Bütün xəbərlər
“Xetaq Qazyumov həmişə Azərbaycana sevgisi ilə yadda qalıb” - Firdovsi Umudov
Tarix: 16-03-2023 14:17 | Bölmə: Karusel

                “Xetaq Qazyumov həmişə Azərbaycana sevgisi ilə yadda qalıb”



Azərbaycan güləş millisinin sabiq baş məşqçisi, “Sərhədçi” peşəkar idman klubunun prezidenti, Dövlət Sərhəd Xidmətinin polkovniki, Vətən müharibəsi iştirakçısı Firdovsi Umudov sərbəst güləş üzrə yığma komandaya baş məşqçi təyinatları ilə bağlı fikirlərini bölüşüb.
Sabaha-inamla.az “Qafqazinfo”ya istinadən xəbər verir ki, milli komandamızla böyük uğurlar qazanmış F.Umudov yığmamıza təyinat alan Xetaq Qazyumov və Şərif Şərifova uğurlar arzulayıb.
İstər Qazyumovu, istərsə də Şərif Şərifovu yaxından tanıyan və onların çalışdırıcısı olmuş əməkdar məşqçi sərbəst güləş millimizin onların rəhbərliyi altında uğur qazanacağını bildirib.
F.Umudov qeyd edib ki, onların peşəkarlığı və insani keyfiyyətləri yüksək səviyyədədir:
“Ölkəmizin sərbəst güləş üzrə yığma komandası Xetaq Qazyumova tapşırıldı. Uzun illər yığma komandamızın kapitanı olmuş Xetaqı yaxından tanıyan biri kimi bu təyinatı olduqca uğurlu hesab edir və ona gələcək fəaliyyətində uğurlar arzulayıram.
Xetaq hər zaman öz insani keyfiyyətləri, peşəkarlığı, işinə məsuliyyətli yanaşması və stabilliyi ilə seçilən idmançılarımızdan olub və uzun illər onunla bir yerdə çalışmaqdan hər zaman zövq almışam.
2007-ci ildən etibarən Azərbaycanın idman şərəfini qoruyan Xetaq Qazyumov Yay Olimpiya Oyunlarının 3 dəfə mükafatçısı, dünya və 3 qat Avropa çempionu, Bakı-2015 I Avropa Oyunlarının qalibi olub, daha bir neçə dəfə dünya və Avropa çempionatlarında müxtəlif əyarlı medal qazanıb.
İdmançı karyerasını başa vurduqdan sonra Şimali Osetiya yığmasının baş məşqçisi olan Xetaq hər zaman Azərbaycana olan sevgisi ilə yadda qalıb və ölkəmizin onun üçün etdiklərini heç zaman unutmayıb.
Onunla yığma komandada idmançı-məşqçi münasibətlərimiz başa çatsa da, bu illər ərzində daim ünsiyyətdə olmuşuq, münasibətlərimiz hər zaman davam edib.
Eyni sözləri yığma komandada məşqçi vəzifəsini yerinə yetirəcək Olimpiya, dünya və Avropa çempionumuz Şərif Şərifov haqqında da demək istərdim. Azərbaycan Güləş Federasiyası rəhbərliyinin bu seçimini dəstəkləyir və yeni məşqçilərə gələcək fəaliyyətində uğurlar arzulayıram!”.








Baxış sayı: 103


Bölməyə aid digər xəbərlər