​29 yaşlı müdriklik partiyası-Fəxrəddin EYVAZOV
Tarix: 14-11-2021 21:32 | Bölmə: Siyasət


     Bildiyimiz kimi, Ulu Öndər Heydər Əliyevin siyasi irsinin institusional təcəssümü sayılan Yeni Azərbaycan Partiyası ötən əsrin sonunda ölkə həyatını bürümüş siyasi kataklizmlər, ictimai təbəddülatlar dövründə yaranmışdır. O zamanAzərbaycan öz  tarixinin son dərəcə ağır və keşməkeşli günlərini yaşayır, ölkə ciddi sınaqlara çəkilirdi.Azərbaycanın taleyini düşünən insanlar -ziyalılarınınölkəni böhrandan çıxara biləcək yeni bir partiya yaratmaq təşəbbüsü ilə çıxış etdilər və bu məqsədlə xalqın sınanmış lideri və müdrik oğlu Heydər Əliyevin şəxsiyyəti ətrafında birləşdilər.
      Dövlətimiz 1991-ci ildə müstəqillik əldə etsə də, artıq onun  itirilməsi təhlükəsi ilə üzləşmişdi. Belə bir dövrdə ölkədə ciddi hakimiyyət böhranı yaşanır, anarxiya tüğyan edir, Bakı az qala vətəndaş müharibəsinə sürüklənirdi. Artıq Xocalı qətliamı törədilmiş, Şuşa, Laçın və digər ərazilərimiz işğal olunmuşdu. Xalqın üzləşdiyi faciələrin, bəlaların “qanadında” hakimiyyəti zəbt edən Xalq Cəbhəsi günbəgün nüfuzdan düşür, ölkənin idarəetməsində yaranan siyasi xaosu ard-arda atdığı yanlış addımlarla daha da dərinləşdirirdi. Buna görə də 1992-ci ildə Azərbaycanın 91 nəfər tanınmış ziyalısı Naxçıvan Ali Məclisinin  sədri Heydər Əliyevi hakimiyyət uğrunda açıq və fəal mübarizəyə səsləyən, onun hakimiyyətə qayıdışı zərurətini əsaslandıran müraciətə imza atır. Xalq Azərbaycanı bu vəziyyətdən çıxara biləcək yeganə insana, hərtərəfli potensiallı və cəsarətli müdrik şəxsiyyətə sığınır. Müraciət cavabsız qalmır və1992-ci il noyabrın 21-dəHeydər Əliyevin sədrliyi iləAzərbaycanın bütün regionlarından seçilmiş nümayəndələrin təmsil olunduğu konfrans keçirilir.550 nəfərdən ibarət təşəbbüs qrupu Naxçıvana gedərək partiyanın təsis konfransını orada keçirməyə nail oldu.
     Həmin konfrans Yeni Azərbaycan Partiyasının yaradılması haqqında qərar, partiyanın Proqram və Nizamnaməsini qəbul etdi. Konfransda Heydər Əliyev yekdilliklə partiyanın Sədri seçildi. Habelə, partiyanın Siyasi Şurası, İdarə Heyəti və sədrin müavinləri seçildi. Beləliklə, müstəqil Azərbaycanın tarixində öz üzərinə böyük tarixi missiya götürən Yeni Azərbaycan Partiyası yarandı.
     Xilaskar partiyanın meydana gəlməsi 1988-ci ildən başlayaraq ölkəmizdə cərəyan edən hadisələrin yekunu və mövcud olan ictimai-siyasi şəraitin məntiqi nəticəsi idi. Azərbaycanın ən yeni tarixinə “91-lər”in müraciəti kimi daxil olmuş həmin sənəd əslində, bütün xalqın arzu və istəklərinin ifadəsi idi.Ulu Öndərə müraciət edən məşhur “91-lər”in çox cəsarətli addımları nəticəsində dağıdıcı proseslərin qarşısı alındı.
      Heydər Əliyevin rəhbərliyi ilə Yeni Azərbaycan Partiyasının ilk addımları Azərbaycanda siyasi sabitliyin bərpasına yönəldilmişdir. Təsadüfi deyildir ki, 1993-cü ilin yayında Azərbaycanda vətəndaş müharibəsi başlanan dövrdə cəmiyyətimizin bütün ümidləri yenə də Heydər Əliyevin dühası ilə bağlı idi. Xalqın tələbi ilə Naxçıvandan Bakıya  gələn YAP sədri,Naxçıvan Ali Məclisinin sədri qısa müddət ərzində vəziyyəti sabitləşdirdi və ölkəmizin inkişaf yoluna qədəm qoymasını təmin etdi.
