Bütün xəbərlər
Məmur da, sadə vətəndaş da bilməlidir ki, Azərbaycan demokratik dövlətdir və qanun hər kəsdən və hər şeydən ucadır-Kamilə Əliyeva
Tarix: 02-08-2022 13:08 | Bölmə: Siyasət


Son illər respublikamızın bütün rayonlarında böyük quruculuq və abadlıq işləri aparılır. Ölkə rəhbərliyinin qəbul etdiyi, rayonların sosial-iqtisadi inkişafına dair Dövlət Proqramının icrası nəticəsində hər bir şəhərimiz inkişaf edərək müasirləşir. Böyük şəhərlərimiz Bakı ilə rəqabət apara biləcək qədər inkişaf edir və gözəlləşir. Bu gün elə bir rayonumuz yoxdur ki, orada ən müasir tipli xəstəxana, məktəb binaları olmasın. Regionlarımız tam olaraq elektrik enerjisi ilə təmin olunub, qazlaşdırma 100 faizə yaxınlaşır. Ən ucqar dağ rayonlarımız belə bu gün qazla təchiz olunur və bu istiqamətdə işlər davam etdirilir.
Rayonlarımızda infrastruktur layihələrin həyata keçirilməsi ilə yanaşı əhalinin işlə təmin olunması üçün Prezident cənab İlham Əliyev regionlarda yeni müəssisələrin yaradılmasına xüsusi diqqət ayırır. Yeni müəssisələrin yaradılması üçün dövlət tərəfindən sahibkarlara böyük imkanlar yaradılır.
Prezident cənab İlham Əliyev Masallı, Lerik və Göygöl rayonlarının yeni icra başçılarının təyin olunması ilə əlaqədar çıxışı zamanı icra başçılarının qarşısında duran ən vacib vəzifənin dövlətə, xalqa vicdanla xidmət etməli olduğunu vurğuladı.
Vəzifəyə təyin olunan hər bir icra başçısı hər zaman xalqla birlikdə olmalı, onları narahat edən problemləri öz səlahiyyətləri daxilində həll etməyə borcludur. Prezident cənab İlham Əliyev tərəfindən onlara göstərilən etimadı doğrultmalıdılar. Təəssüf ki, bəzi icra başçıları onlara göstərilən etimadı doğrultmadılar, ölkə başçımızın onların qarşısına qoyduğu vəzifələri vicdanla yerinə yetirmək əvəzinə qeyri qanuni əməllərə, rüşvətxorluğa, korrupsiyaya qurşandılar. Prezident cənab İlham Əliyev dəfələrlə vurğulamışdır ki, rüşvətxorluğa və korrupsiyaya qarşı hər zaman sərt və barışmaz mövqe nümayiş etdirəcək. Kimliyindən asılı olmayaraq qanuna zidd hərəkət edən hər kəs aşkarlanaraq qanunun tələblərinə müvafiq cəzalandırılacaq.
Azərbaycan dövlətinin, şəxsən Prezident cənab İlham Əliyevin daxili və xarici siyasətinin əsasını Azərbaycan xalqının rifah halında yaşaması təşkil edir. Alternativi olmayan bu siyasətin nəticəsidir ki, Azərbaycanda xalq - iqtidar həmrəyliyi mövcuddur və bunun sayəsində Ermənistanın işğalçılıq siyasətinə son qoyduq və torpaqlarımızı işğaldan azad etdik. Torpaqlarımızı işğaldan azad edərkən şəhid olmuş hərbiçilərimizin ailə üzvlərinə və müharibə əlillərinə dövlət tərəfindən xüsusi diqqət ayrılır. Şəhid ailələrinin və müharibə əlillərinin sosial məişət problemləri həll olunur, onlar mənzillər və fərdi evlərlə təmin olunurlar. Bu qəbildən olan insanlarımızın işlə təmin olunması üçün dövlətimiz tərəfindən bütün tədbirlər həyata keçirilir. İgid əsgər və zabitlərimizin qəhrəmanlığı nəticəsində biz torpaqlarımızı işğaldan azad etmişik. Dövlət məmurunun da, sadə vətəndaşımızın da borcudur ki, bu insanlara kömək və dayaq olsun. Prezident cənab İlham Əliyev hər zaman dövlət qurumlarından şəhid ailələrinə və müharibə əlillərinə xüsusi qayğı ilə yanaşmalarını tələb edir.
Çıxışında Prezident cənab İlham Əliyev sahibkarların fəaliyyətinə qanunsuz müdaxilə edən bəzi icra başçılarına da ciddi xəbərdarlıq etdi.
Turizm dövlət büdcəsinə ən çox gəlir gətirən sahələrdən biridir. Azərbaycan turizmin inkişaf etdirilməsi üçün çox gözəl təbii, coğrafi imkanlara malikdir. Yerli icra orqanları turizmin inkişaf etdirilməsi üçün sahibkarları bu işə cəlb etməli və onlar üçün lazımi şərait yaratmalıdılar. Bu gün Bakı şəhəri də daxil olmaqla bəzi rayonlarda torpaqların qanunsuz mənimsəmə hallarına rast gəlinir. Bu hallara yol verən istər məmurlar, istərsə də yerli icra orqanlarının nümayəndələri qanunla ciddi şəkildə cəzalandırılır. Prezident cənab İlham Əliyev tərəfindən idarəetmədə aparılan ciddi islahatlar nəticəsində nöqsanlara yol verən bütün vəzifəli şəxslər vəzifələrindən uzaqlaşdırılır və demokratik fikirli, təmiz düşüncəli kadrlar vəzifələrə təyin olunurlar. Bu gün məmur da, sadə vətəndaş da bilməlidir ki, Azərbaycan demokratik dövlətdir və qanun hər kəsdən və hər şeydən ucadır.

Kamilə Əliyeva,
Milli Məclisin deputatı, professor



Baxış sayı: 346


Bölməyə aid digər xəbərlər