyük əhəmiyyət verilir.
Prezident cənab İlham Əliyev tərəfindən ölkəmizdə kadr siyasəti həyata keçirilməyə başladı. Bəzi yerli icra orqanlarında baş vermiş rüşvətxorluq, digər xoşagəlməz hallar aşkarlandı. Onların bu əməlləri ifşa olundu və qanun qarşısına çıxarıldı. Prezident cənab İlham Əliyev bütün çıxışlarında dəfələrlə məmurlara vicdanla işləmək, xalqa xidmət etmək tapşırığını verib.
Milli Məclisdə çıxışında Prezident cənab İlham Əliyev deputatlar qarşısında böyük vəzifələrin durduğunu, Azərbaycan dövlətinin güclənməsi və xalqın rifahının yüksəldilməsi üçün möhkəm əsasları olan qanunların qəbul edilməsinin vacibliyini vurğuladı. Prezident cənab İlham Əliyev aparılan kadr islahatlarında gənclərə böyük etimad göstərərək onları yüksək vəzifələrə təyin etdi. Ölkə başçımız hər zaman Azərbaycanın xoşbəxt gələcəyinin gənclərdən asılı olduğunu vurğulayır. Vəzifəyə təyin olunmuş gənclərimiz də Prezident cənab İlham Əliyevin onlara göstərdiyi etimadı doğrultmağa çalışırlar. Azərbaycanda aparılan bu köklü islahatlar ölkəmizin güclənməsinə xidmət edən amillərdəndir.
Bu gün beynəlxalq aləmdə Azərbaycanın nüfuzu durmadan artmaqdadır. Ölkəmiz dünyada iqtisadi, siyasi cəhətdən güclü bir dövlətə çevrilmişdir. Azərbaycanın bu inkişafını gözü götürməyən bəzi xarici qüvvələr ölkəmizdə yeni beşinci kalon yaratmaq niyyətindədir. Bu yolu tutanlar bilməlidilər ki, Vətənə, dövlətə, xalqa qarşı xəyanət ən böyük cinayətdir.
Bu gün ölkəmizdə siyasi sabitlik hökm sürür. Hər bir Azərbaycan vətəndaşı bu sabitliyi, əmin-amanlığı qorumağa borcludur. Prezident cənab İlham Əliyev tərəfindən aparılan bütün islahatlar Azərbaycan dövlətinin milli maraqlarına xidmət edir.

Kamilə Əliyeva,
Milli Məclisin deputatı, professor


Baxış sayı: 193


Bölməyə aid digər xəbərlər