21:06 / 17-08-2022
Quterreş Lvova getdi
Batabatda keçirilən “Xalq yaradıcılığı günü” yaddaşlara yazıldı
Tarix: 31-05-2022 22:47 | Bölmə: Mədəniyyət



    Hər bir xalqın milli dəyərləri, adət-ənənələri, dünyagörüşü və həyat tərzi onun xalq yaradıcılığı nümunələrində özünü bütün yönləri ilə təzahür edir. Ən qədim zamanlardan yaranmağa başlanmış və tarixi-mədəni, eləcə də bədii irsimizin daşıyıcısı olan xalq yaradıcılığı əsrlərboyu cilalanaraq, böyük inkişaf yolu keçərək dövrümüzə qədər gəlib çıxıb. Azərbaycanın qədim yaşayış məskənlərindən olan Naxçıvan torpağında da özünəməxsus folklor nümunələri tarixən mövcud olub. Bu dəyərli söz inciləri xalqımıza xas milli xüsusiyyətləri, adət-ənənələri, həyat və məişət tərzini özündə ehtiva edir. Bu da, xüsusilə qeyd olunmalıdır ki, dünənə ehtiramın ifadəsi kimi, muxtar respublikamızda milli-mədəni irsin yaşadılması, tarixi abidələrimizin bərpası və qorunması, yubileylərin qeyd edilməsi, qədim adət-ənənələrimizin dirçəldilməsi və yaşadılması, xalq yaradıcılığına diqqət və qayğı bu günümüzün reallığına çevrilib. 
    Xalqımızın min illərboyu yaratdığı bu milli-mənəvi dəyərləri yaşatmaq, təbliğ etmək, öyrənmək və bu dəyərləri gənc nəslə aşılamaq mühüm əhəmiyyətə malikdir. Naxçıvan Muxtar Respublikası Ali Məclisinin Sədri cənab Vasif Talıbov xalq yaradıcılığı nümunələrinin qorunması və gələcək nəsillərə ötürülməsinin əhəmiyyətini vurğulayaraq deyib: “Milli dəyərlərə bağlılıq tarixi-mədəni irsin qorunmasından başlayır. Biz bu gün tarixi abidələri tədqiq və bərpa etməklə, milli dəyərləri yaşatmaqla, bir tərəfdən keçmişimizə və gələcəyimizə ehtiramımızı bildiririk, digər tərəfdən isə xalqımızın əsrlərboyu formalaşmış sənətkarlıq mədəniyyətini, həyat tərzini, məişətini, bir sözlə, milli dəyərlər sistemini yaşadırıq. Ulu öndərimiz tövsiyə edirdi ki, gələcək uğurlara təminat xalqın milli dəyərlərini gənc nəslə aşılamaqdan başlayır. Bu mənada, gənc­lərlə aparılan işlərdə milli dəyərlərə üstünlük verməli, Azərbaycançılıq ideyasını gücləndirməli, istedadlı gəncləri xalq sənəti sahələrinə cəlb etməliyik. Milli dəyəri olmayan xalqın keçmişi olmadığı kimi, gələcəyi də yoxdur. Bu səbəbdən də milli dəyərlər, xalq yaradıcılığı, əsrlərboyu yaranan mənəvi və maddi mədəniyyət nümunələri ətraflı öyrənilməli, ənənəvi sənət sahələrinin dirçəldilməsi, onların tətbiq və təbliğ olunması istiqamətində işlər davam etdirilməlidir”.
     Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında Xalq yaradıcılığı günlərinin keçirilməsi haqqında” 2009-cu il 7 fevral tarixli Sərəncamına əsasən qədim diyarımızda milli-mənəvi dəyərlərimizin qorunması, təbliği və gələcək nəsillərə ötürülməsi istiqamətində həyata keçirilən tədbirlər unudulmaqda olan milli dəyərlərin yaşadılmasına xidmət edir. Ali Məclis Sədrinin Sərəncamından sonra muxtar respublikamızın bütün bölgələrində xalq yaradıcılığının müxtəlif sahələrinə yeni həyat verilib.
    Dilbər guşəmiz Şahbuz rayonunda da xalq sənətinin və yaradıcılığının ağacişləmə, xalçaçılıq, papaqçılıq, dülgərlik, dəmirçilik, toxuculuq, zərgərlik, misgərlik sahələri ilə yanaşı, qədim rəqslərimiz, xalq oyunlarımız və mərasim tamaşalarımız yaşadılır. Artıq qədim diyarımızda ənənə halını alan belə tədbirlərin davamı kimi 28 May – Müstəqillik Günü münasibətilə Şahbuz rayonunun ən füsunkar guşələrindən olan Batabat yaylağında keçirilən “Xalq yaradıcılığı günü” də sakinlər və qonaqlar tərəfindən maraqla qarşılandı.
    Tədbirdə Şahbuz Rayon Mədəniyyət Şöbəsinin tabeliyindəki uşaq musiqi məktəblərinin ansambllarının, mədəniyyət evləri və klubların dərnək üzvlərinin, rəqs və yallı qruplarının, eləcə də folklor kollektivlərinin ifasında “Köçəri”, “El yallısı” və “Ağababa”, “Tənzərə” yallıları, “Gülə-gülə”, “Sudan gələn sürməli qız” və “Ay dili-dili dilavər” xalq mahnıları, “Ruhani” saz havası, “Hodu-hodu” xalq oyunu, “Azərbaycan ritmləri” və digər xalq yaradıcılığı nümunələri təqdim edilib. Kollektivlərin ifaları alqışlarla qarşılanıb.
