"Müqəddəs Taxt-Tacda Azərbaycan səfirliyinin açılması ikitərəfli diplomatik münasibətlərin dərinləşməsinə böyük töhfə olacaq". 
"AzPolitika.info" xəbər verir ki, bunu Milli Məclisin Təbii ehtiyatlar, energetika və ekologiya komitəsinin sədri, millət vəkili Sadiq Qurbanov Milli Məclisin bu gün keçirilən plenar iclasında “Azərbaycan Respublikasının Müqəddəs Taxt-Tacda səfirliyinin təsis edilməsi haqqında” qanun layihəsinin müzakirəsi zamanı deyib.
Deputat, Milli Məclisin stenoqramına təqdim etdiyi çıxışında Vatikanla Azərbaycanın diplomatik münasibətlərinin müstəqliyin ilk illərindən qurulduğunu xatırladıb. Eyni zamanda 1997-ci ilin sentyabr ayında Ümummilli Lider Heydər Əliyevin İtaliyada Vatikan rəhbəri ilə görüşünün bu əlaqələrə təkan verdiyini qeyd edib. Komitə sədrinin sözlərinə görə, ölkəmiz yeganə İslam dövlətidir ki, XX əsrdə Azərbaycanda katolik kilsəsi tikilib.

"Sonrakı illərdə Prezident İlham Əliyev və Birinci vitse-prezident Mehriban Əliyeva tərəfindən ikitərəfli münasibətlər daha da inkişaf etdirilib", - millət vəkili fikirlərinə əlavə edib.
S.Qurbanov xatırladır ki, Vatikan - Azərbaycan münasibətlərinin hüquqi bazasını iki ölkə arasında bağlanmış 1 saziş və 7 sahə üzrə əməkdaşlıq müqaviləsi əhatə edir. "Yeni yaradılacaq səfirlik bu hüquqi bazanın daha da təkmilləşdirilməsinə çalışmalıdır", - deyə o qeyd edib.

                  
Komitə sədri bildirib ki, Vatikan-Azərbaycan münasibətlərinə təkcə ikitərəfli münasibətlər kontektsində baxmaq düzgün olmazdı: "Mədəniyyətlər və dinlər arasında dialoq, multikulturalizm ənənələrinin dünyaya tanıdılması Azərbaycanın xarici siyasətinin ən vacib konponentlərindəndir. Təsadüfi deyil ki, Azərbaycan Prezidentinin təşəbbüsü ilə 2008-ci ildə başlamış “Bakı Prosesi” çoxsaylı beynəlxalq tədbirlər və layihələr vasitəsilə sivilizasiyalar və dinlər arasında dialoqun inkişafına böyük töhfələr verməkdədir. Bu, BMT Baş katibinin 72/488 saylı “Dünyanın rifahı naminə sülh mədəniyyətinin, dinlərarası və mədəniyyətlərarası dialoqun, qarşılıqlı anlaşmanın və əməkdaşlığın təşviqi” adlı məruzəsində də öz əksini tapıb. Həmçinin Azərbaycanın 2016-cı ilin aprelində BMT-nin Sivilizasiyalar Alyansının 7-ci Qlobal Forumuna və Ümumdünya Mədəniyyətlərarası Dialoq Forumu və Beynəlxalq Humanitar Forumuna ev sahibliyi etməsi də bu sahədə aparılan sistemli işin təzahürüdür". 
Sadiq Qurbanovun sözlərinə görə, Vatikanla-Azərbaycan mədəni əlaqələrinin inkişaf etdirilməsində Birinci vitse-prezident Mehriban Əliyevanın rolu yüksək qiymətləndirliməlidir: "Heydər Əliyev Fondunun dəstəyi ilə Pio-Klementino muzeyində mədəni abidələrin və incəsənət nümunələrinin bərpa edilməsi Vatikan rəsmiləri tərəfindən yüksək qiymətləndirilib. Mədəni əlaqələrin inkişafı nəticəsində Vatikanın gizli arxivlərində, o cümlədən Apostil kitabxanasından Azərbaycana aid yüzlərlə məxfi arxiv sənədlərinin ölkəyə gətirilməsi mükün olub. Orta əsrlərə aid bu sənədlərdə Elxanilər, Qaraqoyunlular, Səfəvilər və Qacarlar dövlətlərinin hökmdarlarının Vatikana məktubları və onlara yazılmış cavablar, müxtəlif missionerlərin hesabatları və s. sənədlər daxildir. Bu sənədlərdə Azərbaycan tarixinin müxtəlif məqamlarına işıq salmaq həmin dövrün etno-siyasi mənzərəsini daha dərindən öyrənmək mükündür".