İordaniyalı jurnalist Azərbaycan-İordaniya əlaqələrinin perspektivlərindən yazıb
Tarix: 19-07-2021 18:59 | Bölmə: Dünya



İordaniyada fəaliyyət göstərən rus mənşəli jurnalist, “The Russian Vision Supplement” qəzetinin baş redaktoru Yelena Duqina “Nabateans” nəşrində dərc olunmuş məqaləsində Azərbaycan-İordaniya əlaqələrinin perspektivlərindən yazıb.
AZƏRTAC xəbər verir ki, məqalədə İordaniya Kralı II Abdullanın ərəb dünyasında və Azərbaycan Prezidenti İlham Əliyevin Cənubi Qafqaz regionunda sülhün və təhlükəsizliyin təmin edilməsində liderlik keyfiyyətləri vurğulanıb. Ölkəmizin krallığa təyin edilmiş yeni səfiri Eldar Səlimovun rəsmi “Petra” agentliyində dərc edilmiş məqaləsinə istinad edən müəllif qeyd edib ki, 2023-cü ildə iki dost ölkə arasında diplomatik əlaqələrin qurulmasının 30 illiyi tamam olur. İordaniya və Azərbaycan beynəlxalq təşkilatlar, xüsusən İslam Əməkdaşlıq Təşkilatı və BMT çərçivəsində uğurlu əməkdaşlıq edirlər. Bundan başqa, rəsmi Əmman və Bakının hazırda Azərbaycanın sədrlik etdiyi Qoşulmama Hərəkatında da sıx əlaqələri mövcuddur.
Məqalədə qeyd olunub ki, azərbaycanlı diplomat tezliklə Bakı ilə Əmman arasında birbaşa aviareyslərin də həyata keçiriləcəyini deyib. Bu, postpandemiya dövründə turizm sektorunda daha geniş əməkdaşlığa töhfə verəcək. Eyni zamanda, bu yaxınlarda Prezident İlham Əliyevin təməlini qoyduğu Ələt Azad İqtisadi Zonası da iordaniyalı iş adamlarının diqqətini cəlb edib.
Müəllif yazıb ki, təhsil və mədəniyyət sahələrində də iki dost ölkə arasında əməkdaşlığın böyük potensialı mövcuddur. Azərbaycanın və İordaniyanın universitetlərində Azərbaycan və ərəb dillərinin tədrisi, Əmman və Bakıda mədəniyyət mərkəzlərinin yaradılması, alimlərin və incəsənət xadimlərinin qarşılıqlı səfərlərinin təşkili də planlaşdırılır. Məqalədə vurğulanıb ki, İordaniya şirkətləri Azərbaycanın işğaldan azad olunmuş ərazilərində bərpa-quruculuq işlərində də fəal iştirak edə bilər.



Baxış sayı: 111


Bölməyə aid digər xəbərlər