    Tədbirdə iştirak edən qonaqlara nümunəvi ictimai iaşə ximətləri də göstərilib. Rayonda fəaliyyət göstərən ailə təsərrüfatları tərəfindən hazırlanan bir-birindən ləziz təamlar iştirakçıların diqqətini cəlb edib.
    Bakı şəhər sakini Pərvanə Qulamova bizimlə söhbətində qeyd etdi ki, Naxçıvana ilk səfəridir: – Naxçıvan başdan-başa təbiət muzeyidir. Xüsusilə havası çox gözəldir. Hər tərəf təmiz və səliqəlidir. Etiraf edim ki, bura məni, həqiqətən də, valeh etdi. Bu qədim diyarda qədimliklə müasirliyin vəhdəti var. Səfərimiz zamanı heyranedici təbiəti olan Batabatda “Xalq yaradıcılığı günü” tədbirinə təsadüf etməyimiz isə bizi çox sevindirdi. Burada Naxçıvana xas olan təamlardan daddıq, qədim diyarın folklor nümunələrini izlədik, musiqi nömrələrini dinlədik və bu da səfərimizə xoş təəssüratlar qatdı. Şahidi olduq ki, qədim Naxçıvan torpağında adət-ənənələrimiz, milli dəyərlərimiz, xalq yaradıcılığı nümunələrimiz qorunur, yaşadılır.
    Naxçıvan şəhər sakini Musa Rəhmanov ilə də həmsöhbət olduq: – Batabat yaylağı ilin hər fəslində gözəldir. Elə ki havalar isindi həm şəhərin səs-küyündən uzaqlaşmaq, həm də ruhən dincəlməyin ən ideal məkanıdır Batabat. Burada heyranedici gözəllikləri seyr etdikcə, həqiqətən, insanın ruhu sakitləşir, düşünürsən ki, bu məkan sanki rəssamın qüsursuz bir tablosudur. Bu gün burada keçirilən bu tədbir də ailəmiz üçün çox sevindirici oldu. Ona görə ki, övladlarımıza adət-ənənələrimizi, milli dəyərlərimizi aşılamağın bundan yaxşı yolu ola bilməz. Tədbirin təşkilatçılarına minnətdarlığımı bildirirəm.
   “Qədim diyarımız olan Naxçıvan bu gün turistlərin marağında olan ideal məkandır”, – deyən Sumqayıt şəhər sakini Solmaz İbrahimli bildirdi ki, Naxçıvan zəngin coğrafi mühiti, tarixiliyi, füsunkar təbiəti ilə buraya üz tutan hər kəsi özünə heyran edir. Buranın gözəlliyi, təmizliyi, ecazkar təbiəti haqqında çox eşitmişdim. “Yüz dəfə eşitməkdənsə, bir dəfə görmək yaxşıdır” atalar sözünə uyğun olaraq üz tutduq bu valehedici diyara. Müəllim yoldaşlarımızla birgə ekskursiya çərçivəsində Naxçıvanın bir çox görməli yerlərinə getdik. Qədim diyarın çoxəsrlik tarixini özündə yaşadan Möminə xatın türbəsi, Xan sarayı, Əlincəqala, zəngin təbiətin ən gözəl nümunəsi olan Ağbulaq İstirahət Mərkəzi insanı özünə valeh edir. Amma artıq getdiyimiz hər bir bölgədə gördüklərimizdən, insanların səmimiyyətindən xeyli məmnun olduq. Batabat yaylağına bir neçə gün öncə gəlməyi nəzərdə tutmuşduq. Sosial şəbəkələrdə burada keçirilən tədbir haqqında xəbər tutduğumuzdan bu məkana edəcəyimiz səfəri elə bu günə planlaşdırdıq. Nə yaxşı ki bu gün buraya üz tutmuşuq. Yaylağın əsrarəngiz görüntüsü ilə bərabər belə bir tədbirdə iştirak etmək bizim üçün çox xoş oldu. Son olaraq onu da qeyd edim ki, bütün bunlardan əlavə Naxçıvan həm də ata-babalarımızdan miras qalan adət-ənənələrin yaşadıldığı yer kimi yaddaşımda əbədi qalacaqdır.
    Müstəqillik Günü – ümummilli lider Heydər Əliyevin tarixi siyasi xidmətləri sayəsində Azərbaycanın dövlət müstəqilliyinin bərpası və qorunması nəticəsində qazanılan möhtəşəm nailiyyətlər sayəsində bu tarixi əlamətdar gün ölkəmizin hər yerində olduğu kimi, muxtar respublikamızda da böyük ruh yüksəkliyi ilə qeyd olundu. Vətən azadlığı, ərazi bütövlüyu təminatı ilə yanaşı, xalqımıza milli-mənvi dəyərləri, maddi-mədəni irsimizi də yenidən bəxş edən bu ümumxalq bayramında gözəlliklər məkanı Batabatda keçirilən “Xalq yaradıcılığı günləri” də yaddaşlara ikiqat bayram ovqatı ilə yazıldı.
serqqapisi.az






Baxış sayı: 126


Bölməyə aid digər xəbərlər