Bütün xəbərlər
Heydər Əliyevin Azərbaycan xalqı və dövləti qarşısındakı misilsiz xidməti hər bir azərbaycanlıya məlumdur-Şahin İsmayılov
Tarix: 14-10-2021 21:58 | Bölmə: Siyasət

Oktyabr müasir Azərbaycan tarixində zəngin hadisələrlə bol olan aydır. Məhz bu ayda Azərbaycan öz müstəqilliyini bərpa etdi, Ulu öndər Heydər Əliyev ölkə prezidenti seçildi.Müasir tariximizdə isə Vətən müharibəsi zamanı bir çox ərazilərimizin işğaldan azad edilməsidə oktyabra təsadüf etdi. Bu ayı xalqımız üçün əlamətdar edən, həm də Prezident İlham Əliyevin ilk dəfə 15 oktyabr 2003-cü ildə xalqın böyük əksəriyyətinin səsini toplayaraq Prezident seçilməsidir.
Ümummilli liderimiz, dünya miqyaslı siyasətçi Heydər Əliyevin Azərbaycan xalqı və dövləti qarşısındakı misilsiz xidməti hər bir azərbaycanlıya məlumdur. Ulu öndərin ən böyük xidmətlərindən biri də məhz İlham Əliyevi siyasi varisi elan etməsidir. “İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə bö­yük ümidlər bəsləyirəm”- deyən Ulu öndər son nəfəsində də Azərbaycanı fikirləşdi və öz fikirlərində yanılmadı.Prezident İlham Əliyevin hakimiyyəti dönəmində Azərbaycan inkişafının yeni mərhələsinə qədəm qoydu. Hakimiyyətinin mərkəzində Azərbaycan xalqı və Azərbaycan ərazilərinin bərpası fəlsəfəsi duran İlham Əliyev qarşıda duran bütün hədəflərə çatdı. Qısa müddətdə Azərbaycan dünyada öz inkişaf modeli ilə tanındı, qəbul olundu. Bütün sahələrdə böyük uğurlar qazanan Azərbaycan regionun güc mərkəzinə çevrildi. Bu regionda həyata keçirilən bütün qlobal layihələr məhz Azərbaycanın razılğından sonra həyata keçirildi. Bir sıra böyük proyektlər isə Azərbaycanın maliyyə imkanları nəticəsində baş tutdu.
Hər bir azərbaycanlının Prezidenti olan ilham Əliyevin hakimiyyəti dövründə   ölkədə 2 milyona yaxın yeni iş yeri açılmış, maaşlar 5 dəfədən, pensiyalar isə 8 dəfədən çox artırılmışdır. İşsizlik səviyyəsi 5 faizə düşmüş, yoxsulluq isə 49 faizdən 5 faizə endirilmişdir.
Azərbaycan bu müddət ərzində nəqliyyat dəhlizlərində fəal iştirak etmiş, Avrasiyada mühüm tranzit və logistika mərkəzlərindən birinə çevrilmişdir. Məhz Prezident İlham Əliyevin təşəbbüsü ilə Avropa və Asiyanı birləşdirən Şərq – Qərb və Şimal – Cənub beynəlxalq nəqliyyat dəhlizlərinin yaradılması istiqamətində böyük işlər görülmüş, Bakı–Tbilisi–Qars dəmir yolunun Bakıda rəsmi açılışı olmuşdur. Azərbaycanın Rusiya Federasiyası, İran və Gürcüstanla sərhədinə qədər yeni magistral avtomobil yolları inşa edilmişdir.
Ali Baş Komandan olaraq da İlham Əliyev qarşıda duran ən böyük hədəfə, Azərbaycanın ərazi bütövlüyünə nail olmuşdur. Cəmi 44 gün ərzində Müzəffər Ali Baş Komandan və onun qurduğu Şanlı Azərbaycan Ordusu erməni mifini dağıtmış və Azərbaycanın ərazi bütövlüyünü bərpa etmişdir. Azərbaycanın Vətən müharibəsində istifadə etdiyi döyüş metodları dünya hərb tarixində yeni səhifə açdı və müharibələrin gedişatını dəyişdi.
İndi isə qarşıda daha böyük hədəflər var. Hər bir azərbaycanlı çox gözəl başa düşür ki, bu hədəflərə yalnız Prezident İlham Əliyevlə birgə nail olmaq olar. Bölgədə Azərbaycanın yaratdığı yeni reallıqlar artıq hər kəs tərəfindən qəbul olunur, hörmət edilir. Azərbaycan xalqı əmindir ki, Azərbaycanın uğurlu gələcəyi məhz Prezident İlham Əliyevlə bağlıdır. Ona görə də xalqımız hər zaman onun ətrafında dəmir yumruq kimi birləşməyə davam edəcək.

Şahin İsmayılov, 
Milli Məclisin deputatı,
YAP İdarə Heyətinin üzvü


Baxış sayı: 439


Bölməyə aid digər xəbərlər