Ermənistan artıq uzun illərdir ki, işğal altında saxladığı Azərbaycan torpaqlarından çıxmalıdır.
Bu sözləri AZƏRTAC-ın Yaponiyadakı xüsusi müxbirinə müsahibəsində Tokioda yerləşən Keyo Universitetinin professoru xanım Yoko Hirose deyib.
Artıq uzun illərdir ki, Ermənistan-Azərbaycan Dağlıq Qarabağ münaqişəsi mövzusunda elmi araşdırmalar aparan və bununla bağlı çoxsaylı məqalələrin müəllifi olan yapon professor işğal zonasında baş verən qanlı döyüşlərin onda dərin kədər hissi doğurduğunu bildirib. Qeyd edib ki, Ermənistan ordusu işğal altında saxladığı torpaqlardan tezliklə çıxmalı və regionun yerli əhalisi olan azərbaycanlılar qısa zaman ərzində öz doğma yurdlarına qayıtmalıdırlar.
Azərbaycan torpaqlarının Ermənistan ordusu tərəfindən işğalının heç bir beynəlxalq hüquqa uyğun olmadığını, tamamilə anormal bir hal olduğunu vurğulayan Y.Hirose bununla əlaqədar BMT Təhlükəsizlik Şurasının ötən əsrin 90-cı illərində qəbul etdiyi qətnamələri də xatırladıb. Qeyd edib ki, həmin sənədlərdə bu ərazilərin Azərbaycana məxsus olduğu və erməni ordusunun qeyd-şərtsiz həmin əraziləri tərk etməsi barədə tələb öz əksini tapıb. Lakin çox təəssüf ki, bu sənədlərin qəbulundan 25 ildən çox vaxt ötsə də, Ermənistan həmin qətnamələrin tələblərini yerinə yetirməyib. Ən təəccüblüsü isə odur ki, beynəlxalq ictimaiyyət bu günədək Ermənistan tərəfini həmin qətnamələri icra etmədiyinə görə qınamayıb.
Yaponiyanın da bəzi ərazilərinin qonşu ölkələr tərəfindən zəbt olunduğunu xatırladan yapon professor məhz buna görə də Azərbaycan xalqının məsələ ilə bağlı hisslərini başa düşdüyünü vurğulayıb.
Azərbaycanın Avrasiya ölkələrinin neft və qaz ehtiyacının ödənilməsində mühüm rolunu xatırladan Y.Hirose bildirib ki, Ermənistanın bu boru kəmərlərini vurmağa çalışması həmin ölkələrin enerji təminatında böyük problemlərə yol aça bilər.
Yaponiyalı professor Ermənistan ordusunun Azərbaycan şəhərlərinə, mülki əhaliyə raket və ağır artilleriyadan atəş açmasına da münasibət bildirib. Qeyd edib ki, bu, beynəlxalq humanitar hüququn, Cenevrə Konvensiyasının kobud şəkildə pozulmasıdır. Bu, olduqca ciddi məsələdir və Ermənistan belə hücumlarını təcili şəkildə dayandırmalıdır.
Y.Hirose, həmçinin Azərbaycan Ordusunun uğurla davam edən hərbi əməliyyatları nəticəsində Ermənistan silahlı qüvvələrinin tezliklə həmin əraziləri tərk edəcəyinə və Azərbaycanın ərazi bütövlüyünün təmin olunacağına əminliyini də bildirib.