    O günləri birdə xatırlayaq.
     ...İyunun 4-də Gəncədə Azərbaycan ordusunun keçmiş korpus komandiri Surət Hüseynovun başçılıq etdiyi hərbçilərlə hökumət qüvvələri arasında silahlı toqquşma baş verdi. S.Hüseynovun nəzarətində olan 709 saylı hərbi hissənin tərksilah edilməsi ilə bağlı həyata keçirilən əməliyyat iflasa uğradı, hər iki tərəfdən 35 nəfər həlak oldu. Gəncəyə göndərilmiş hökumət rəsmiləri S.Hüseynovun dəstəsi tərəfindən girov götürüldülər. Bu hadisə Azərbaycanda dərinləşməkdə olan hərbi-siyasi böhranı ən kritik həddə çatdırdı.   
...İyunun 8-də Gəncə hadisələri ilə bağlı ölkədə böhran yetərincə dərinləşdi. Surət Hüseynovun tabeçiliyindəki silahlı birləşmələr Gəncəbasar bölgəsində yerli hakimiyyət strukturlarını devirərək Bakıya doğru hərəkət etməyə başladılar. Bu zaman başını itirmiş respublika rəhbərliyi vəziyyətdən yeganə çıxış yolunu ağsaqqal deputat Heydər Əliyevdən Bakıya gəlməsini və  xalqı bu bəladan qurtarmasını israrla xahiş etməkdə gördü.
...İyunun 9-da ulu öndər Heydər Əliyev prezident Əbülfəz Elçibəyin rəsmi dəvəti ilə Bakıya gəldi. Həmin gün Milli Məclis vəziyyəti geniş müzakirə edərək, Gəncədəki qiyamda iştirak etmiş şəxslərə amnistiya verilməsi və Gəncə olaylarının araşdırılması üçün deputat-istintaq komissiyasının yaradılması haqqında qərarlar qəbul etdi. Xalqın təkidli tələbini cavabsız qoymayan böyük şəxsiyyət Heydər Əliyev bütün çətinliklərə baxmayaraq, cəsarətlə irəli durdu və bir qrup jurnalistlə Gəncəyə gedərək real vəziyyətlə yerində tanış olmaq qərarını verdi. Bildirdi ki, yalnız bundan sonra təklifə cavab verəcək. Əlbəttə, bu, çox riskli və qorxulu bir səfər idi. Çünki həmin vaxt Surət Hüseynovun rəhbərlik etdiyi silahlı dəstə hər kəsə qarşı hər an sui-qəsd təşkil edə bilərdi.  Elə busəbəbdən də   respublikanın rəhbər vəzifəli şəxsləri qorxularından hadisə yerinə getməmişdilər. Surət Hüseynov isə  xarici havadarlarının diktəsi ilə silahlı mübarizəsini davam etdirir, respublikada hakimiyyəti ələ keçirmək niyyətini reallaşdırmaq istəyirdi.
      Həmin qarışıq zamanda xalqın Heydər Əliyevin hakimiyyətə qayıdışı arzusu ilə ayağa qalxması sözün həqiqi mənasında milli hərəkata çevrilmişdi. AXC-Müsavat iqtidarı sürətlə siyasi iflasa uğramasından “nokdaun” vəziyyətinə düşərək səndirləyirdi. Dünya şöhrətli siyasətçinin böyük cəsarət nümunəsi olan Gəncə səfəri tədricən hər şeyi yoluna qoydu və ölkədə yaradılan daxili sabitliyin təməlinə çevrildi. Ulu öndər çəkinmədən Gəncədə 709 saylı hərbi hissənin döyüş meydanına çevrilmiş ərazisinə baş çəkdi, şəhər sakinləri və hərbi qulluqçularla görüşüb söhbət etdi, yaranmış vəziyyəti onlarla birlikdə təhlil etdi. Gəncəlilər hər yerdə xilaskarı gül-çiçəklə, xoş diləklə  qarşılayırdılar. Əhali küçələrə axışır, ulu öndərə sevgi və inamını  nümayiş etdirir, onunla görüşür, səfərin gəncəlilərə əsl sevinc bəxş etdiyini özlərinin təbii səmimiyyətləri ilə büruzə verirdilər.
       Sonradan həmin ağır günlərdə Gəncəyə yollanması barədə danışan ümummilli lider bildirmişdir ki, xarici havadarlarının təsiri ilə qiyam qaldırmış, üstəlik də AXC-Müsavat iqtidarının qıcıqlandırdığı “ərköyün” polkovniklə (Surət Hüseynovla) bütün gecəni söhbət aparıb və böyük siyasi məharətlə, ölkənin, xalqın taleyi naminə onu daha yanlış addımlar atmaqdan çəkindirə bilib... 
      Beləliklə, sözün əsl mənasında tarix yazan dahi şəxsiyyət – xalqının böyük oğlu Heydər Əliyev öz həyatını təhlükəyə ataraq möhtəşəm qurtuluş missiyasını yerinə yetirmişdir. Gəncə səfərindən iki gün sonra - 1993-cü il iyunun 15-də isə Heydər Əliyevin Azərbaycan Respublikası Ali Sovetinin sədri seçilməsi xalqın ümummilli liderin xilaskarlıq missiyasına inamının nəticəsi idi. Tarixin sonrakı dönəmi  YAP-ın yaradılmasının və ulu öndərdən qayıdış tələbinin ən düzgün yol olduğunu göstərmişdir.
        Həmin ilin payızında Ulu Öndər Azərbaycan Prezidenti seçilmişdir. Ölkənin inkişaf konsepsiyasını ardıcıl surətdə həyata keçirmişdir. Növbəti ildə yeni yaranan nizami Azərbaycan Ordusunun uğurlu döyüş əməliyyatları keçirməsinin nəticəsi olaraq ermənilər Qarabağ münaqişəsində atəşkəsə getməyə məcbur olmuşlar ki, bu da ölkəmizdə iqtisadiyyatın dirçəldilməsinə, Silahlı Qüvvələrin möhkəmlənməsinə imkan vermişdir.
1994-cü ildə Ümummilli liderin uzaqgörən siyasətinin sayəsində “Əsrin müqaviləsi” imzalanmışdır. Bu böyük iqtisadi uğur eyni zamanda Azərbaycanın dövlətmüstəqilliyinin dönməz, sarsılmaz və əbədi xarakter almasını təmin etmişdir.Daha bir il sonra müstəqil Azərbaycanın ilk Konstitusiyası qəbul edilmişdir. Tarixi uğurları saymaqla qurtaran deyil.
Bu gün iqtidar partiyasının, onun Yaradıcısının və hazırkı Sədrinin yüksək vətənpərvərlik  səyləri sayəsində Azərbaycan ictimai-siyasi sabitliyi, mədəni-iqtisadi inkişafı ilə dünyanın söz sahibi olan dövlətləri sırasına qoşulub. Qarabağda otuz illik erməni işğalına son qoyulub və hazirda orada genişmiqyaslı bərpa-quruculuq işləri görülür. Möhtərəm Prezidentimiz, müzəffər Ali Baş Komandanımız, YAP-ın Sədri  cənab İlham Əliyevin rəhbərliyi ilə daha işıqlı sabahlara üz tutmuşuq. Bütün bunlara görə xalqımız ilk növbədə məhz ulu öndərin ölməz ruhuna borcludur.
        Bütün bu uğurlar Azərbaycan xalqının iradəsinə əsaslanan Ulu Öndər Heydər Əliyevin siyasi xəttinə sadiqliyin bəhrələridir.  Yeni Azərbaycan Partiyasının üzvləri onlara tapşırılan hər sahədə əsl vətənpərvərlik və layiqli idarəetmə nümunəsi göstərirlər.  Bu siyasətə sadiqlik, cəmiyyətimizdə yaşanan həmrəylikdən və Ulu Öndərin ideylarına olan ümumxalq bağlılığından xəbər verir.
     Düz 29 il öncə Ulu Öndər Heydər Əliyevin rəhbərliyi ilə yaranmış Yeni Azərbaycan Partiyası ümumxalq partiyasına çevrilmiş və cəmiyyətimizin aparıcı siyasi qüvvəsi olmaqla, unudulmaz dahi şəxsiyyətin  özünün dediyi kimi, “dünənin, bu günün və sabahın partiyası” səviyyəsinə yüksəlmişdir.
     Fəxr edirik ki, bu partiyanın sıravi əsgəriyik!

Fəxrəddin EYVAZOV,
YAP Masallı rayon təşkilatının aparat rəhbəri


Baxış sayı: 217


Bölməyə aid digər xəbərlər